అరవింద్ కేజ్రీవాల్, పంజాబ్ సీఎంపై రూ.100 కోట్ల పరువునష్టం దావా వేస్తా: బీజేపీ నేత పర్వేష్ వర్మ

మరికొన్ని రోజుల్లోనే దేశ రాజధాని ఢిల్లీలో అసెంబ్లీ ఎన్నికలు జరగబోతుండగా.. అక్కడ నాటకీయ పరిణామాలు చోటు చేసుకుంటున్నాయి. ముఖ్యంగా ప్రదాన పార్టీలన్నీ ఒకరిపై ఒకరు తీవ్ర విమర్శలు చేసుకుంటూ.. ఓటర్లను ఆకర్షించేందుకు పెద్ద ఎత్తున కృషి చేస్తున్నారు. ఈక్రమంలోనే ఆప్ అధినేత అర్వింద్ కేజ్రీవాల్.. న్యూఢిల్లీ స్థానంలో బీజేపీ తరఫున పోటీ చేస్తున్న పర్వేష్ వర్మపై విమర్శలు చేశారు. వర్మ పంజాబీలను జాతీయు ముప్పుగా అభివర్ణించారంటూ చెప్పారు. దీనిపై స్పందించిన బేజీపీ అభ్యర్థి.. అర్వింద్ కేజ్రీవాల్, పంజాబ్ ముఖ్యమంత్రి భగవంత్ మాన్‌లపై 100 కోట్ల రూపాయల పరువు నష్టం దావా వేస్తానని వివరించారు. ఆ పూర్తి వివరాలు మీకోసం.

జనవరి 26వ తేదీన దేశ రాజధాని ఢిల్లీలో జరిగే పరేడ్‌కు ముందు పంజాబ్ నుంచి పెద్ద ఎత్తున కార్లు వస్తున్నాయని.. వాటి వల్ల నగరంలో పెద్ద ముప్పు వాటిల్లే అవకాశం ఉందంటూ ఇటీవలే బీజేపీ అభ్యర్థి పర్వేష్ వర్మ తెలిపారు. అయితే బీజేపీ నాయకుడు చేసిన ఈ వ్యాఖ్యలను ఖండిస్తూ.. ఆమ్ ఆద్మీ పార్టీ అధినేత, మాజీ ముఖ్యమంత్రి అయిన అర్వింద్ కేజ్రీవాల్ ఎక్స్ వేదికగా పోస్టు పెట్టారు. ముఖ్యంగా దేశం కోసం అపారమైన త్యాగాలు చేసిన లక్షలాది మంది పంజాబీలకు ఢిల్లీ నిలయం అని తెలిపారు.

అలాగే దశ విభజన సమయంలో ఎంతో మంది పంజాబీలు ఢిల్లీకి వచ్చి ఎన్నో కష్టాలు పడ్డారని.. వారి వల్లే ఢిల్లీ ఇంతలా అభివృద్ధి చెందిందంటూ కేజ్రీవాల్ వివరించారు. ఢిల్లీలో అంతర్భాగమైన పంజాబీలపై ఇలాంటి కామెంట్లు చేయడం చాలా బాధాకరం అంటూ చెప్పుకొచ్చారు. పంజాబీ కమ్యూనిటీని అవమానించేలా పర్వేష్ వర్మ చేసి వ్యాఖ్యలను వెనక్కి తీసుకుని, వెంటనే క్షమాపణలు చెప్పాలంటూ డిమాండ్ చేశారు. తాజాగా దీనిపై పర్వేష్ వర్మ స్పందించారు. తాను చేసిన వ్యాఖ్యలను అర్వింద్ కేజ్రీవాల్ పూర్తిగా వక్రీకరించారని పేర్కొన్నారు.

ఇటీవల కాలంలో ఆప్ మంత్రులు, ఎమ్మెల్యేలతో పాటు పంజాబ్ ముఖ్యమంత్రి భగవంత్ మాన్‌కు చెందిన అనేక వాహనాలు న్యూఢిల్లీలో కనిపిస్తున్నాయని... వారంతా పెద్ద ఎత్తున ప్రచారాలు చేస్తున్నారని వర్మ వెల్లడించారు. అలాగే వారు ప్రచారం మాత్రమే చేస్తే తానేమీ తప్పుపట్టనని.. కానీ వారు చైనా తయారు చేసిన సీసీ కెమెరాల సాయంతో మద్యం, డబ్బు పంపిణీ చేస్తూ ఓటర్లను ప్రభావితం చేస్తున్నారని ఆరోపించారు. ఇదే విషయంపై పోలీసులు, ఎన్నికల కమిషనర్‌కు ఫిర్యాదు చేశారు.

ఎన్నికల్లో ఓడిపోతామన్న భయంతోనే కేజ్రీవాల్ అసత్య ప్రచారాలు చేస్తున్నారని వర్మ వివరించారు. అలాగే రాముడు, హనుమంతుడి గురించి కూడా కేజ్రీవాల్ తప్పుగా మాట్లాడి.. హిందూ విశ్వాసాలను అగౌరవ పరిచారని అన్నారు. అంతటితో ఆగకుండా.. తన గురించి తప్పుడు ప్రచారాలు చేసిన కేజ్రీవాల్, పంజాబ్ ముఖ్యమంత్రి భగవంత్ మాన్‌లపై 100 కోట్ల రూపాయల పరువు నష్టం దావా వేయబోతున్నట్లు ప్రకటించారు. అలాగే వచ్చే ఎన్నికల్లో తామే విజయం సాధిస్తామని ఆశాభావం వ్యక్తం చేశారు.