జనసేనానిపై మంత్రి పేర్ని నాని వ్యంగ్యాస్త్రాలు

జనసేన అధినేత పవన్ కళ్యాణ్ ను టార్గెట్ చేస్తూ మంత్రి పేర్నినాని వ్యంగ్యాస్త్రాలు సంథించారు. ఆంధ్రప్రదేశ్‌లో సామాస్య ప్రజలకు వినోదాన్ని అందుబాటులోకి తీసుకొచ్చేందుకు ప్రభుత్వం టికెట్ల రేట్లపై హేతుబద్ధత తీసుకురావాలని భావిస్తోందని రాష్ట్ర సమాచార శాఖ మంత్రి పేర్ని నాని వ్యాఖ్యానించారు. ఇందులో భాగంగా కమిటీ కూడా ఏర్పాటు చేసిందని చెప్పారు. సినీ సమస్యల పరిష్కారం కోసం ఇటీవలే ముఖ్యమంత్రి వైఎస్ జగన్మోహన్ రెడ్డితో చిరంజీవి, మహేష్ బాబు, రాజమౌళి, ప్రభాస్ సహా పలువురు సినీ ప్రముఖులు భేటీ అయ్యి చర్చించిన సంగతి తెలిసిందే. దీంతో రాష్ట్రంలో టికెట్ల వివాదం సహా పలు సమస్యలకు ఫుల్‌స్టాప్ పడే అవకాశం కనిపిస్తోంది. ఈ నేపథ్యంలో ఏపీ ప్రభుత్వం విధానాలను మంత్రి పేర్ని నాని మీడియాకు వివరించారు. ఈ నేపథ్యంలో ప్రముఖ సినీ నటుడు, జనసేన పార్టీ అధినేత పవన్ కళ్యాణ్‌ను లక్ష్యంగా చేసుకునే టికెట్ల వివాదం తెరపైకి తీసుకొచ్చారని మీడియా అడిగిన ప్రశ్నకు మంత్రి పేర్ని నాని తనదైన శైలిలో రియాక్ట్ అయ్యారు. పవన్ కళ్యాణ్ అటు సినిమాల్లో కానీ, ఇటు రాజకీయాల్లో కానీ తమకు ఎలాంటి టార్గెట్ కాదని మంత్రి పేర్ని నాని తేల్చి చెప్పారు. పవన్ కళ్యాన్ మహా అయితే ఏడాది ఒక్క సినిమా చేస్తారని పేర్కొన్నారు. ఏడాది ఒక్క సినిమా చేసుకునే పవన్ కళ్యాణ్‌ కోసం పదుల సంఖ్యలో చిత్రాలు వచ్చే తెలుగు సినీ ఇండస్ట్రీని టార్గెట్ చేయాల్సిన అవసరం ఏంటని ప్రశ్నించారు. అయితే, సినీ ఇండస్ట్రీకి పవన్ కళ్యాణ్‌కు సంబంధం ఏంటని మంత్రి పేర్ని నాని ప్రశ్నించారు. ఇండస్ట్రీలో పవన్ కళ్యాణ్ కూడా కేవలం ఒక నటుడు మాత్రమేనని తేల్చి చెప్పారు. అయినా, చిరంజీవి, అల్లు అర్జున్, రాంచరణ్, మహేష్ బాబు, ఎన్టీఆర్, ప్రభాస్ సినిమాల కంటే పవన్ కళ్యాణ్‌ చిత్రాలకు ఏమైనా ఎక్కువ కలెక్షన్లు వస్తాయా అని ప్రశ్నించారు. అప్పుడెప్పుడో తాను చిన్నప్పుడు అత్తారింటికి దారేది సినిమాకు కలెక్షన్లు వచ్చాయని.. అదే పేరు చెప్పుకుని అమ్ముకుంటున్నారని మంత్రి నాని అన్నారు. ఇవాళ పవన్ కళ్యాణ్ కంటే సినీ ఇండస్ట్రీకి వెనక వచ్చిన మహేష్ బాబు, ఎన్టీఆర్, ప్రభాస్, అల్లు అర్జున్, రాంచరణ్ బ్రాహ్మాండంగా రాణిస్తున్నారని చెప్పారు. వాస్తవాలు ఇలా ఉంటే.. పవన్ కళ్యాణ్‌ను టార్గెట్ చేయాల్సిన అవసరం తమకు ఏంటని పేర్ని నాని ఎదరు ప్రశ్నించారు.