తుర్కియేలో చిక్కుకుపోయిన 200 మంది భారతీయులు

లండన్ నుంచి ముంబయికి రావాల్సిన ఓ విమానాన్ని అత్యవసరంగా ల్యాండింగ్ చేయాల్సి వచ్చింది. దీంతో తుర్కియేలోని ఓ మారుమూల ప్రాంతంలో పైలెట్లు విమానాన్ని దింపారు. బుధవారం రోజు రాత్రి ఈ ఘటన చోటు చేసుకోగా.. 200 మందికి పైగా భారతీయ ప్రయాణికులు అక్కడే చిక్కుకుపోయినట్లు తెలుస్తోంది. మారుమూల ప్రాంతం కావడంతో ఎలాంటి సౌకర్యాలు లేవని.. ఇప్పటికే తాము అక్కడ దిగి 20 గంటలు అవుతుందని ప్రయాణికులు ఆవేదన వ్యక్తం చేస్తున్నారు. వెంటనే విమానయాన సంస్థ స్పందించి తమను గమ్యస్థానాలకు చేర్చాలని కోరుతున్నారు. ఆ పూర్తి వివరాలు మీకోసం.

లండన్ నుంచి వర్జిన్ అట్లాంటిక్ విమానం ముంబయికి బయలు దేరింది. మార్గమధ్యంలో తుర్కియే వరకు రాగానే అత్యవసరంగా ల్యాండ్ కావాల్సి వచ్చింది. మెడికల్ ఎమర్జెన్సీ వల్లే తుర్కియేలోని మారుమూల ప్రాంతంలో ఉన్న దియార్‌బకిర్‌ విమానాశ్రయంలో ల్యాండ్ చేసినట్లు ప్రయాణికులు చెబుతున్నారు. అయితే విమానం ల్యాండ్ అయ్యే సమయంలో సాంకేతిక సమస్య తలెత్తిందని విమాన సిబ్బంది తమతో చెప్పినట్లు ప్రయాణికులు వెల్లడించారు.

సాంకేతిక సమస్య పరిష్కారం కాకపోవడంతో బుధవారం రాత్రి నుంచి అంటే దాదాపు 20 గంటలుగా ప్రయాణికులు అక్కడే చిక్కుకుపోయారు. సదరు విమానంలో 200 మందికిపైగా భారతీయ ప్రయాణికులు ఉన్నట్లు తెలుస్తోంది. ప్రయాణికుల సంఖ్యపై, వారు ఎప్పుడు అక్కడి నుంచి బయల్దేరుతారు అనే దానిపై అధికారుల్లోనూ సరైన సమాచారం లేదు. విమానంలో తలెత్తిన సాంకేతిక సమస్య పరిష్కారం అయ్యాక అక్కడి నుంచి బయల్దేరే అవకాశాలు ఉన్నాయి. అది ఎప్పుడు పరిష్కారమవుతుందనే దానిపై స్పష్టత లేదు.

మరో విమానం ఏర్పాటు చేసి ప్రయాణికులను తరలించే ఏర్పాట్లపై సదరు విమానయాన సంస్థ నుంచి ఇప్పటి వరకు ఎలాంటి ప్రకటన రాలేదు. అయితే ప్రయాణికులకు సౌకర్యాలు లేకపోవడంతో పాటు, విమానంలో తలెత్తిన సాంకేతిక సమస్యను పరిష్కరించేందుకు కూడా కావాల్సిన సాంకేతికపరమైన సౌకర్యాలు ఆ విమానాశ్రయంలో లేవని ఓ ప్రయాణికుడు వెల్లడించారు. సాధ్యమైనంత వేగంగా సమస్యను పరిష్కరించి లేదా ఇతర ఏర్పాట్లు చేసి తమను తరలించాలని కోరుతున్నారు. తుర్కియే దియార్‌బకిర్‌ ఎయిర్‌పోర్టులో మిలిటరీ బేస్ కావడంతో కనీసం బయటకు కూడా వెళ్లనివ్వడం లేదని వాపోతున్నారు.