బాంకే బిహారీ ఆలయానికి పోటెత్తుతున్న భక్తులు,,,,అమృత జలంగా భావించి ఏసీ నీళ్లు తాగేస్తున్న వైనం

ఓ ఆలయానికి వెళ్లిన భక్తులు.. అక్కడ ఏనుగు ముఖం ఆకారం నుంచి వస్తోన్న నీటిని పవిత్ర జలంగా భావించి సేవిస్తారు. అయితే, ఏసీ మిషన్ నుంచి వచ్చిన నీళ్లను కూడా అమృత జలమని గ్లాసులకు గ్లాసులు తాగేయడం వారి మూఢభక్తికి నిదర్శనం. దీనికి సంబంధించిన ఓ వీడియో ప్రస్తుతం సోషల్ మీడియాలో తెగ వైరల్ అవుతోంది. ఈ ఘటన ఉత్తర్‌ ప్రదేశ్‌లోని మధుర జిల్లా బృందావన్‌లోని బాంకే బిహారీ ఆలయంలో చోటుచేసుకుంది. వైరల్ అవుతోన్న వీడియోలో కొంతమంది భక్తులు ఆలయం వెనుక భాగంలో ఏనుగు ముఖం నుంచి వస్తోన్న నీటిని చరణామృతంగా భావించి సేవించడం కనిపిస్తోంది.

వాస్తవానికి ఇది ఆలయంలో ఏర్పాటు చేసిన ఏసీ నుంచి వచ్చే నీళ్లు. దీన్ని ఓ యూట్యూబర్ వీడియో తీసి సోషల్ మీడియాలో పెట్టడంతో వైరల్ అవుతోంది. చరణామృతంగా భావించి తాగుతున్న ఓ భక్తురాలితో ఆ య్యూటూబర్ మాట్లాడుతూ.. ‘దీదీ.. ఇది చరణామృతం కాదు ఏసీ నీరు’ అని చెబుతుంటే...ఆ మహిళ నవ్వుతూ అక్కడి నుంచి వెళ్లిపోయింది.

బాంకే బిహారీ ఆలయం మొదటి అంతస్తులో ఏనుగు నోరు మాదిరిగా ఉండే ఆకారంలో నుంచి వర్షపు నీరు వెళ్తుంది. అయితే, ఆలయంలో ఏర్పాటు చేసిన ఏసీ నుంచి విడుదలయ్యే నీరు కూడా ఈ మార్గం నుంచే బయటకు వెళ్తూ ఉంటుంది. కొద్దిరోజుల కిందట ఎవరో ఒక భక్తుడు ఈ విషయం తెలియకుండానే చరణామృతంగా భావించి దానిని చేతిలో పెట్టుకుని జపం చేయడం మొదలుపెట్టినట్టు స్థానికులు తెలిపారు. కాసేపటికే అతడి వెనుక నుంచి వస్తున్న మిగతా భక్తులు కూడా ఆ నీటిని గ్లాసుల్లో నింపి తాగడం ప్రారంభించారు. ఆ ఆలయానికి వచ్చిన భక్తులు.. దీన్ని చరణామృతంగా భావిస్తున్నారు.

ఈ జలం సేవించడానికి భక్తులు ఆలయానికి క్యూలు కడుతున్నారు. చాలా మంది దానిని పాత్రల్లో నింపుకుని ఇళ్లకు కూడా తీసుకెళ్తున్నారు. ఈ వీడియో సోషల్ మీడియాలో వైరల్ కావడంతో బాంకే బిహారీ ఆలయ పూజారులు స్పందించారు. ఆ నీటిని సేవించి, తీవ్ర అనారోగ్యానికి గురికావద్దని భక్తులకు విజ్ఞప్తి చేశారు. కాగా, ఇది గుడ్డి భక్తి అని సోషల్ మీడియాలో పలువురు నెటిజన్లు మండిపడుతున్నారు. ఇటువంటి నీళ్లు తాగడం వల్ల లేనిపోని అనారోగ్య సమస్యలు కొని తెచ్చుకోవడమేనని అంటున్నారు. కాగా, ప్రపంచం నలుమూలల నుంచి రోజూ 10 నుంచి 15 వేల మంది పర్యాటకులు మధుర, బృందావన్‌లకు వస్తుంటారు. ఈ చర్య వల్ల చాలా మంది ఇబ్బందులు ఎదుర్కొంటున్నారు.