భర్త వద్దు.. ప్రియుడే కావాలి.. పోలీస్ స్టేషన్ మెట్లెక్కిన మహిళ

భర్త వద్దు.. ప్రియుడే ముద్దు అంటూ ఓ యువతి పోలీసులను ఆశ్రయించిన ఘటన కాకినాడ జిల్లాలో చోటుచేసుకుంది. బాధితురాలు చెప్తున్న వివరాల ప్రకారం.. కాకినాడ జిల్లా ప్రత్తిపాడు మండలానికి చెందిన ఓ యువతికి 2025లో వివాహం జరిగింది. అన్నవరం దేవస్థానంలో నవంబర్‌ 28న ఓ వ్యక్తితో యువతికి వివాహం జరిగింది. ముందుగా అనుకున్న ప్రకారం యువతి కుటుంబసభ్యులు.. అల్లుడికి కట్నకానుకలు ఇచ్చి ఘనంగా వివాహం జరిపించారు. అయితే పెళ్లికి ముందే ఈ యువతి.. పాడేరుకు చెందిన ఓ యువకుణ్ని ప్రేమించింది. అయితే ఈ విషయం యువతి తల్లిదండ్రులకు తెలిసిపోయింది. దీంతో మరో యువకుడితో ఆమెకు వివాహం జరిపించారు. అయితే పెళ్లి జరిగిన తర్వాత భర్తకు ఈ విషయం తెలిసిపోయింది. సదరు యువతే భర్తకు ఈ విషయాన్ని తెలియజేసింది.

దీంతో తనను మోసం చేసి పెళ్లి చేశారంటూ భర్త.. ఆమెను మానసికంగా, శారీరకంగా వేధించడం మొదలుపెట్టాడు. భర్త వేధింపులు భరించలేకపోయిన యువతి అత్తారిల్లు వదిలేసి వచ్చింది. అయితే యువతి తల్లిదండ్రులు ఆమెకు సర్దిచెప్పి మళ్లీ అత్తింటికి తీసుకువచ్చారు. భార్యభర్తలకు సర్ధిచెప్పి కాపురానికి పంపించారు. అయితే భర్త తనను మళ్లీ వేధింపులకు గురిచేస్తున్నాడని యువతి ఆరోపిస్తోంది. బలవంతంగా లొంగదీసుకోవాలని చూస్తున్నాడని.. మంగళసూత్రంతోనే చంపాలని చూశాడని ఆరోపిస్తోంది. తుని రైల్వేస్టేషన్‌ వద్ద చంపేందుకు చూశాడని ఆరోపణలు చేసింది. ఈ మేరకు పోలీసులకు ఫిర్యాదు చేసింది.

ఈ క్రమంలోనే నిత్యం వేధించే భర్త తనకు వద్దని.. అతనంటే తనకు ఇష్టం లేదంటోంది యువతి. ప్రేమించిన యువకుడితోనే కలిసి ఉంటానంటోంది. గురువారం రోజున ప్రత్తిపాడు పోలీస్ స్టేషన్‌కు వెళ్లిన యువతి.. కుటుంబసభ్యులు తనకు ఇష్టం లేని పెళ్లి చేశారని ఆరోపించింది. భర్తపైనా, కుటుంబసభ్యులపైనా పోలీసులకు ఫిర్యాదు చేసింది. ఇష్టం లేని భర్త వద్దని.. ప్రేమించిని ప్రియుడే కావాలని చెప్తోంది. హోం మంత్రి వంగలపూడి అనిత స్పందించి.. సాటి మహిళగా తనకు న్యాయం చేయాలని కోరింది. మరి దీనిపై పోలీసులు ఎలాంటి చర్యలు తీసుకుంటారనేదీ చూడాల్సి ఉంది.