రైల్వే ప్రయాణికులకు గుడ్‌న్యూస్.. ఈనెల 16న పట్టాలెక్కనున్న వందే భారత్ మెట్రో రైలు

వందే భారత్ రైళ్లు అందుబాటులోకి వచ్చిన తర్వాత భారత రైల్వే వ్యవస్థలో పెను మార్పులు చోటు చేసుకున్నాయి. అత్యాధునిక టెక్నాలజీతోపాటు అనేక సౌకర్యాలు.. రైల్వే ప్రయాణికులకు అందుతున్నాయి. ఛార్జీలు కొంచెం ఎక్కువైనా సరే.. వేగం, ఫీచర్లు ఉండటంతో రైల్వే ప్రయాణికులు వందే భారత్ రైళ్లలో ప్రయాణించేందుకు ఆసక్తి చూపుతున్నారు. ఈ క్రమంలోనే మరిన్ని రూట్లలో మరిన్ని వందే భారత్ రైళ్లను అందుబాటులోకి తీసుకువస్తున్నాయి. మరోవైపు.. వందే భారత్ రైళ్లకు తోడు వందే భారత్ మెట్రో రైళ్లు, వందే భారత్ స్లీపర్ రైళ్లను కూడా రైల్వే శాఖ ప్రవేశపెడుతోంది. ఈ క్రమంలోనే సెప్టెంబర్ 16వ తేదీన తొలి వందే భారత్ మెట్రో రైలు పట్టాలు ఎక్కనుంది. ప్రధానమంత్రి నరేంద్ర మోదీ చేతుల మీదుగా ఈ రైలును ప్రారంభించనున్నారు.

ఈ తొలి వందే భారత్ మెట్రో రైలు గుజరాత్‌లోని అహ్మదాబాద్ నుంచి భుజ్ మధ్య ప్రయాణించనుంది. ఈ రైలు దేశంలోని వివిధ నగరాల్లో ఉన్న మెట్రో రైళ్ల మాదిరిగానే ఉండగా.. వాటి కంటే సుదూర ప్రయాణాలకు ఉపయోగించనున్నారు. అహ్మదాబాద్-భుజ్ మధ్య 334 కిలోమీటర్ల దూరాన్ని కేవలం 5.45 గంటల్లోనే ఈ వందే భారత్ మెట్రో రైలు ప్రయాణించనుంది. భుజ్ రైల్వే స్టేషన్‌లో తెల్లవారుజామున 5.50 గంటలకు ప్రారంభం కానున్న ఈ వందే భారత్ మెట్రో రైలు.. ఉదయం 10.50 గంటలకు అహ్మదాబాద్ స్టేషన్‌కు చేరుకోనుంది. తిరిగి సాయంత్రం 5.30 గంటలకు అహ్మదాబాద్‌లో ప్రారంభమై.. రాత్రి 11.10 గంటలకు భుజ్ చేరుకోనుంది. వారంలో 6 రోజులు ఈ వందే భారత్ మెట్రో రైలు ప్రయాణం చేయనుంది. ఇక భుజ్-అహ్మదాబాద్ మార్గంలో ఈ రైలుకు 9 స్టాప్‌లు ఉండగా.. ప్రతీ స్టేషన్‌లో 2 నిమిషాలు మాత్రమే ఆగుతుందని రైల్వే అధికారులు వెల్లడించారు.

వందే భారత్ రైలు లాగానే ఈ వందే భారత్ మెట్రో రైలు కూడా పూర్తిగా ఎయిర్ కండీషన్ కలిగి ఉంటుంది. మొదట 12 కోచ్‌లతో ప్రారంభం కానున్న ఈ వందే భారత్ మెట్రో రైలుకు.. ప్రయాణికుల రద్దీ దృష్టా వాటిని 16 కోచ్‌లకు పెంచనున్నట్లు రైల్వే వర్గాలు వెల్లడించాయి. ఈ రైళ్లకు ప్రత్యేకమైన కోచ్ కాన్ఫిగరేషన్ ఉండనుండగా.. నాలుగు కోచ్‌లు ఒక యూనిట్‌గా ఉంటాయి. ఇందులో మన మెట్రో రైలు లాగా ఆటోమేటిక్ డోర్లు ఉండటం మరో ప్రత్యేకత. ఈ వందే భారత్ మెట్రో రైలును గంటకు 100 కిలోమీటర్ల నుంచి 250 కిలోమీటర్ల వేగంతో పరుగులు పెట్టేలా రూపొందించారు. కేంద్ర రైల్వే శాఖ సహాయ మంత్రి రవ్‌నీత్ సింగ్.. ఇటీవలె కపుర్తలా రైల్ కోచ్ ఫ్యాక్టరీని సందర్శించారు. అమృత్ భారత్ కోచ్‌లను ప్రారంభించిన కేంద్రమంత్రి.. ఆ సమయంలో వందే భారత్ మెట్రో రైలు తయారీ విధానాన్ని పరిశీలించారు.