మామిడి పండును తినకూడదు, ఎంత దూరంగా ఉంటే అంత మంచిది

వేసవి కాలం ప్రారంభమైంది. ఎండల సంగతి పక్కన పెడితే ఈ సీజన్ చాలా మందికి ఇష్టం. ఎందుకంటే ఈ సీజన్‌లో నోరూరించే మామిడి పండు దొరుకుతుంది. మండే ఎండల్లో మామిడి పండును తినడానికి చాలా మంది ఇష్టపడతారు. నోటికి రుచిగా, తీపిగా ఉండే మామిడి పండును చిన్న, పెద్దా తేడా లేకుండా అందరూ లాగించేస్తారు. అందుకే మామిడి పండును పండ్లలో రారాజు అని పిలుస్తారు. మామిడి పండును కొందరు డైరెక్ట్‌గా తింటే.. మరికొందరు జ్యూసులు, స్మూతీల రూపంలో తీసుకుంటారు. మామిడి పండు తినడం వల్ల ఆరోగ్యానికి ఎంతో మేలు జరుగుతుంది. అయితే, కొన్ని ఆరోగ్య సమస్యలతో బాధపడేవారు మామిడి పండును ఎట్టి పరిస్థితుల్లో కూడా తినకూడదు. మామిడి పండును ఎవరు తినకూడదో ఇక్కడ తెలుసుకుందాం.

మామిడి పండుతో ఆరోగ్య ప్రయోజనాలు

​మామిడిలో ఫైబర్, విటమిన్ ఎ, విటమిన్ సి, మాంగిఫెరిన్ అనే యాంటీఆక్సిడెంట్, పొటాషియంతో పాటు ఇతర పోషకాలు మెండుగా ఉన్నాయి. మామిడి పండు తినడం వల్ల కంటి ఆరోగ్యం మెరుగుపడుతుంది. ఇందులో ఉండే విటమిన్ సి కారణంగా రోగనిరోధక శక్తి మెరుగుపడుతుంది. మామిడి పండులో ఫైబర్ కడుపు ఆరోగ్యానికి చాలా మంచిది. రెగ్యులర్‌గా మామిడి పండు తినడం వల్ల చెడు కొలెస్ట్రాల్ తగ్గుతుంది. మామిడి పండ్లలో మాంగిఫెరిన్ అనే యాంటీఆక్సిడెంట్ క్యాన్సర్ నిరోధక లక్షణాల్ని కలిగి ఉంటుంది. మామిడి పండ్లు గుండె ఆరోగ్యానికి మేలు చేసే పొటాషియం యొక్క మంచి మూలం. ఇలా చెప్పుకుంటే పోతే మామిడి పండు తినడం వల్ల చాలా మేలు జరుగుతుంది. అయితే, కొందరు మాత్రం వీటికి దూరంగా ఉండాలి. వాళ్లు ఎవరంటే

చర్మ అలెర్జీలు

మామిడి పండులో ఉరుషియోల్ అనే రసాయనం ఉంటుంది. మామిడి తినడం వల్ల ఈ రసాయనానికి సున్నితంగా ఉండే వ్యక్తులలో చర్మ అలెర్జీలు వస్తాయి. ముఖ్యంగా చర్మం మంటగా మారి పొరలుగా, దురద, బొబ్బలు వంటి సమస్యలు వస్తాయి. అందుకే ఇప్పటికే చర్మ అలెర్జీ సమస్యలతో బాధపడేవారు మామిడి పండుకు దూరంగా ఉండాలి. ఇలాంటి వారు మామిడి పండు తినడం వల్ల జ్వరం లేదా దద్దుర్లు కూడా వచ్చే అవకాశం ఉంది. అందుకే చర్మ సంబంధిత సమస్యలతో బాధపడేవారు మామిడి పండుకి దూరంగా ఉండటమే మేలు అంటున్నారు నిపుణులు.

ఊబకాయం బాధితులు

మామిడి తినడానికి ఎంత రుచికరంగా ఉన్నా, అది ఊబకాయాన్ని పెంచుతుంది. నిజానికి, మామిడి పండులో చాలా ఎక్కువ కేలరీలు ఉంటాయి. సగటు పరిమాణంలో ఉన్న మామిడిలో 150 కేలరీలు ఉంటాయి. అందుకే మామిడి పండు ఎక్కువగా తినడం వల్ల బరువు పెరిగే ప్రమాదం ఉంది. అందుకే ఇప్పటికే బరువు తగ్గాలనుకునేవారు మామిడి పండ్లు ఎక్కువ మోతాదులో తినడం మానుకోవాలి. ఇప్పటికే ఊబకాయంతో బాధపడుతున్నవారు మామిడిని తక్కువ మోతాదులో తినాలి. చిన్న సైజులో ఉన్న మామిడి తింటే సరిపోతుంది.

జీర్ణ సమస్యలు

ఈ రోజుల్లో చాలా మంది గ్యాస్, ఎసిడిటీ, కడుపు ఉబ్బరం, అజీర్తి వంటి జీర్ణ సమస్యలతో బాధపడుతున్నారు. అలాంటి వారు మామిడి పండును ఎక్కువ తినడం హానికరం. మామిడి తినడం వల్ల జీర్ణక్రియ పాడయ్యే అవకాశం ఉంది. ఇలాంటి వారు మామిడి పండుకు దూరంగా ఉండాలి. కడుపు సమస్యలు ఉన్నవారు లేదా పేగు ఆరోగ్యం బలహీనంగా ఉన్నవారు మామిడి తినకుండా ఉండాలి. లేకపోతే అది అజీర్ణం, అజీర్తి, వాంతులు, వికారం, మలబద్ధకానికి కారణమవుతుంది. ఇది కాకుండా, కొన్నిసార్లు మామిడి పండ్లను ఎక్కువగా తినడం వల్ల కడుపు ఇన్ఫెక్షన్ కూడా రావచ్చు.

డయాబెటిస్ రోగులు

మధుమేహ వ్యాధిగ్రస్తులు మామిడి తినకుండా ఉండాలి. ఎందుకంటే మామిడి పండు అధిక గ్లైసెమిక్ ఇండెక్స్ కలిగి ఉంటుంది. ఇది రక్తంలో చక్కెర పెరుగుదలకు కారణమవుతుంది. దీంతో పాటు మామిడి పండులో అధిక మొత్తంలో సహజ చక్కెర ఉంటుంది. ఇది రక్తంలో చక్కెర స్థాయిని వేగంగా పెంచుతుంది. కాబట్టి, డయాబెటిస్ ఉన్న రోగులు మామిడి పండు తినకుండా ఉండాలి. లేకపోతే, ఇది వారి రక్తంలో చక్కెర స్థాయిని పెంచడం ద్వారా మధుమేహం అసమతుల్యతకు కారణమవుతుంది. ఒకవేళ మీకు తినాలనిపిస్తే వైద్యుణ్ని సంప్రదించి తగిన సలహా తీసుకోవడం చాలా ముఖ్యం.

లేటెక్స్ అలెర్జీ ఉన్న వ్యక్తులు

మీకు లేటెక్స్ అలెర్జీ ఉంటే జాగ్రత్తగా ఉండండి. మామిడి పండ్లలో లభించే ప్రోటీన్లు లేటెక్స్‌లో ఉండే ప్రోటీన్‌లను పోలి ఉంటాయి. దీంతో మామిడి పండు లేటెక్స్ అలెర్జీ బాధపడేవారికి ముప్పు. ఇలాంటి వారి శరీరం లేటెక్స్ అలెర్జీ కారకంగా స్పందించవచ్చు. దీంతో శరీరంలోని వివిధ భాగాలలో నీటి దద్దుర్లు కనిపించవచ్చు. అందుకే లేటెక్స్ అలెర్జీతో బాధపడేవారు మామిడి పండుకు దూరంగా ఉండాలి.