అర్ధరాత్రి నిద్రపోతుండగా భర్త నిర్వాకం

నిర్భయ, దిశ వంటి చట్టాలు చేసినా, కఠిన శిక్షలు వేస్తున్న మహిళలపై అఘాయిత్యాలకు అంతు లేకుండా పోతోంది. ప్రతిరోజూ ఏదో ఒక మూల స్త్రీలపై దాడులు, అత్యాచారాలు జరుగుతూనే ఉన్నాయి. భార్యాభర్తల మధ్య మూడో వ్యక్తి రాక వల్ల ఎన్నెన్నో ఘోరాలు జరుగుతున్నాయి. ప్రియుడి మోజులో భర్తను భార్యే అంతమొందించడమో, ప్రేయసి కోసం భార్యను భర్తే చంపేయడమో జరుగుతున్నాయి. అదే సమయంలో అదనపు కట్నం కోసం భార్యను చిత్రహింసలకు గురిచేస్తున్న భర్తలు ఎంతో మంది ఉన్నారు. తాజాగా ఓ భర్త చేసిన నిర్వాకంపై మహిళా సంఘాలు భగ్గుమంటున్నాయి. భార్యపై తరచూ దాడి చేస్తూ నరకం చూపిస్తున్న భర్తపై ఓ భార్య గతంలోనే కేసు పెట్టింది. పేరుకు ఒకే ఇంట్లో ఉంటున్నా వారిద్దరూ ఎప్పటి నుంచో విడిగానే ఉంటున్నారు. ఓ రోజు అర్ధరాత్రి అతడు చేసిన నిర్వాకంపై ఆమె పోలీసు స్టేషన్ మెట్లెక్కడంతో విషయం వెలుగులోకి వచ్చింది.

పంజాబ్ రాష్ట్రంలోని లూథియానా పరిధిలో సాలేమ్ తబ్రీ ప్రాంతంలో ప్రదీప్ కుమార్ అనే వ్యక్తి స్థానికంగా కూలి పనులు చేస్తూ ఉపాధి పొందుతున్నాడు. అతడికి ఆర్తి అనే మహిళతో 2002వ సంవత్సరంలోనే పెళ్లయింది. పెళ్లయిన నాటి నుంచే ప్రదీప్ తన భార్యను వేధిస్తుండేవాడు. ప్రతీ చిన్న కారణానికి ఆమెను చిత్రహింసలకు గురిచేసేవాడు. ఆమె అతడి తీరును భరించలేక పుట్టింటికి కూడా చాలాసార్లు వెళ్లింది. పెద్దమనుషుల మధ్య పంచాయతీ పెట్టించి ఆమెను కాపురానికి తీసుకొచ్చుకునేవాడు. పంచాయతీ సమయంలో బుద్ధిగా మసలుకుంటానని చెప్పేవాడు. కానీ అతడు మాత్రం తన తీరును మార్చుకోలేదు. దీంతో అతడిపై కొద్ది నెలల క్రితం మహిళా పోలీస్ స్టేషన్లో ఫిర్యాదు చేసింది. అది ఇంకా విచారణలోనే ఉంది.

పేరుకు ఒకే ఇంట్లో ఆ భార్యాభర్తలు ఉంటున్నా వారి మధ్య సఖ్యత లేదు. వేరు వేరుగానే ఉంటున్నారు. ఫిబ్రవరి 9వ తారీఖు అర్ధరాత్రి సమయంలో తన మంచంపై నిద్రపోతున్న ఆమెపై ప్రదీప్ కుమార్ లైంగిక దాడికి యత్నించాడు. ఆమె తనకు ఇష్టంలేదని ప్రతిఘటించింది. గట్టిగా కేకలు పెట్టి అరిచింది. దీంతో కోపోద్రిక్తుడైన ప్రదీప్ ఆమెపై దాడి చేశాడు. ఇంట్లో ఉన్న క్రికెట్ బ్యాట్ తో ఆమెను చితకబాదాడు. దీంతో ఆమె ఆస్పత్రిపాలయింది. ఆస్పత్రి నుంచి డిశ్చార్జ్ అయిన వెంటనే ఆమె పోలీస్ స్టేషన్ కు వెళ్లి భర్తపై ఫిర్యాదు చేసింది. పోలీసులు కేసు నమోదు చేసుకుని దర్యాప్తు చేస్తున్నారు.