హెచ్ 1బీ వీసాదారులు అమెరికాను వీడొద్దు

అమెరికా వీసాలు, ఇమ్మిగ్రేషన్ విషయంలో కఠిన నిర్ణయాలు తీసుకుని అమలు చేస్తున్న అధ్యక్షుడు డొనాల్డ్ ట్రంప్.. రోజురోజుకూ ఆ దేశంలో ఉన్న వలసదారులకు కంటి మీద కునుకు లేకుండా చేస్తున్నారు. వీసా నిబంధనలు కఠినతరం చేయడమే కాకుండా బర్త్ రైట్ సిటిజన్‌షిప్‌ను రద్దు చేసిన నేపథ్యంలో భవిష్యత్‌లో ఇంకా ఎలాంటి నిర్ణయాలు తీసుకుంటారో అని అమెరికాలోని వలసదారులు తీవ్ర ఆందోళన చెందుతున్నారు. ఈ నేపథ్యంలోనే హెచ్ 1బీ వీసాదారులకు టెక్ దిగ్గజాలు కీలక సూచనలు చేస్తున్నాయి. అమెరికాలో ట్రంప్ కఠిన వీసా నిబంధనలు అమలు చేస్తున్న వేళ.. హెచ్‌1బీ వీసాదారులు అలర్ట్‌గా ఉండాలని హితవు పలికాయి.

ఇమ్మిగ్రేషన్‌ పాలసీ విషయంలో డొనాల్డ్ ట్రంప్ ఎప్పుడు ఎలాంటి నిర్ణయం తీసుకుంటారోనన్న గందరగోళం వలసదారుల గుండెల్లో రైళ్లు పరిగెత్తేలా చేస్తోంది. ఈ సమయంలోనే టెక్ దిగ్గజాలైన మైక్రోసాఫ్ట్‌, గూగుల్, అమెజాన్ సహా పలు సంస్థలు హెచ్‌ 1బీ వీసాదారులను అలర్ట్ చేసినట్లు ఇంటర్నేషనల్ మీడియా వెల్లడిస్తోంది. హెచ్ 1బీ వీసాదారులు అమెరికాను వీడొద్దని హితవు పలికాయి. హెచ్ 1బీ వీసాదారులు ఒకసారి అమెరికా వీడి వెళ్తే.. మళ్లీ తిరిగి వెనక్కి రావడానికి అనుమతి ఉంటుందో లేదోననే ఆందోళనల మధ్య ఈ హెచ్చరికలు చేశాయి.

  ప్రస్తుతం నెలకొన్న భయాల నేపథ్యంలో భారత పర్యటనను కొన్నిరోజులు వాయిదా వేసుకున్నట్లు అమెరికాలో నివసిస్తున్న ఇద్దరు భారతీయులు ఇటీవల మీడియాకు చెప్పడం అక్కడి పరిస్థితి ఎలా ఉందో చెబుతోంది. మరోవైపు.. అమెరికాలో బర్త్ రైట్ సిటిజన్‌షిప్‌ను రద్దు చేయాలని ట్రంప్ తీసుకున్న నిర్ణయంపైనా ఒక భారత ఉద్యోగి తీవ్ర ఆందోళన వ్యక్తం చేశారు. ఈ నిర్ణయం అమల్లోకి వస్తే.. భవిష్యత్‌లో అమెరికాలో పుట్టే పిల్లలకు ఏ దేశం పౌరసత్వం లేకుండా పోతుందని ఆవేదన వ్యక్తం చేశారు. అమెరికా పౌరులు కాని వారు ఆ దేశంలో చట్టవిరుద్ధంగా ఉంటున్నారనే భావన ఉందని ఇంకొకరు వెల్లడించారు. ఇలాంటి పరిణామాలు జరుగుతున్న వేళ.. ఎక్కడికి వెళ్లినా పాస్‌పోర్ట్, వీసా సహా సంబంధిత పత్రాలను తమ వెంట తీసుకెళ్తున్నట్లు మరికొందరు పేర్కొన్నారు.

హెచ్‌-1బీ, ఎఫ్‌-1, గ్రీన్‌కార్డు కలిగిన భారతీయులు తమ ప్రయాణాల్లో అలర్ట్‌గా ఉండాలని.. ఇటీవల అమెరికా వలస విభాగం అధికారులు కీలక అడ్వైజరీ జారీ చేశారు. అమెరికాకు వచ్చేటపుడు, బయటికి వెళ్లేటపుడు తనిఖీలు మరింత ఎక్కువగా ఉంటాయని.. అందుకు ఓపిగ్గా ఉండాలని సూచించారు. విదేశాల్లో ఎక్కువ కాలం ఉండి అమెరికాకు తిరిగి వచ్చే వలసదారులు కస్టమ్స్, బోర్డర్‌ అధికారులు అడిగే ప్రశ్నలకు సమాధానాలు ఇవ్వాల్సి ఉంటుందని పేర్కొన్నారు. వలసదారులంతా తమ స్వదేశీ పాస్‌పోర్టుతో పాటు సంబంధిత పత్రాలన్నీ ఎప్పుడూ వెంట ఉంచుకోవాలని తెలిపారు. గ్రీన్‌కార్డు, వీసా, రీఎంట్రీ పర్మిట్, ఎంప్లాయ్‌మెంట్‌ వెరిఫికేషన్‌ లెటర్, ఫెడరల్‌ ఇన్‌కమ్‌ ట్యాక్స్‌ చెల్లింపులు, పే స్లిప్‌లు సరిగ్గా ఉన్నయో లేవో చూసుకోవాలని హితవు పలికారు. ఇక స్టూడెంట్స్ అయితే కాలేజీ, యూనివర్సిటీ ఇచ్చిన అనుమతి పత్రంతోపాటు, యూఎస్‌ బ్యాంకు అకౌంట్ వివరాలు చూపించాలని పేర్కొన్నారు.