జీవితఖైదు పడిన సంజయ్ రాయ్.. జైలులో ఆ రెండు కావాలని అధికారులకు విజ్ఞప్తి

దేశవ్యాప్తంగా పెను సంచలనం సృష్టించిన కోల్‌కతా ఆర్జీకర్ మెడికల్ హాస్పిటల్ డాక్టర్ అత్యాచారం, హత్య ఘటనలో ఇటీవలె కోల్‌కతాలోని సీల్దా కోర్టు సంచలన తీర్పు వెలువరించింది. ఈ కేసులో ప్రధాన నిందితుడిగా ఉన్న సంజయ్ రాయ్‌కి జీవితఖైదు విధిస్తూ తీర్పు ఇచ్చింది. అయితే గతేడాది ఆగస్ట్ 23వ తేదీ నుంచి కోల్‌కతాలోని ప్రెసిడెన్సీ సెంట్రల్ జైలులో ఉంటున్న సంజయ్ రాయ్.. అండర్ ట్రయల్ ఖైదీగా ఉండగా.. ఇప్పుడు జీవితఖైదు పడటంతో శిక్ష అనుభవిస్తున్నాడు. ఈ క్రమంలోనే తనకు శిక్ష ఖరారైన తర్వాత ప్రెసిడెన్సీ సెంట్రల్ జైలు అధికారులకు సంజయ్ రాయ్ ఒక విన్నపం చేసుకున్నాడు. తనకు జైలులో ఒక పెన్, నోట్‌బుక్ అందించాలని కోరాడు.

సంజయ్ రాయ్‌ జైలులో వివిధ రకాల పనులు చేయనున్నట్లు ప్రెసిడెన్సీ సెంట్రల్ జైలు అధికారులు పేర్కొన్నారు. సంజయ్ రాయ్ పనుల్లో నైపుణ్యం లేని వాడు కాబట్టి.. అతనికి రోజుకి రూ.105తో కూడిన పనులు కల్పించనున్నట్లు జైలు అధికారి ఒకరు వెల్లడించారు. తనకు పెన్‌, నోట్‌బుక్ ఇవ్వాలని జైలు అధికారులకు సంజయ్ రాయ్ అభ్యర్థన చేసుకున్నాడు. మరోవైపు.. సంజయ్ రాయ్‌కి ఇప్పటికే జైలు అధికారులు ఐదు దుప్పట్లు అందించారు. వీటికి అదనంగా మరో మూడు దుప్పట్లు కావాలని కోరాడు. దీనిపై జైలు అధికారులు ఇంకా ఎలాంటి నిర్ణయం తీసుకోలేదు. ఇక సంజయ్ రాయ్‌కి సెల్‌లో నడవడం, వ్యాయామం చేసుకునే వెసులుబాటు కల్పించారు.

గతేడాది ఆగస్ట్ నుంచి కోల్‌కతా ప్రెసిడెన్సీ సెంట్రల్ జైల్లో ఉంటున్న సంజయ్ రాయ్‌ని.. విచారణ సందర్భంగా కోర్టులో వర్చువల్‌గా, నేరుగా హాజరుపరిచే సమయంలో తప్ప మిగిలిన సమయం మొత్తం ఎప్పుడూ అతడ్ని సెల్‌లోనే ఉంచి తాళం వేసేవారు. ప్రస్తుతం ప్రెసిడెన్సీ సెంట్రల్ జైల్లో ఖైదీలు తోటపని, బట్టల తయారీ, ఫర్నిచర్, పఫ్డ్ రైస్, అల్యూమినియం పాత్రల తయారీ వంటి పనులు చేస్తున్నారు. వీరిలో నైపుణ్యం లేని వారికి రోజుకు రూ.105.. కొంత నైపుణ్యం ఉన్న వారికి రోజుకు రూ.120.. నైపుణ్యం కలిగిన కార్మికులకు రోజుకు రూ.135 వేతనం ఇస్తుంటారు.

ఇక ఈ రోజువారీ వేతనం అనేది సంబంధిత ఖైదీ ఖాతాలో జమ అవుతూ ఉంటాయి. ఆ డబ్బుతో జైలులో ఏవైనా వస్తువులు కొనుగోలు చేసేందుకు ఉపయోగించుకునే అవకాంశం ఉంటుంది. ఇక వారు శిక్ష కాలం పూర్తై.. జైలు నుంచి విడుదల అయినప్పుడు ఆ డబ్బును వారికి అందిస్తూ ఉంటారు. ఇక సంజయ్ రాయ్‌కి జైలులోని తోటలో పనిచేయించే అవకాశాలు ఉన్నాయని జైలు వర్గాల ద్వారా తెలుస్తోంది.

గతేడాది ఆగస్ట్ 9వ తేదీన కోల్‌కతాలోని ఆర్‌జీ కర్ మెడికల్ ఆస్పత్రిలోని జూనియర్ డాక్టర్‌పై అత్యంత దారుణంగా హత్యాచారం జరిగింది. ఈ ఘటన యావత్ దేశాన్ని తీవ్రంగా కుదిపేసింది. ఈ కేసులో సివిల్ వాలంటీర్ అయిన సంజయ్ రాయ్‌ని అరెస్ట్ చేసిన పోలీసులు ప్రధాన నిందితుడిగా చేర్చారు. తాజాగా సీల్దా కోర్టు కూడా సంజయ్ రాయ్‌ని దోషిగా తేల్చి జీవితఖైదు విధించింది. ఇక ఈ సీల్దా కోర్టు తీర్పుపై పశ్చిమ బెంగాల్‌లోని మమతా బెనర్జీ ప్రభుత్వం తీవ్ర అసంతృప్తి వ్యక్తం చేసింది. నిందితుడికి మరణశిక్ష విధించాలని డిమాండ్ చేసింది. ఈ మేరకు కలకత్తా హైకోర్టులో దీదీ సర్కార్ పిటిషన్ కూడా దాఖలు చేసింది.