తెలుగువారిపై నీచమైన కామెంట్లు.. నోరు పారేసుకున్న నటి కస్తూరి

తమిళనాడులోని తెలుగువారిని ఉద్దేశించి నటి కస్తూరి నీచమైన వ్యాఖ్యలు చేశారు. రాజుల కాలంలో అంతఃపుర మహిళలకు సేవ చేయడానికి వచ్చిన వారే తెలుగు వాళ్లని తక్కువచేసి మాట్లాడారు. అలా వచ్చిన వారంతా ఇపుడు తమది తమిళ జాతి అంటూ పెద్దపెద్ద మాటలు మాట్లాడుతున్నారని బీజేపీ మహిళా నేత చేసిన వ్యాఖ్యలపై తీవ్ర దుమారం రేగుతోంది. వివాదాస్పదం కావడంతో తన వ్యాఖ్యలకు ఆమె సమర్దించుకునే ప్రయత్నం చేశారు. తాను అలా అనలేదని, వాటిని వక్రీకరించారని ఆమె వివరణ ఇవ్వడం గమనార్హం. ఏది ఏమైనప్పటికీ ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి.

స్థానికంగా బ్రహ్మణ సంఘాల సమ్మేళనానికి హాజరైన కస్తూరి.. వారిని గుర్తింపు గురించి మాట్లాడే క్రమంలో తెలుగువారి ప్రస్తావన తీసుకొచ్చారు. ‘300 సంవత్సరాల కిందట ఒక రాజు వద్ద అంతఃపుర మహిళలకు సేవ చేయడానికి వచ్చిన తెలుగు వారు.. ఇప్పుడు తమది తమిళ జాతి అంటుంటే... మరి శతాబ్దాలకు పూర్వమే ఇక్కడకు వచ్చిన బ్రాహ్మణులను తమిళులు కాదని చెప్పడానికి మీరెవరు..?’’ అని పరోక్షంగా ద్రావిడ వాదులను ఆమె ప్రశ్నించారు. ప్రస్తుత తమిళనాడు సీఎం క్యాబినెట్‌లో ఐదుగురు మంత్రులు తెలుగు మూలాలు ఉన్నవారే అని ఆమె పేర్కొన్నారు.

‘ఇతరుల ఆస్తులను లూటీ చేయొద్దు, పరస్త్రీలపై మోజుపడొద్దు.. ఒకరి కంటే ఎక్కువ మంది వివాహం చేసుకోవద్దు.. అని బ్రాహ్మణులు చెబుతున్నారు. అందుకే వారికి వ్యతిరేకంగా తమిళనాట ప్రచారం సాగుతోంది’ అని కస్తూరి విమర్శించారు.తెలుగు మాట్లాడే వాళ్లకే అధిక ప్రాధాన్యత ఇస్తున్నారని మండిపడ్డారు. ఈ వ్యాఖ్యలపై ఆగ్రహం వ్యక్తం కావడంతో ఆమె వివరణ ఇచ్చారు. ఓ స్థానిక ఛానల్‌ను ట్యాగ్ చేస్తూ... ఇదంతా తప్పుడు ప్రచారమని కస్తూరి కొట్టిపారేశారు. అసలు విషయాన్ని వదిలేసి దుష్ప్రచారం చేస్తున్నారని మండిపడ్డారు. కొన్ని ఏళ్ల క్రితం తమిళనాడు వచ్చిన తెలుగు వారు తాము తమిళులమని చెప్పుకుంటుంటే.. బ్రాహ్మణులను మాత్రం తమిళులు కాదంటున్నారని అన్నారు.

కస్తూరీ చేసిన వ్యాఖ్యలపై తెలుగు సంఘాలు మండిపడుతున్నాయి. ఇలాంటి కామెంట్స్‌ వల్ల తీవ్ర పరిణామాలు ఉంటాయని హెచ్చరిస్తున్నాయి. ఇప్పటికే తమిళనాడులో స్థిరపడిన అరుంథతియార్ సామాజికవర్గానికి చెందిన ఆంధ్రులపై నామ్ తమిళర్ కట్చి చీఫ్ కో-ఆర్డినేటర్ సీమన్ వివాదాస్పద వ్యాఖ్యలు చేసి.. విమర్శలు ఎదుర్కొంటున్నారు. పారిశుద్ధ్య పనులు చేసే వీళ్లు ఆంధ్ర ప్రాంతం నుంచి వచ్చారని తక్కువ చేసిన మాట్లాడారు. దీనిపై కేసు కూడా నమోదు కాగా.. ప్రస్తుతం కోర్టు విచారణలో ఉంది. తాజాగా, కస్తూరి తెలుగవారిని ఉద్దేశించి నోరుజారడం అగ్నికి ఆజ్యం పోసినట్టయ్యింది.