61 ఏళ్ల వయసులో రెండో పెళ్లికి సిద్ధమైన జెఫ్ బెజోస్

ఇప్పటికే పెళ్లి అయి నలుగురు పిల్లలు ఉన్న ప్రపంచ రెండో ధనికుడు, అమెజాన్ వ్యవస్థాపకుడు 61 ఏళ్ల జెఫ్ బెజోస్ రెండో పెళ్లికి సిద్ధం అవుతున్నారు. ఆరేళ్ల క్రితం మొదటి భార్యకు విడాకులు ఇచ్చిన ఈయన.. ఇప్పటికే రెండు పెళ్లిళ్లు చేసుకుని ముగ్గురు పిల్లల్ని కన్న లారెన్ శాంచెజ్‌ను వివాహమాడబోతున్నారు. అసలు వీరిద్దరి మధ్య ప్రేమ ఎలా ప్రారంభం అయింది, ఈ విషయం ఎప్పుడు వెలుగులోకి వచ్చింది, ఎక్కడ, ఎప్పుడు పెళ్లి చేసుకోబోతున్నారో మనం ఇప్పుడు తెలుసుకుందాం.

61 ఏళ్ల వయసు కల్గిన అమెజాన్ వ్యవస్థాపకుడు జెఫ్ బెజోస్.. 1964 జనవరి 12వ తేదీన జన్మించారు. అయితే 1993లో మెకంజీ స్కాట్‌ను పెళ్లి చేసుకున్నారు. వీరిద్దరి అన్యోన్య దాంపత్యానికి ప్రతీకలుగా నలుగురు పిల్లలు కూడా పుట్టారు. 25 ఏళ్ల పాటు చాలా సంతోషంగా ఉన్న ఈ జంట.. ఎవరూ ఊహించని విధంగా 2019లో విడాకులు తీసుకుంది. ముఖ్యంగా జెఫ్ బెజోస్‌యే ఆమెకు విడాకులు ఇచ్చారు. వీరిద్దరి విడాకులకు ముందు నుంచే అంటే 2018 నుంచే జెబోస్.. 54 ఏళ్ల మహిళా జర్నలిస్ట్ లారెన్ శాంచెజ్‌తో డేటింగ్‌లో ఉన్నట్లు వార్తలు వచ్చాయి.

అప్పటికే లారెన్ శాంచెజ్‌కు రెండు సార్లు వివాహం జరిగింది. ముఖ్యంగా పాట్రిక్ వైట్ సెల్ అనే వ్యక్తితో తొలిసారి పెళ్లి జరగ్గా.. ఇద్దరు పిల్లలు పుట్టారు. ఆపై అతడికి విడాకులు ఇచ్చిన ఆమె మాజీ ఎన్ఎఫ్ఎల్ ఆటగాడు టోనీ గోంజెలెజ్‌ను మళ్లీ వివాహమాడారు. వీరిద్దరికి కూడా ఓ కుమారుడు జన్మించాడు. ఆ తర్వాతే జెఫ్ బెజోస్‌తో ఈమెకు స్నేహం ఏర్పడి.. అది కాస్తా ప్రేమగా మారింది. కానీ ఈ విషయాన్ని ఎవరూ అధికారికంగా ప్రకటించలేదు.

ముఖ్యంగా జెఫ్ బోజస్ తన భార్యతో 2019లో విడాకులు తీసుకొని.. ఆ తర్వాతే లారెన్ శాంచెజ్‌తో తాను డేటింగ్‌లో ఉన్నట్లు ప్రకటించారు. ఇక అప్పటి నుంచి వీరిద్దరి మధ్య బంధం అందరికీ తెలియగా.. 2023లో నిశ్చితార్థం చేసుకున్నారు. అదే ఏడాది జెఫ్ బెజోస్.. లారెన్‌ను ఫ్రాన్స్ వెకేషన్‌కు తీసుకెళ్లి ఓ విలాసవంతమైన నౌకలో 2.5 మిలియన్ డాలర్ల (భారత కరెన్సీ ప్రకారం దాదాపు రూ.21 కోట్ల) గులాబీ రంగు వజ్రాల ఉంగరం ఇచ్చి మరీ ప్రపోజ్ చేశారట. ఇందుకు సంబంధించి కూడా చాలానే వార్తలు వచ్చాయి.

అయితే నిశ్చితార్థం జరిగిన దాదాపు రెండేళ్ల తర్వాత ఈ జంట పెళ్లి బంధంలోకి అడుగు పెట్టబోతుంది. ముఖ్యంగా ఇటలీలోని వెనిస్ వేదికగా వీరి వివాహం జరగబోతున్నట్లు సమాచారం. అది కూడా బెజోస్‌కు చెందిన 500 మిలియన్ డాలర్ల విలువ చేసే విలాసవంతమైన నౌకలో.. జూన్ నెలలో వీరి పెళ్లి వేడుకలు జరగబోతున్నట్లు సన్నిహత వర్గాలు వివరిస్తున్నాయి. చూడాలి మరి వీరి వివాహం ఎంత ఘనంగా జరగబోతుందనేది.