ప్రియుడితో పెళ్లి చేస్తారా? లేక దూకేయమంటారా?: వాటర్ ట్యాంక్ ఎక్కి యువతి రచ్చ

ప్రేమించిన వాళ్లను పెళ్లాడేందుకు ఎంతకైనా తెగిస్తుంటారు కొంతమంది అమ్మాయిలు, అబ్బాయిలు. ప్రాణాల మీదకు తెచ్చుకునైనా సరే ప్రేమను కాపాడుకోవాలని అనుకుంటారు. అది ఎప్పటికీ కుదరదని తెలిస్తే మాత్రం ప్రాణాలు తీసుకోవడానికైనా వెనుకాడరు. ఇలాగే ఏం చేసైనా సరే తన ప్రేమను కాపాడుకోవాలనుకుందో అమ్మాయి. ఈక్రమంలోనే ప్రియుడితో పెళ్లికి తల్లిదండ్రులను ఒప్పించేందుకు.. ఏకంగా వాటర్ ట్యాంకే ఎక్కేసింది. పెళ్లికి కుటుంబ సభ్యులు ఒప్పుకోకపోతే పైనుంచి దూకేస్తానంటూ హల్‌చల్ చేసింది. తల్లిదండ్రుల ఫిర్యాదుతో రంగంలోకి దిగిన పోలీసులు చివరకు ఏం చేశారో మనం ఇప్పుడు తెలుసుకుందాం.

ఉత్తర ప్రదేశ్‌లోని బుదౌన్ జిల్లా మూసాజాగ్ గ్రామానికి చెందిన ఓ 17 ఏళ్ల బాలికకు ఓ అక్క ఉంది. ఆమెకు గతంలోనే పెళ్లి కాగా.. అప్పుడప్పుడూ వారింటికెళ్లేది ఆ అమ్మాయి. ఈక్రమంలోనే అక్కడే అక్క మరిదిని చూసి ఇష్ట పడింది. అతడికి కూడా ఈ అమ్మాయి నచ్చగా వీరిద్దరూ ప్రేమలో పడ్డారు. చాలా కాలం పాటు ఎవరికీ తెలియకుండా చెట్టాపట్టాలేసుకుని తిరిగారు. ఈక్రమంలోనే ఎలాగైనా సరే కడ వరకూ కలిసే ఉండాలని నిర్ణయించుకున్నారు.

  అయితే ఇటీవలే వారి ప్రేమ విషయం కుటుంబ సభ్యులకు తెలిసింది. ముఖ్యంగా బాలిక తల్లిదండ్రులు ఈ విషయంపై చాలా తీవ్రంగా స్పందించారు. అతడిని మర్చిపోవాలంటూ కూతురుకు నచ్చజెప్పారు. ఈక్రమంలోనే బాలిక కూడా కచ్చితంగా బావనే పెళ్లి చేసుకుంటానని పట్టుబట్టింది. కానీ వాళ్లు మాత్రం అల్లుడి తమ్ముడితో రెండో కూతురు పెళ్లికి ఏమాత్రం ఒప్పుకోలేదు. ఎట్టి పరిస్థితుల్లోనే అతడితో నీ పెళ్లి చేయమంటూ కూతురికి తేల్చి చెప్పేశారు. అప్పటి నుంచి రోజూ బాలిక తల్లిదండ్రులను బతిమాలుతూనే ఉంది బాలిక.

వారి మనసు ఎంతకూ కరగకపోయేసరికి సదరు బాలిక.. గ్రామంలో ఉన్న వాటర్ ట్యాంక్ ఎక్కింది. బావతో పెళ్లికి కుటుంబ సభ్యులు ఒప్పుకోకపోతే ట్యాంక్ పైనుంచి దూకేస్తానంటూ బెదిరించింది. ఈక్రమంలోనే తల్లిదండ్రులు కిందకు దిగిరావాలంటూ బతిమాలారు. కానీ బాలిక మాత్రం పెళ్లికి ఒప్పుకుంటేనే వస్తానని పట్టుబట్టింది. ఏం చేయాలో పాలుపోని కుటుంబ సభ్యులు పోలీసులకు సమాచారం అందించారు. హుటాహుటిన రంగంలోకి దిగిన పోలీసులు.. బాలికను కిందకు దిగాలని చెప్పారు. మీ తల్లిదండ్రులను మేము ఒప్పిస్తామంటూ వివరించారు.

అయినా ఆమె వినకపోవడంతో.. పోలీసులే ట్యాంకు పైకి ఎక్కి బాలికను బలవంతంగా కిందకు తీసుకు వచ్చారు. ఆపై కుటుంబ సభ్యులతో పాటు బాలికకు కౌన్సిలింగ్ ఇచ్చారు. ఆమె ప్రేమ విషయం గురించి మరోసారి ఆలోచించమని తల్లిదండ్రులకు చెబుతూనే.. మరోసారి ఇలాంటి పని చేయకూడదని చిన్నారికి వివరించారు. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది.