భార్యతో అప్పుడు సెల్ఫీ.. మూల్యం చెల్లించుకున్న మావోయిస్ట్ అగ్రనేత చలపతి

మంగళవారం ఛత్తీస్‌గఢ్‌-ఒడిశా సరిహద్దుల్లోని గరియాబంద్‌ జిల్లా కుల్హాడీఘాట్‌ అటవీ ప్రాంతంలో జరిగిన ఎన్‌కౌంటర్‌లో మావోయిస్టు పార్టీ అగ్రనేత రామచంద్రారెడ్డి ప్రతాప్‌రెడ్డి అలియాస్‌ చలపతి అలియాస్‌ జయరాం(62) మృతి చెందాడు. దశాబ్దాలుగా మావోయిస్ట్ ఉద్యమంలో ఉంటూ.. అనేక దాడుల్లో కీలక పాత్ర పోషించిన చలపతిపై రూ.కోటి రివార్డు ఉంది. ఏపీలోని చిత్తూరు జిల్లా తవణంపల్లె మండలం ముత్యంపైపల్లెకు చెందిన జయరాం.. పోలీసులు హిట్ లిస్ట్‌లో ఉన్న మావోయిస్ట్ అగ్రనేతల్లో ఒకరు. పార్వతీపురంలో 1988లో పట్టుపరిశ్రమ శాఖలో ఫీల్డ్‌ ఫోర్‌మెన్‌గా చేరిన జయరాం.. తర్వాత రెండేళ్లకు 1990లో అజ్ఞాతంలోకి వెళ్లారు.

అప్పటి పీపుల్స్‌వార్ ఉద్యమంలో చేరి క్రమంగా కేంద్ర కమిటీ సభ్యుడి స్థాయికి ఎదిగారు. ఎక్కువకాలం ఆంధ్రా-ఒడిశా బోర్డర్‌లో పనిచేసిన ఆయన.. ప్రస్తుతం కేంద్ర కమిటీ సభ్యుడి హోదాలో ఒడిశా కమిటీకి మార్గనిర్దేశం చేస్తున్నారు. ఒడిశా, ఆంధ్రప్రదేశ్‌లలో అనేక దాడుల్లో పాల్గొన్నారు. 2018లో అరకు ఎమ్మెల్యే కిడారి సర్వేశ్వరరావు, మాజీ ఎమ్మెల్యే సివేరి సోమల హత్యలకు చలపతి నేతృత్వం వహించాడు

2017లో ఏపీ, ఒడిశా సరిహద్దుల్లోని సుంకి ఘాట్‌ వద్ద మందుపాతర పేలుడు, బలిమెలలో భద్రత బలగాలపై దాడి ఘటనలో ప్రత్యక్షంగా పాల్గొన్నాడు. 2003లో కొరాపూట్‌ జిల్లా పోలీసు కార్యాలయంపై దాడి చేసి ఆయుధాల్ని ఎత్తుకెళ్లిన ఘటనకు నాయకత్వం వహించాడు. అప్పుడు త్రుటిలో తప్పించుకున్నాడు. 13 మంది భద్రతా సిబ్బంది ప్రాణాలు తీసిన ఒడిశాలోని నయగఢ్ జిల్లాలో 2008 ఫిబ్రవరి నాటి దాడికి చలపతే మాస్టర్ మైండ్. ఈ ఘటన అనంతరం అతడ్ని మోస్ట్ వాంటెడ్ జాబితాలో చేర్చిన పోలీసులు.. ఆచూకీ చెప్పినవారికి రూ. కోటి నగదు బహుమతి ఇస్తామని ప్రకటించారు.

ఇక, చలపతి భార్య అరుణ అలియాస్‌ వెంకట రవి చైతన్య కూడా నక్సల్స్ ఉద్యమంలో ఉన్నారు. ప్రస్తుతం ఆమె ఏవోబీ ప్రత్యేక జోనల్‌ కమిటీ డిప్యూటీ కమాండర్‌గా పనిచేస్తున్నారు. కిడారి,, సివేరి సోమలను హతమార్చిన ఘటనలో ఆమె కూడా పాల్గొంది. విశాఖపట్నం జిల్లా పెందుర్తి మండలం కరకవానిపాలెం గ్రామానికి చెందిన అరుణకు ఉద్యమంలోనే చలపతితో పరిచయం ఏర్పడింది.

దశాబ్దాల నుంచి పోలీసులకు దొరక్కుండా తప్పించుకుంటోన్న చలపతి.. తన భార్య అరుణతో దిగిన సెల్ఫీతో దొరికిపోయాడు. మే 2016లో ఆంధ్రప్రదేశ్ సరిహద్దుల్లో జరిగిన ఎన్‌కౌంటర్‌ ప్రదేశంలో ఓ మొబైల్ ఫోన్ లభ్యం కాగా.. అందులో చలపతి, అరుణల సెల్ఫీ ఉంది. దీని ఆధారంగా అతడి ఆచూకీని తెలుసుకున్న భద్రతా బలగాలు.. అదునుచూసి దెబ్బతీశాయి. గరియాబంద్‌ జిల్లాలో మంగళవారం జరిగిన ఎన్‌కౌంటర్‌లో మొత్తం 24 మంది చనిపోయినట్లు తెలుస్తోంది. ఇప్పటివరకు 15 మంది మృతదేహాలను భద్రతా బలగాలు స్వాధీనం చేసుకున్నాయి. మృతుల్లో 8 మందిని గుర్తించారు. వారిలో చలపతి, ఒడిశాలో మావోయిస్టు పార్టీ కీలక నేత మనోజ్, స్పెషల్‌ జోనల్‌ కమిటీ(ఎస్‌జడ్‌సీ) సభ్యుడు గుడ్డూ ఉన్నారు. ఇద్దరు మహిళా మావోయిస్టులు కూడా ఉన్నట్టు అధికారులు తెలిపారు.