హైదరాబాద్‌లో 6 వరుసల రహదారి.. ఆ ప్రాంతాల మీదుగా, ట్రాఫిక్ సమస్యకు చెక్

హైదరాబాద్ విశ్వనగరంగా వేగంగా అభివృద్ది చెందుతోంది. నగరం నలుమూలలా విస్తరిస్తోంది. నగర జనాభా ఇప్పటికే కోటి దాటింది. అనేక జాతీయ, అంతర్జాతీయ సంస్థలు నగరంలో పెట్టుబడులు పెట్టగా.. మరికొన్ని సంస్థలు ఇన్వెస్ట్‌మెంట్ పెట్టేందుకు సిద్ధంగా ఉన్నాయి. ఈ మేరకు నగరంలో మౌళిక సదుపాయాల కల్పనపై ప్రభుత్వాలు ఫోకస్ పెడుతున్నాయి. గత బీఆర్ఎస్ ప్రభుత్వం నగరంలో అనేక కొత్త రహదారులు, ఫ్లైఓవర్లు, అండర్‌పాసులు, స్కైవేలు, నిర్మించగా.. ప్రస్తుత కాంగ్రెస్ ప్రభుత్వం సైతం నగర అభివృద్ధిపై స్పెషల్ ఫోకస్ పెట్టింది. కొత్తగా రహదారులు, ఫ్లైఓవర్ల నిర్మాణానికి సిద్ధమవుతోంది.

 ఈ నేపథ్యంలో హైదరాబాద్ నగరంలో కీలక మార్గాల్లో ఒకటైన గండిమైసమ్మ-మియాపూర్‌ రోడ్డు విస్తరణ పనులు తాజాగా ప్రారంభమయ్యాయి. దాదాపు రూ.135 కోట్ల నిధులతో ఈ పనులు చేపట్టారు. ప్రస్తుతం 4 వరుసలుగా ఉన్న ఈ రహదారిని ఆరు వరుసలుగా విస్తరించనున్నారు. 14 కి.మీ రోడ్డు విస్తరణ జరగనుండగా.. వచ్చే ఏడాది నవంబర్ లోగా.. వాహనదారులకు అందుబాటులోకి తీసుకొచ్చేలా హెచ్‌ఎండీఏ టార్గెట్‌గా పెట్టుకుంది. ఈ రహదారి పూర్తయితే మల్లంపేట్‌ వద్ద నిర్మించిన ట్రంప్‌లెట్‌ నుంచి ఔటర్ రింగు రోడ్డుకు ఈజీగా చేరుకోవచ్చు. అలాగే గండిమైసమ్మ నుంచి ఔటర్ రింగు రోడ్డు వైపు వెళ్లేందుకు కూడా కీలక మార్గం కానుంది. నాగ్‌పూర్‌ నేషనల్ హైవే 65తో ఈ రహదారికి లింకు ఏర్పడుతుంది.

మియాపూర్- గండిమైసమ్మ రహదారిపై ప్రతి నిత్యం ట్రాఫిక్‌ జామ్ ఏర్పడుతోంది. ఉదయం 9 నుంచి 11 వరకు, సాయంత్రం 4 గంటల నుంచి రాత్రి 8 వరకు విపరీతమైన ట్రాఫిక్ ఉంటుంది. 4 వరుసలుగా రహదారి ఉండటంతో రద్దీ ఎక్కువగా ఉంటుంది. ఈ నేపథ్యంలో రోడ్డును ఆరు వరుసలుగా విస్తరించేందుకు ప్రభుత్వం సిద్ధమైంది. ఈ రోడ్డు నిర్మాణం పూర్తయితే.. దాదాపు 20 లక్షలమందికి ప్రయోజనం కలుగుతుందని హెచ్‌ఎండీఏ అధికారులు అంచనా వేస్తున్నారు. ఐడీఏ బొల్లారం, బొంతపల్లి, మల్లంపేట్, నిజాంపేట్, ప్రగతినగర్, బాచుపల్లి, కేపీహెచ్‌బీ, ప్రగతినగర్, దుండిగల్, దూలపల్లి, గాజుల రామారం, బౌరంపేట్‌లకు ఈ రోడ్డు నుంచి వేగంగా రాకపోకలు సాగించొచ్చు. బాచుపల్లి కూడలి వద్ద రహదారి విస్తరణకు అనుగుణంగా 1.32 కి.మీ.మేరకు ఫ్లైఓవర్‌ నిర్మించనున్నారు.

అయితే ఈ రహదారి విస్తరణకు దూలపల్లిలోని అటవీ భూమి అడ్డంకిగా మారింది. 2.3 కి.మీ.వరకు అటవీ భూమి నుంచి రహదారి వెళ్తుండగా.. ఈ భూమిని హెచ్‌ఎండీఏకు అప్పగిస్తేనే పనుల్లో వేగం పుంజుకునే ఛాన్స్ ఉంది. దీనిపై అధికారులు ఫారెస్ట్ డిపార్ట్‌మెంట్‌తో సంప్రదింపులు జరుపుతున్నారు. ఇక ప్రస్తుతం రోడ్డుకు ఇరువైపులా 14 కి.మీ.మేర 1092 చెట్లు ఉన్నట్లు ట్రీ ప్రొటెక్షన్‌ కమిటీ లెక్కించింది. వాటిలో 603 చెట్లను ఇప్పటికే ట్రాన్స్‌లోకేట్‌ చేసినట్లు హెచ్‌ఎండీఏ వెల్లడించింది. మరికొన్నింటిని కూడా ట్రాన్స్‌లోకేట్ చేస్తామని అధికారులు చెబుతున్నారు. ఈ రహదారి పూర్తయితే ఆయా ప్రాంతాలకు వెళ్లే వాహనదారుల ట్రాఫిక్ కష్టాలు తీరనున్నాయి.