ఆ పట్టణానికి ఆ వాగు శాపం.?

పచ్చిమ ప్రకాశం జిల్లాలో కరువు కాటకాలకు నిలయమైన గిద్దలూరు పట్టణానికి ఆ వాగు శాపంగా మారింది. నల్లమల్ల అటవీ ప్రాంతంలో కురిసే వర్షాలతో పొంగిపొరలే ఈ వాగు గిద్దలూరు పట్టణాన్ని ముంచెత్తి పలుమార్లు అపార నష్టం కలిగించింది. గత దశాబ్దాల నుండి వాగు వల్ల ఈ ప్రాంత వాసులు ఎప్పుడూ లబ్ధి పొందిన దాఖలాలు లేవు.

నల్లమల్ల అటవీ ప్రాంతంలో కురిసే భారీ వర్షాల వల్ల ఈ వాగుకు వరదలు పోటెత్తిన ప్రతిసారి భారీ స్థాయిలో వరద నీరు కడప జిల్లాకు తరలిపోతోంది. ఎన్నో ప్రభుత్వాలు వస్తున్నాయి వెళుతున్నాయి తప్ప ఈ ప్రాంతం నుంచి ప్రవహిస్తున్న ఈ సగిలేరు వాగును, ఆ నీటిని సంరక్షించుకోవడంలో విఫలమయ్యారని, ప్రజలు నేటికీ విమర్శిస్తూనే ఉంటారు.

ఈ వాగు పట్టణాన్ని ముంచెత్తిన ప్రతిసారి అపార నష్టం కలిగిస్తూ ప్రజలను నట్టేట ముంచుతుంది. పట్టణం లోని గృహ పరికరాలన్నీ ఈ వాగు నీటి వల్ల పాడైపోయి కోట్ల రూపాయల నష్టం కలిగిన సందర్భాలు చాలా ఉన్నాయి. తాగునీటికి, సాగునీటికి ఈ ప్రాంతంలో కటకటలాడే ప్రజలకు ఇంతవరకు పరిష్కారం లభించకపోవడం చాలా బాధాకరమైన విషయమని విశ్లేషకులు అంటున్నారు.

ఈ నీటిని సంరక్షించేందుకు గుండ్ల మోటు ప్రాజెక్టును ప్రభుత్వాలు రూపకల్పన చేశాయి. కానీ చాలా సంవత్సరాల నుండి ఈ ప్రాజెక్టు పనులు ఎక్కడ వేసిన గొంగలి అక్కడే అన్నట్టుగా మారాయి. పట్టణ ప్రాంతంలోకి వరద నీరు ప్రవేశించకుండా రక్షణ గోడ నిర్మించేందుకు గత ప్రభుత్వాలు నిధులు విడుదల చేసినా ఆ పనులు నేటికీ పూర్తి కాలేదు.

ఎంతోకాలం నుంచి ఈ వాగు సంబంధిత సమస్యను పరిష్కరించడంలో స్థానిక నాయకులతో పాటు అధికారులు విఫలమయ్యారని విమర్శలు పెరిగిపోయాయి. కళ్ళముందే లక్షల క్యూసెక్కుల వరద నీరు పక్క జిల్లాకు తరలిపోతుంటే రైతన్నలు ఆవేదన చెందుతున్నారు. ఎన్నో సంవత్సరాల నుండి వేధిస్తున్న ఈ సమస్యకు పరిష్కారం చూపించే వారే లేరా అంటూ స్థానిక ప్రజలు, రైతన్నలు ఆగ్రహం వ్యక్తం చేస్తున్నారు.

ఇప్పటికైనా ఈ ప్రాంత ప్రజల నీటి కష్టాలను గుర్తించి సగిలేరు వాగు మీరు వృధా కాకుండా సంరక్షించడంతో పాటు వాగు వల్ల నష్టపోతున్న గిద్దలూరు పట్టణ ప్రజలను కాపాడాలంటూ ప్రజలు డిమాండ్ చేస్తున్నారు.

మరి రానున్న రోజుల్లో గిద్దలూరు పట్టణ ప్రజల ఆవేదన, రైతుల ఆవేదన అర్థం చేసుకొని స్థానిక అధికారులు, ప్రజాప్రతినిధులు ఈ సమస్యకు పరిష్కారం చూపిస్తారో లేదో చూడాలి.