'ఫలక్‌నుమా దాస్' ని పచ్చి బూతులతోటి నింపేశారు

ఇదేం టీజర్.. అసలు అది సినిమా టీజరేనా? లేక మన పక్కగల్లీలో పోరగాళ్లు పోట్లాడుకుంటుంటే పొరపాటున ఆ బూతుల్ని కాని వింటున్నామా? తాజాగా విడుదలైన ‘ఫలక్‌నుమా దాస్’ టీజర్ చూస్తే ఇదే అభిప్రాయం వ్యక్తమవుతుంది. రియాలిటీకి దగ్గరగా హైదరాబాద్ గల్లీ గ్యాంగ్ వార్‌ నేపథ్యంలో ‘ఈనగరానికి ఏమైంది’ ఫేమ్ విశ్వక్సేన్ దర్శకత్వం వహించిన ఈ మూవీ టీజర్‌ను గురువారం నాడు విడుదల చేశారు. ఈ చిత్రంలో పెళ్లి చూపులు ఫేమ్ తరుణ్ భాస్కర్ పోలీస్ ఆఫీసర్‌గా కనిపిస్తున్నారు. ‘ఈ నగరానికి ఏమైంది’ చిత్రంతో విశ్వక్సేన్ వెండితెరకు పరిచయం చేశారు తరుణ్ భాస్కర్. ఈ చిత్రానికి విశ్వక్సేన్ దర్శకత్వం వహించడంతో పాటుగా ఆయన లీడ్ రోల్ చేస్తున్నారు.

ఇదివరకూ తెలుగు సినిమాల్లో ద్వంద అర్ధాలు, అసభ్యకరమైన సంభాషణలు, విచ్చలవిడి శృంగారం లాంటివి సినిమాల్లో కనిపిస్తే వివిధ సంఘాలు గగ్గోలు పెట్టేవి. అయితే బాలీవుడ్, హాలీవుడ్ ప్రభావం తెలుగు సినిమాలపై పడటంతో ద్వంద అర్దాలు కాదు.. డైరెక్ట్ అర్ధాల సంభాషణలు కామన్ అయ్యాయి. మహా అయితే A సర్టిఫికేట్ ఇస్తారులే అన్న ధైర్యంతో న్యూడ్‌గా నటించడంతో పాటు.. పచ్చిబూతుల్ని కూడా వాడేస్తున్నారు.

తాజా ట్రైలర్‌లో గల్లీ పోరగాళ్లు తిట్టుకునే గలీజ్ మాటలన్నీ అక్షరం పొల్లుపోకుండా.. చిన్న బీప్ కూడా లేకుండా బండ బూతుల్ని వినిపిస్తున్నారు. పోలీస్ ఆఫీసర్‌గా నటించిన తరుణ్ భాస్కర్ తెలంగాణ యాసలో పలికిస్తున్న బూతులు.. రియాలిటీకి దగ్గరగా ఉన్నప్పటికీ కామన్ ఆడియన్స్‌ రిసీవ్ చేసుకోవడం కాస్త ఇబ్బంది. ఇక ఫ్యామిలీస్‌లో కలిసి ఈ సినిమా వెళ్తే ఇక అంతే సంగతులు అన్నట్టుగా ‘ఫలక్‌నుమా దాస్’ టీజర్‌ను బోల్డ్‌గా, హింసాత్మకంగా కట్ చేశారు.

ఈ ఊర మాస్ టీజర్‌లో బోల్డ్ కంటెంట్ ఘాటు కూడా చాలానే ఉంది. హీరోయిన్లుగా నటిస్తున్న సలోని మిశ్ర, హర్షిత గౌర్ లిప్ లాక్ సీన్లతో రచ్చ చేస్తూ.. రొమాంటిక్ సన్నివేశాలను పండించడంలో మునిగితేలుతున్నారు. ఈ చిత్రంలో ఉత్తేజ్ గ్యాంగ్ వార్‌కి లీడర్‌గా కనిపిస్తున్నారు.