భారతీయులకు గ్రీన్ కార్డ్‌ జారీలో జాపాన్ని పరిష్కరించండి.. బైడెన్‌కు అమెరికా చట్టసభ్యులు విజ్ఞ‌ప్తి

భారతీయులకు గ్రీన్ కార్డుల జారీలో 195 ఏళ్ల నిరీక్షణ, జాప్యాన్ని తగ్గించే ప్రాధాన్యత తేదీలను మార్చేలా కార్యనిర్వహాక నిర్ణయం తీసుకోవాలని అధ్యక్షుడు జో బైడెన్, ఆయన అధికార యంత్రాగాన్ని అమెరికా చట్టసభ సభ్యుల బృందం కోరింది. ఉన్నత నైపుణ్యం కలిగిన ఉద్యోగ-ఆధారిత వీసాదారులకు ఉపశమనం కలిగించేలా నిర్ణయం తీసుకోవాలని కాంగ్రెస్ సభ్యులు రాజా కృష్ణమూర్తి, లారీ బుక్‌సన్ నేతృత్వంలోని 56 మంది చట్టసభ సభ్యుల ద్వైపాక్షిక బృందం విదేశాంగ కార్యదర్శి ఆంటోనీ బ్లింకేన్, డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ సెక్రటరీ అలెజాండ్రో మేయోర్కాస్‌లను అభ్యర్థించారు.

బ్యూరో ఆఫ్ కాన్సులర్ అఫైర్స్ ప్రచురించిన ఎంప్లాయ్‌మెంట్-బేస్డ్ వీసా బులెటిన్‌లో ఉపాధి ఆధారిత వీసా దరఖాస్తులను దాఖలు చేయడానికి అన్ని తేదీలను ‘ప్రస్తుతం’గా గుర్తించాలని వారు తమ లేఖలో విజ్ఞప్తి చేశారు. గ్రీన్ కార్డ్ జారీ అంటే అధికారికంగా అమెరికా శాశ్వత నివాసిగా గుర్తించడం. అమెరికాకు వలసవచ్చిన విదేశీ పౌరులకు అక్కడ శాశ్వతంగా నివసించే అధికారాన్ని మంజూరు చేయడం.

ఉపాధి ఆధారిత గ్రీన్ కార్డ్ కేటాయింపుల విషయంలో 7 శాతం కోటా విధానంతో అసాధారణ జాప్యం చోటుచేసుకుంటుంది. ముఖ్యంగా భారత్ వంటి దేశాల నుంచి వచ్చిన విదేశీయులకు తీవ్ర ఇబ్బందులకు కారణమవుతోంది. ఈ జాప్యం 195 ఏళ్ల వెనక్కి చేరుకుందని ఫౌండేషన్ ఫర్ ఇండియా అండ్ ఇండియన్ డయాస్పోరా స్టడీస్ ప్రత్యేకంగా జో బైడెన్‌కు ఇచ్చిన వినతిపత్రంలో తెలిపింది.

ఏది ఏమైనప్పటికీ ఈ వెనుకబాటుతనం ప్రతిభావంతులైన వ్యక్తులు దేశం అభివృద్ధి, ఆవిష్కరణలకు అర్థవంతంగా సహకరించకుండా అడ్డుకుని ముఖ్యమైన అవరోధాన్ని సృష్టించిందని ఎఫ్ఐఐడీఎస్ పేర్కొంది. వలస వచ్చిన భారతీయ సమాజం ముఖ్యంగా గ్రీన్ కార్డ్, హెచ్-1బీ వీసాలకు సంబంధించిన ఇబ్బందులను పరిష్కరించడంలో ఎఫ్ఐఐడీఎస్ అనేక ప్రయత్నాలు చేసింది.

‘గ్రీన్ కార్డ్ ప్రాసెసింగ్‌లో భారతీయ హెచ్-1బీ వీసాదారులకు ఉపశమనం కలిగించడానికి మేము ప్రయత్నాలు ప్రారంభించాం.. ప్రతినిధులు, అనేక ఇతర సంస్థలు, ప్రభావశీలులను సంప్రదిస్తున్నాం... మేము ప్రభుత్వంలోని బ్యూరో ఆఫ్ కాన్సులర్ సర్వీసెస్‌ను సంప్రదిస్తున్నాం... డిపార్ట్‌మెంట్‌తో పాటు డీహెచ్‌ఎస్‌లోని యుఎస్‌సీఐఎస్ కూడా గ్రీన్ కార్డ్ దరఖాస్తుదారులకు ప్రస్తుత ప్రాధాన్యతా తేదీలను అమలు చేయడానికి పరిపాలనాపరమైన చర్యలు తీసుకుంటాయి’ అని ఎఫ్ఐఐడీఎస్ కు  చెందిన ఖండేరావ్ కాండ్ చెప్పారు.

హెచ్-1బీ వీసా అనేది వలసేతర వీసా. ఇది అమెరికా కంపెనీలు నైపుణ్యం, ప్రతిభావంతులైన విదేశీ ఉద్యోగులను నియమించుకోవడానికి అనుమతిస్తుంది. భారత్, చైనా వంటి దేశాల నుంచి ఏటా పదివేల మంది ఉద్యోగులను నియమించుకోవడానికి టెక్ సంస్థలు ఈ వీసాపై ఆధారపడతాయి. చట్టసభ సభ్యులు తమ లేఖలో అన్ని తేదీలను ప్రస్తుతంగా గుర్తించడం వల్ల దరఖాస్తుదారుల దేశ-ఆధారిత ప్రాధాన్యత తేదీతో సంబంధం లేకుండా ఉపాధి ఆధారిత దరఖాస్తుల దాఖలుకు అనుమతించాలని కోరారు.

ఇది అమెరికా ఇమ్మిగ్రేషన్ వ్యవస్థను చట్టబద్ధంగా నావిగేట్ చేయడానికి ప్రయత్నిస్తున్న వేలాది మంది వ్యక్తులకు ఉపశమనం కలిగిస్తుంది. ఉద్యోగాల మార్పు, వ్యాపారాలు ప్రారంభించడానికి, ఎటువంటి జరిమానాలు లేకుండా కుటుంబాలను కలుసుకోవడానికి, విదేశాలకు వెళ్లడానికి ఉపాధి అధికార పత్రాల కోసం కొంత మందిని అర్హులుగా మార్చగలదని పేర్కొంది.