టాలీవుడ్ హైదరాబాద్‌ రావటానికి కారణం వాళ్లే.. టీపీసీసీ చీఫ్ ఇంట్రెస్టింగ్ కామెంట్స్

రోజుకో పరిణామంతో తెలంగాణలో పరిస్థితులు రసవత్తరంగా సాగుతున్నాయి. ఏ పరిణామం చోటుచేసుకున్నా అది రాజకీయంగా దుమారం చెలరేగుతోంది. కలుషిత ఆహారంతో విద్యార్థులు ఆస్పత్రుల పాలైనా.. సినిమా థియేటర్‌లో తొక్కిసలాట జరిగినా.. ఆ ఘటనలో హీరో అల్లు అర్జున్ అరెస్టయినా.. ఎటు పెట్టీ చివరికి రాజకీయంగా రచ్చ కావాల్సిందే. అయితే.. ఐకాన్ స్టార్ అల్లు అర్జున్ అరెస్ట్ వ్యవహారం ఇప్పుడు తెలంగాణలోనే కాదు అటు ఆంధ్రప్రదేశ్‌తో పాటు దేశవ్యాప్తంగా చర్చనీయాంశం కాగా.. రెండు తెలుగు రాష్ట్రాల్లో రాజకీయంగా దుమారం చెలరేగింది. అల్లు అర్జున్‌ను ఖండించిన రాజకీయ సినీ ప్రముఖులు.. రేవంత్ రెడ్డి ప్రభుత్వం కావాలనే అరెస్టు చేసిందని పెద్ద ఎత్తున ఆరోపణలు చేస్తున్నారు.

అయితే.. ప్రతిపక్షాలు, సినీ ప్రముఖులు, అభిమానులు చేస్తున్న ఈ ఆరోపణలను కాంగ్రెస్ నాయకులు తిప్పికొడుతున్నారు. అల్లు అర్జున్ అరెస్టుకు తమకు ఎలాంటి సంబంధం లేదని వివరిస్తున్నారు. సీఎం రేవంత్ రెడ్డి కూడా.. ప్రభుత్వంపై వస్తున్న ఆరోపణలను తనదైన శైలిలో ఖండించారు. తాజాగా.. టీపీసీసీ అధ్యక్షుడు మహేష్ కుమార్ గౌడ్ కూడా అల్లు అర్జున్ అరెస్టుపై స్పందిస్తూ.. ఇంట్రెస్టింగ్ కామెంట్స్ చేశారు.

హీరో అల్లు అర్జున్‌పై తమ ప్రభుత్వానికి ఎలాంటి కక్ష లేదని మహేష్ కుమార్ స్పష్టం చేశారు. అయితే.. ఆయన కారణంగా జరిగిన తొక్కిసలాటలో ఓ మహిళ చనిపోతే కూడా అరెస్ట్ చేయొద్దా అని మహేష్ కుమార్ గౌడ్ ప్రశ్నించారు. ఈ క్రమంలోనే.. తెలుగు చిత్ర పరిశ్రమ హైదరాబాద్ రావటానికి.. కాంగ్రెస్ ముఖ్యమంత్రులే కారణమని మహేష్ కుమార్ గౌడ్ చెప్పుకొచ్చారు. దీంతో.. మరో సరికొత్త అంశం చర్చనీయాంశంగా మారింది.

ఇదిలా ఉంటే.. అల్లు అర్జున్‌కు రాజకీయ ప్రముఖులు, దేశవ్యాప్తంగా ఉన్న అన్ని సినిమా ఇండస్ట్రీలు, కేంద్ర మంత్రులు మద్దతుగా నిలిచారు. జాతీయ అవార్డు గ్రహీత.. తెలుగు సినిమాను నేషనల్ స్థాయికి.. అటు నుంచి ఇంటర్నేషనల్ లెవల్‌కి తీసుకెళ్లిన నటున్ని ఒక క్రిమినల్‌గా ట్రీట్ చేయటం సమంజసం కాదని పలువురు అభిప్రాయపడ్డారు. కాగా.. అల్లు అర్జున్ విడుదలైన తర్వాత.. టాలీవుడ్ ఇండస్ట్రీ మొత్తం గీతా ఆర్ట్స్‌కి క్యూ కట్టింది. ఈ క్రమంలోనే.. మహేష్ కుమార్ గౌడ్ చేసిన వ్యాఖ్యలు చర్చనీయాంశంగా మారాయి.