స్పెషల్ పోలీసులు ఇలా చేయటం ఎన్నడూ అభిలషణీయం కాదు.. ఆర్ఎస్ ప్రవీణ్‌

తెలంగాణ రాష్ట్ర వ్యాప్తంగా బెటాలియన్ పోలీసులు చేస్తున్న ఆందోళనలు సర్వత్రా చర్చనీయాంశంగా మారాయి. అయితే.. ఆందోళనలు చేస్తున్న పోలీసుల్లో పలువురిని సస్పెండ్ చేయటం కొందరిని డిస్మిస్ చేస్తుండటం మరింత ఆందోళనకరంగా మారింది. కాగా.. పోలీసుల ఆందోళనపై బీఆర్ఎస్ నేత, మాజీ ఐపీఎస్ అధికారి ఆర్ఎస్ ప్రవీణ్ కుమార్ స్పందించారు. తెలంగాణ రాష్ట్ర డీజీపీతో పాటు పోలీసులకు స్పెషల్ రిక్వెస్ట్ చేశారు. ఈమేరకు ట్విట్టర్ వేదికగా పోస్టు చేశారు.

ముఖ్యమంత్రి, హోంమంత్రి రేవంత్ రెడ్డి సంపూర్ణ వైఫల్యం వల్లనే నేడు టీజీఎస్పీలో ఉద్రిక్త వాతావరణం నెలకొందని ఆర్ఎస్ ప్రవీణ్ కుమార్ అభిప్రాయపడ్డారు. యూనిఫాం ధరించిన స్పెషల్ పోలీసులు తామే ఉద్యమకారులై ధర్నాల్లో పాల్గొనడం ప్రజాస్వామ్య వ్వవస్థలో ఎన్నడూ అభిలషణీయం కాదన్న ఆర్ఎస్పీ.. వాళ్లకు ఇంతటి తీవ్రమైన పరిస్థితి ఎందుకొచ్చిందో ఒకసారి ఆలోచించాలంటూ ప్రభుత్వాన్ని కోరారు.

తమ పరిస్థితిని అర్థం చేసుకోవడానికి వాళ్ల శాఖ మంత్రి అయిన రేవంత్ రెడ్డి తమ డిమాండ్లపైన కనీసం ఒక స్టేట్మెంట్ అయినా ఇవ్వకుండా మౌనవ్రతం పాటిస్తూ మరింత జటిలం చేస్తున్నారనేదే వాళ్ల ఆరోపణ, ఆవేదన అంటూ ఆర్ఎస్ ప్రవీణ్ కుమార్ వివరించారు. రేవంత్ రెడ్డి సకాలంలో స్పందించి ఉంటే ఈ సమస్య తలెత్తేది కాదని అభిప్రాయపడ్డారు. ఈ అసలు పని చేయాల్సిన సీఎం రేవంత్ రెడ్డి.. అటెన్షన్ డైవర్షన్ లాంటి వికృత చేష్టలకు దిగుతున్నారంటూ మండిపడ్డారు. పోలీసు కుటుంబం నుంచి వచ్చానని చెప్పే రేవంత్ రెడ్డి.. ఎన్నికల్లో ఇచ్చిన వాగ్దానాల మీదనే పోలీసు కుటుంబాలు పోరాడుతున్నయి కదా అంటూ చెప్పుకొచ్చారు.

మరోవైపు.. తెలంగాణ రాష్ట్ర డీజీపీకి కూడా ఆర్ఎస్ ప్రవీణ్ కుమార్ స్పెషల్ రిక్వెస్ట్ చేశారు. "అసంతృప్తితో ఉన్న కానిస్టేబుళ్ల మానసిక స్థితి మీకు తెలవంది కాదు. వాళ్ల పేదరికం, గ్రామీణ నేపథ్యం, కుటుంబ పరిస్థితులను దృష్టిలో ఉంచుకొని సస్పెన్షన్లను, బర్తరఫ్‌లను వెంటనే ఉపసంహరించుకోగలరు. ఈ ఆందోళన సందర్భంగా చాలా సమస్యలు (బెటాలియన్లలో వెట్టిచాకిరీ, అవినీతి లాంటివి) మీ దృష్టికి వచ్చుంటాయి. వాటి పరిష్కారాలకు త్వరితగతిన వ్యవస్థీకృత చర్యలు చేపట్టగలరు." అంటూ పోలీస్ బాస్‌కు విజ్ఞప్తి చేశారు ఆర్ఎస్పీ. ఇదిలా ఉంటే.. ఆందోళన చేస్తున్న పోలీసు కానిస్టేబుళ్లకు కూడా ఆర్ఎస్ ప్రవీణ్ కుమార్ ప్రత్యేక విజ్ఞప్తి చేశారు. "పోలీసు మిత్రులకు ఒక మనవి.. దయచేసి సంయమనం పాటించండి." అంటూ ఆర్ఎస్పీ స్పెషల్ రిక్వెస్ట్ చేశారు.