అమరావతికి శుభవార్త.. రూ.11,000 కోట్ల విడుదలకు గ్రీన్ సిగ్నల్

ఆంధ్రప్రదేశ్ రాజధాని అమరావతికి మరో శుభవార్త అందింది. అమరావతి రాజధాని నిర్మాణానికి ఏపీ ప్రభుత్వం అధిక ప్రాధాన్యం ఇస్తున్న సంగతి తెలిసిందే. అమరావతిలో పలు పనులు చేపట్టేందుకు ఇప్పటికే సీఆర్డీఏ సమావేశంలో, కేబినెట్ భేటీలలో ఆమోదం కూడా లభించింది. పనులు చేపట్టేందుకు టెండర్లు కూడా పిలుస్తున్నారు. తాజాగా రాజధాని నిర్మాణం మరింత వేగంగా చేపట్టేందుకు వీలుగా కీలక అడుగుపడింది. అమరావతి రాజధాని నిర్మాణానికి రూ.11000 కోట్లు రుణం విడుదల చేయాలని హౌసింగ్ అండ్ అర్బన్ డెవలప్‌మెంట్ కార్పొరేషన్ లిమిటెడ్ నిర్ణయించింది. ముంబై వేదికగా జరిగిన హడ్కో బోర్డు సమావేశంలో ఈ ప్రతిపాదనలకు ఆమోదం లభించింది.

ఈ విషయాన్ని ఏపీ మున్సిపల్ శాఖ మంత్రి పి. నారాయణ వెల్లడించారు. అమరావతి నిర్మాణం కోసం హడ్కో ద్వారా రుణం తీసుకునేందుకు ఏపీ ప్రభుత్వం వారితో సంప్రదింపులు జరిపిందని.. చర్చల సందర్భంగా 11000 కోట్లు నిధులు విడుదల చేసేందుకు హడ్కో అంగీకరించిందని తెలిపారు. హడ్కో తీసుకున్న నిర్ణయంతో రాజధాని అమరావతి పనులు మరింత వేగవంతమవుతాయని నారాయణ అభిప్రాయపడ్డారు. అమరావతిలో రోడ్ల నిర్మాణం సహా మౌలిక వసతులకు సంబంధించిన పలు పనులను చేపట్టేందుకు ఇప్పటికే ప్రభుత్వం ఆమోదం తెలిపింది. ఈ క్రమంలోనే హడ్కో నుంచి నిధుల విడుదలపై సానుకూల నిర్ణయం రావటం శుభపరిణామమని అధికారులు చెప్తున్నారు.

మరోవైపు అమరావతి గ్రీన్ ఫీల్డ్ కేపిటల్ సిటీ నిర్మాణానికి 11 వేలకోట్లు రుణం ఇచ్చేందుకు హడ్కో ముందుకు వచ్చిన సంగతి తెలిసిందే. ఈ విషయమై మంత్రి నారాయణ ఢిల్లీ వెళ్లి హడ్కో అధికారులతో సంప్రదింపులు జరిపారు. అమరావతి అభివృద్ధి విషయంలో ఏపీ ప్రభుత్వం ప్రణాళికలను వారికి వివరించారు. ఆంధ్రప్రదేశ్ ప్రభుత్వం ప్రతిపాదనలు, ప్రణాళికలతో సంతృప్తి చెందిన హడ్కో రూ.11000 కోట్లు రుణం ఇచ్చేందుకు అంగీకరించింది. మరోవైపు అమరావతి నిర్మాణం తొలి దశ పనుల కోసం ప్రపంచబ్యాంకు నుంచి 15000 కోట్లు, ఆసియా అభివృద్ధి బ్యాంక్ నుంచి 11000 కోట్లు రుణం ఇచ్చేందుకు ముందుకు వచ్చిన సంగతి తెలిసిందే. బడ్జెట్ సందర్భంగా అమరావతి నిర్మాణానికి రూ.15000 కోట్లు సాయం ప్రకటించిన కేంద్రం.. ప్రపంచబ్యాంక్ ద్వారా ఆ సాయాన్ని అందించనుంది.