దేవుడు ఎంత కఠినాత్ముడు... గుండెలవిసిపోయే ఘటన

పుట్టించేది ఆయనే.. గిట్టించేది ఆయనే.. నడుమ ఆడించే నాటకమంతా ఆయన స్క్రిప్టే.. అప్పుడే సంతోషాన్ని పరిచయం చేస్తాడు.. ఆనందపడేలోపే బాధ కూడా ఉంటుందని కష్టాల కడలిలో తోసేస్తాడు. అంతా ఆయన ఆడించే ఆటే. కొన్ని సందర్భాల్లో జరిగే ఘటనలు చూస్తుంటే.. దేవుడు ఎంత కఠినాత్ముడు అనిపిస్తుంటుంది. అచ్చంగా అలా అనిపించే ఘటనే చోటుచేసుకుంది ఖమ్మం జిల్లా సత్తుపల్లిలో. తల్లి కళ్లముందే తన కడుపున పుట్టిన బిడ్డ ప్రాణాలు పోయాయి. అది కూడా దైవ దర్శనానికి వెళ్తున్న సమయంలోనే. రక్తపుముద్దగా మారిన తన బిడ్డను ఒడిలో వేసుకుని గుండెలు పగిలేలా రోధిస్తున్న ఆ తల్లిని చూస్తుంటే.. ప్రతి ఒక్కరి హృదయం దుఃఖంతో బరువెక్కిపోయింది. ఆ విషాదకర సన్నివేశం చూసిన ప్రతి ఒక్కరూ.. ఆ కన్నపేగుకు దేవుడు ఎందుకంత శిక్ష వేశాడు అంటూ నిందిస్తూ ఆవేదన వ్యక్తం చేస్తున్నారు.

ఖమ్మం జిల్లా సత్తుపల్లి మండలం జగన్నాథపురానికి చెందిన ఊకే రాజు, ఏపీలోని నర్సీపట్నానికి చెందిన గుడివాడ ప్రసాద్‌ అనే ఇద్దరు వ్యక్తు.. కిష్టారంలోని సింగరేణి ఓసీ ఓబీ క్యాంపులో మిషన్‌ ఆపరేటర్లుగా పనిచేస్తున్నారు. ఇద్దరూ ఒకే దగ్గర పనిచేస్తుండటంతో.. తమ కుటుంబాలు స్నేహితులుగా మారాయి. ఈ క్రమంలోనే.. ఇరు కుటుంబాలు కలిసి.. ఆదివారం (డిసెంబర్ 1న) ద్వారకా తిరుమల వెళ్లాలని నిర్ణయించుకున్నారు. ఈ క్రమంలో నర్సీపట్నంలోని తన భార్య రాజ్యలక్ష్మి, కుమార్తెలు నిహిత, విఘ్నేశ్వరిలను తీసుకుని ప్రసాద్.. 2 రోజుల క్రితం సత్తుపల్లికి వెళ్లాడు. అక్కడి నుంచే ఇరుకుటుంబాలు కలిసి ఆదివారం రోజు తిరుమలకు బయల్దేరాలనుకున్నారు. మెదట విజయవాడకు వెళ్లి.. అక్కడి నుంచి తిరుపతికి వెళ్లాలని ప్లాన్‌ చేసుకున్నారు.

ముందుగా అనుకున్నట్టుగానే.. ఆదివారం ఉదయం 7 గంటల సమయంలో రాజు, తన భార్య స్వరూపారాణి, కుమారులు యశ్వంత్‌ (5), దీక్షిత్‌తో కలిసి ద్విచక్ర వాహనంపై జగన్నాథపురం నుంచి కిష్టారంలోని ఓబీ క్యాంపు వద్దకు చేరుకున్నాడు. అప్పటికే ప్రసాద్‌ కుటుంబం అక్కడకు చేరుకుని, రాజు కుటుంబం కోసం వేచి చూస్తున్నారు. దీంతో.. స్నేహితుని కుటుంబాన్ని కలుసుకుని.. బస్టాండుకు వెళ్లేందుకు సిద్ధమయ్యారు. కాసేపయితే బస్టాండుకు చేరుకుని.. బస్సెక్కి విజయవాడకు వెళ్లి అమ్మవారి దర్శనం చేసుకుని, అటునుంచి ద్వారకా తిరుమలేశుని దర్శనానికి వెళ్లేవారు.

కానీ.. అంతా మనం అనుకున్నట్టుగానే జరిగితే అది జీవితం ఎలా అవుతుంది. జాతీయ రహదారి పక్కన నిల్చున్న ఇరు కుటుంబాలపైకి లారీ రూపంలో మృత్యువు దూసుకొచ్చింది. వెనక నుంచి వేగంగా దూసుకొచ్చిన ఓ లారీ వాళ్లను వేగంగా ఢీ కొట్టింది. ఈ ఊహించని ప్రమాదంలో రాజు కుమారుడు యశ్వంత్‌ అక్కడికక్కడే దుర్మరణం పాలయ్యాడు. ప్రసాద్‌ నాలుగేళ్ల కుమార్తె నిహితకు తీవ్ర గాయాలయ్యాయి. వీరితోపాటు అక్కడికి వచ్చిన ప్రదీప్‌ కూడా తీవ్రంగా గాయపడ్డాడు.

క్షతగాత్రులను హుటాహుటిన సత్తుపల్లి సీహెచ్‌సీకి తరలించారు. వీరిలో నిహిత పరిస్థితి విషమంగా ఉండటంతో రాజమహేంద్రవరం ఆసుపత్రికి తరలించారు. కుమారుడు యశ్వంత్‌ కళ్లముందే మృతి చెందడంతో తల్లిదండ్రులు తల్లడిల్లిపోయారు. గుండెలు బాదుకుంటూ తన గుండెకోత ఆ దేవుడికి వినిపించే రోధించారు. విగతజీవిగా మారిన తన కుమారుని మృతదేహాన్ని ఒడిలో పెట్టుకుని ఆ తల్లి రోధించిన తీరు.. అందరి మనసులను మెలిపెట్టింది.