హైదరాబాద్‌లో కిడ్నీ రాకెట్.. ఒక్కో కిడ్నీ రూ.55 లక్షలు.. అలాంటి వారే టార్గెట్..!

హైదరాబాద్ నగరంలో భారీ కిడ్నీ రాకెట్ బయటపడింది. కిడ్నీలను ఇడ్లీల మాదిరిగా అమ్మేస్తున్న ముఠాను పోలీసులు పట్టుకున్నారు. పైకి హాస్పిటల్ రన్ చేస్తున్నట్లు కవరింగ్ ఇస్తూ.. లోపల మాత్రం చీకటి దందా కొనసాగిస్తున్నట్లు పోలీసులు గుర్తించారు. ఎటువంటి పర్మిషన్లు లేకుండా కిడ్నీ ట్రాన్స్ప్లాంటేషన్ చేయటమే కాకుండా.. ఒక్కో కిడ్నీని రూ.55 లక్షలకు అమ్ముతున్నట్లు తేలింది. ఈ మేరకు హాస్పిటల్ సిబ్బందిని పోలీసులు అదుపులోకి తీసుకొని విచారిస్తున్నారు.

  పోలీసులు తెలిపిన వివరాల ప్రకారం.. హైదరాబాద్ సరూర్ నగర్ డాక్టర్స్ కాలనీకి చెందిన సుమంత్ గట్టుపల్లి అనే డాక్టర్ గతేడాది జులైలో స్థానికంగా ఓ మల్టీ స్పెషాలిటీ ఆసుపత్రి ప్రారంభించాడు. జనరల్ ఫిజిషియన్, జనరల్ సర్జరీల నిర్వహణకు రంగారెడ్డి జిల్లా వైద్యశాఖ నుంచి పర్మిషన్ తీసుకున్నాడు. 9 బెడ్లకు పర్మిషన్లు తీసుకుని నాలుగు ఫ్లోర్లలో దాదాపు 30 బెడ్లు ఏర్పాటు చేసి హాస్పిటల్ రన్ చేస్తున్నాడు. అయితే చాలా ఈజీగా.. తక్కువ సమయంలో డబ్బులు సంపాదించేందుకు కిడ్నీ మార్పిడిలు చేయటం ప్రారంభించాడు. గుట్టు చప్పుడు కాకుండా కిడ్నీలు అవసరమైన వారికి ట్రాన్స్ప్లాంటేషన్ చేస్తున్నాడు. పొరుగు రాష్ట్రాలకు చెందిన మహిళలను టార్గెట్ చేసి.. వారి ఆర్థిక ఇబ్బందులను ఆసరాగా చేసుకొని కిడ్నీ దందా మెుదలు పెట్టాడు.

ఇతర రాష్ట్రాల నుంచి డోనర్లను రప్పించి.. అవసరమైన వారికి ఒక్కో కిడ్నిని రూ.55 లక్షల చొప్పున అమ్మేస్తున్నాడు. ఎటువంటి పర్మిషన్ లేకున్నా.. ఆసుపత్రిలోనే సర్జరీలు చేస్తున్నాడు. తమిళనాడుకు చెందిన డాక్టర్ పవన్, ప్రదీప్ అనే వ్యక్తిని మధ్యవర్తులుగా పెట్టుకుని ఈ కిడ్నీ దందా కొనసాగిస్తున్నాడు. ఈ అక్రమ కిడ్నీల మార్పిడిపై మంగళవారం (జనవరి 21) రంగారెడ్డి జిల్లా డీఎంహెచ్‌వో వెంకటేశ్వరరావుకు ఓ గుర్తు తెలియని వ్యక్తి నుంచి ఫోన్ ద్వారా సమాచారం వచ్చింది. దీంతో ఆయన ఎల్బీనగర్ డీసీపీ ప్రవీణ్ కుమార్‌తో కలిసి హాస్పిటల్‌పై దాడి చేశారు. పోలీసులను చూసిన డాక్టర్లు పరారు కాగా.. సిబ్బందిని అదుపులోకి తీసుకున్నారు.

హాస్పిటల్‌లో చికిత్స పొందుతున్న నలుగురు పేషెంట్లను పోలీసులు విచారించారు. తమిళనాడుకు చెందిన నస్రీనా బాను, ఫిరోజ్ బేగం నుంచి కిడ్నీలు తీసుకుని కర్ణాటకకు చెందిన బీఎస్ రాజశేఖర్, కృపాలత అనే మహిళకు ఈ నెల17న కిడ్నీ ట్రాన్స్ ప్లాంటేషన్ చేసినట్లు గుర్తించారు. చికిత్స పొందుతున్న నలుగురిని మెరుగైన చికిత్స కోసం గాంధీ ఆసుపత్రికి తరలించారు. హాస్పిటల్ సీజ్ చేసి.. పరారీలో ఉన్న డాక్టర్ సుమంత్ కోసం గాలిస్తున్నారు. ఇక ఈ ఘటనపై తెలంగాణ హెల్త్ మినిస్టర్ దామోదర రాజనర్సింహా సీరియస్ అయ్యారు. ఈ వ్యవహారంతో సంబంధం ఉన్న డాక్టర్లు, హాస్పిటల్ యాజమాన్యంపై చట్ట ప్రకారం చర్యలు తీసుకోవాలని అధికారులను ఆదేశించారు. కిడ్నీ రాకెట్ ఘటనపై పూర్తి స్థాయిలో విచారణ జరిపి నివేదిక ఇవ్వాలన్నారు.