హెచ్సీఏ లీగ్ క్వార్టర్ ఫైనల్లో 50 పరుగులు చేసిన సీనియర్ ఐపీఎస్ అధికారి
Andhra Pradesh Telugu | Suryaa Desk | Published : Mon, Jan 12, 2026, 07:45 PM
సీనియర్ ఐపీఎస్ అధికారి సీవీ ఆనంద్ 57 ఏళ్ల వయసులోనూ తన ఫిట్నెస్తో అందరినీ ఆశ్చర్యపరిచారు. హైదరాబాద్ క్రికెట్ అసోసియేషన్ వన్డే లీగ్ ఛాంపియన్షిప్ క్వార్టర్ ఫైనల్ మ్యాచ్లో ఆయన ఓపెనర్గా బరిలోకి దిగి హాఫ్ సెంచరీ సాధించి యువతకు ఆదర్శంగా నిలిచారు.ఇద్దరు యువ ఫిట్నెస్ ట్రైనర్లు కార్తీక్, మహాదేవ్ తన ఫిట్నెస్ దినచర్య గురించి తెలుసుకోవడానికి అపాయింట్మెంట్ అడగగా, సీవీ ఆనంద్ వారిని నేరుగా సికింద్రాబాద్లోని జింఖానా గ్రౌండ్స్కు ఆహ్వానించారు. అక్కడ విక్టరీ జట్టుతో జరుగుతున్న మ్యాచ్లో తన ఫిట్ నెస్ లెవల్స్ ను ప్రత్యక్షంగా చూపించారు. మ్యాచ్కు ముందు ఆయన వార్మప్ చేయడం, బ్యాటింగ్ ప్రాక్టీస్, ఆ తర్వాత ఓపెనర్గా బరిలోకి దిగి అర్ధ శతకం పూర్తి చేయడం వరకు వారు వీడియో తీశారు. ఈ వీడియోను కోచ్ కార్తీక్ తన ఇన్స్టాగ్రామ్లో పోస్ట్ చేయడంతో అది వైరల్గా మారింది.1991 బ్యాచ్కు చెందిన ఐపీఎస్ అధికారి అయిన ఆనంద్, గతంలో హైదరాబాద్ పోలీస్ కమిషనర్గా సుదీర్ఘకాలం పనిచేశారు. వృత్తిపరమైన ఒత్తిడిని అధిగమించడానికి ఆయన మొదటి నుంచి క్రీడలను తన జీవితంలో భాగంగా చేసుకున్నారు. క్రికెట్, టెన్నిస్, గోల్ఫ్లతో పాటు యోగా, ప్రాణాయామం వంటివి తనను శారీరకంగా, మానసికంగా దృఢంగా ఉంచుతాయని గతంలో ఓ ఇంటర్వ్యూలో పేర్కొన్నారు.తాజాగా వైరల్ అయిన వీడియోలో, మ్యాచ్కు ముందు ఆయన జాగింగ్, స్ట్రెచింగ్, ఆర్మ్ రొటేషన్స్ వంటి వ్యాయామాలు చేయడం కనిపించింది. "ఏ ఆట ఆడే ముందైనా తప్పనిసరిగా వార్మప్ చేయాలి. లేకపోతే గాయాల బారిన పడతాం అని ఆయన స్పష్టం చేశారు. ఆట తర్వాత కూడా కండరాల రికవరీ కోసం స్ట్రెచింగ్ అవసరమని తెలిపారు.ఈ పోస్ట్పై సోషల్ మీడియాలో ప్రశంసల వర్షం కురుస్తోంది.ఈ వయసులో మీ ఫిట్నెస్ అద్భుతం. మీరు ఎందరికో ఆదర్శం అని ఒక నెటిజన్ కామెంట్ చేయగా, వయసుతో సంబంధం లేకుండా కేవలం ప్రదర్శన, ఫిట్నెస్ ఆధారంగా బీసీసీఐ మిమ్మల్ని జట్టులోకి తీసుకోవాలి అని మరొకరు సరదాగా వ్యాఖ్యానించారు. ప్రస్తుతం తెలంగాణ హోం శాఖ ప్రత్యేక ప్రధాన కార్యదర్శిగా పనిచేస్తున్న సీవీ ఆనంద్, ఉన్నత స్థాయిలో ఉన్నప్పటికీ ఫిట్నెస్, వర్క్-లైఫ్ బ్యాలెన్స్ విషయంలో ఎందరికో స్ఫూర్తిగా నిలుస్తున్నారు.
|
|