వెబ్ సిరీస్‌పై నెట్‌ఫిక్స్‌కు కేంద్రం సమన్లు.. ఏంటీ ‘కాందహార్ హైజాక్’ వివాదం

‘ఐసీ 814: ది కాందహార్ హైజాక్’ వెబ్‌ సిరీస్‌‌ వివాదానికి కేంద్ర బిందువుగా మారింది. దీనిపై కేంద్ర ప్రభుత్వం సీరియస్‌గా స్పందించింది. ఓటీటీ సంస్థ నెట్‌ఫ్లిక్స్‌కు సమన్లు జారీ చేసింది. సిరీస్‌లో చూపించిన వివాదాస్పద అంశాలపై వివరణ ఇవ్వాలని కేంద్ర సమాచార ప్రసార శాఖ ఆదేశించింది. అయితే, ఇంతకీ ఏంటీ వివాదం? ఎందుకు కేంద్రం అంత తీవ్రంగా పరిగణించింది? రాజకీయంగా ఎందుకు విమర్శలు ఎదురవుతున్నాయి? అనేది ప్రస్తుతం చర్చనీయాంశంగా మారింది. దీని గురించి పూర్తిగా తెలియాలంటే 1999 డిసెంబరు 24న జరిగిన ఎయిరిండియా విమానం హైజాక్ గురించి ముందు తెలియాల్సి.

ఇండియన్ ఎయిర్‌లైన్స్‌కు చెందిన ఐసీ 814‌ విమానాన్ని పాకిస్థాన్‌కు చెందిన హర్కతుల్ ముజాయిద్దీన్ సంస్థ ఉగ్రవాదులు 1999 డిసెంబరు 24న హైజాక్ చేశారు. నేపాల్ రాజధాని ఖాట్మాండు నుంచి ఢిల్లీకి 154 మంది ప్రయాణికులతో బయలుదేరిన విమానం టేకాఫ్ అయిన 40 నిమిషాల్లో హైజాక్‌కు గురయ్యింది. భారత్ జైల్లో ఉన్న తమ అనుచరులను విడిపించుకోడానికి విమానాన్ని హైజాక్ చేసిన తీవ్రవాదులు.. దానిని అప్పటికి తాలిబన్ల ఏలుబడిలో ఉన్న అఫ్గనిస్థాన్‌లోని కాందహార్ ఎయిర్‌పోర్ట్‌కు మళ్లించారు.

దాదాపు ఎనిమిది రోజుల పాటు ప్రయాణికులను బందీలుగా ఉంచుకుని, పాక్ ఉగ్రవాదులు మౌలానా మసూద్ అజార్, అహ్మద్ ఒమర్ సయూద్ షేక్, ముష్తాక్ అహ్మద్ జర్జార్‌లను విడుదల చేస్తేనే ప్రయాణికులను సురక్షితంగా వదిలిపెడతామని, లేకుంటా చంపుతామని బెదిరించారు. దీంతో నాటి వాజ్‌పేయి నాయకత్వంలో భారత ప్రభుత్వం వారి డిమాండ్లకు తలొగ్గింది. జైలు నుంచి ఉగ్రవాదులను విడుదల చేసి.. కేంద్ర విదేశాంగ మంత్రి జస్వంత్ సింగ్‌ను వారికి ఎస్కార్ట్‌గా కాందహార్‌కు పంపింది. దీనిపై నేటికీ వివాదం నడుస్తోంది.

సిరీస్‌పై వివాదం

ఈ అంశాన్ని ప్రధానంగా తీసుకుని ‘ఐసీ 814: ది కాందహార్‌ హైజాక్‌’‌ పేరుతో దర్శకుడు అనుభవ్ సిన్హా వెబ్‌ సిరీస్‌ను రూపొందించారు. ఆగస్టు 29న ఇది నెట్‌ఫ్లిక్స్‌లో విడుదలైంది. ఇందులో బాలీవుడ్ సీనియర్ నటుడు నసీరుద్దీన్ షా, పంకజ్ కుమార్, విజయ్ వర్మ వంటి తదితర ప్రముఖ నటులు కీలక పాత్రలు పోషించారు. ఇది హైజాకింగ్‌ను చిత్రీకరించడమే కాకుండా తీవ్రవాదాన్ని ప్రోత్సహించేలా ఉందనే వివాదంతో అందరి దృష్టిని ఆకర్షించింది. అంతేకాదు, హైజాక్‌ వెనుక ఉన్న వాస్తవాలను వక్రీకరించారనే ఆరోపణలు ఉన్నాయి.

ఇందులో హైజాకర్ల పేర్లను ‘శంకర్‌’, ‘భోలా’ అని మార్చి చూపించడం, వారిని మానవత్వమున్న వ్యక్తులుగా చిత్రీకరించడంపై వివాదం మరోస్థాయికి వెళ్లింది. హైజాకర్లు తమ మత గుర్తింపు దాచిపెట్టేందుకే మారుపేర్లను పెట్టుకున్నారని, సిరీస్‌‌ను తెరకెక్కించినవారు దురుద్దేశంతో మారు పేర్లనే పాత్రలకు పెట్టారని బీజేపీ ఐటీ విభాగం చీఫ్‌ అమిత్‌ మాలవీయ ఆరోపించారు. #BoycottNetflix, #BoycottBollywood హ్యాష్‌ట్యాగ్‌ను ట్రెడింగ్ చేస్తున్నారు.

వెబ్ సిరీస్ రూపకర్తలు చరిత్రను వక్రీకరించారరని, అసలు హైజాకర్లు సృష్టించిన భయాన్ని తగ్గించారని ఆరోపిస్తున్నారు. కొంతమంది సోషల్ మీడియా యూజర్లు ఈ సిరీస్ ఉగ్రవాదాన్ని వైట్‌వాష్ చేయడానికి, ఉగ్రవాదులకు హిందూ పేర్లను పెట్టడం ద్వారా హిందూ సమాజాన్ని కించపరిచే నీచమైన ప్రయత్న చేస్తున్నారని ఆగ్రహం వ్యక్తం చేస్తున్నారు.

కాగా, ఈ వివాదం జమ్మూకశ్మీర్‌ మాజీ ముఖ్యమంత్రి, నేషనల్ కాన్ఫరెన్స్ నేత అమర్‌ ఒబ్దుల్లా స్పందించారు. ‘కశ్మీర్‌ ఫైల్స్‌’ చిత్రంలో చూపించిన అసత్యాలను వాస్తవాలుగా ప్రచారం చేసినవారికి ఈ వెబ్‌ సిరీస్‌లోని అంశాలు అభ్యంతరకంగా అనిపిస్తుండటం ఆశ్చర్యంగా ఉందని పరోక్షంగా బీజేపీపై విమర్శలు గుప్పించారు.

హైజాక్‌పై కేంద్ర హోం శాఖ ప్రకటన

కాందహార్ హైజాక్‌పై కేంద్ర హోం మంత్రిత్వ శాఖ 2000 జనవరి 6న పూర్తి సమాచారంతో కూడిన ప్రకటన విడుదల చేసింది. దీని వెనుక పాకిస్థాన్ గూఢచారి సంస్థ ఇంటర్ సర్వీస్ ఇంటెలిజెన్స్ (ఐఎస్ఐ) కుట్రను బయటపెట్టింది. హైజాకర్లకు సహరించిన నలుగురు ఐఎస్ఐ ఆపరేటివ్‌లను అరెస్ట్ చేసినట్టు ఆ ప్రకటన వెల్లడించింది. హైజాకర్లు సన్నీ అహ్మద్ ఖాజీ, షకీర్, రాజేష్ గోపాల్ వర్మ, మిస్త్రీ జహూర్ ఇబ్రహీం, షాహిద్ అక్తర్ సయ్యద్, ఇబ్రహీం అథర్లు విమానంలో ఒకరినొకరు సంబోధించడానికి భోలా, శంకర్, డాక్టర్, బర్గర్ వంటి మారుపేర్లను ఉపయోగించుకున్నారని ప్రకటన స్పష్టంగా పేర్కొంది.