తండ్రి చేసిన ఆ చిన్న తప్పు కూతురికి మరణశాసనమైంది

తండ్రి చేసిన ఒక చిన్న తప్పు.. ఆయన కూతురికి మరణశాసనమైంది. తండ్రి చేసిన పనితో తనకు ఏమాత్రం సంబంధం లేకున్నా.. మొత్తం వివాదం తన మెడకు చుట్టుకోవటంతో.. ఏం చేయాలో తోచని పరిస్థితిలో ఆ యువతి.. చివరికి సెల్ఫీ వీడియో తీసుకుని మరి.. ఆత్మహత్యకు పాల్పడింది. అయితే.. ఈ మొత్తం కథ ఓ కానిస్టేబుల్ భార్య చుట్టూనే తిరగటం గమనార్హం. ఈ విషాదకర ఘటన హైదరాబాద్‌లోని నాచారంలో జరిగింది. అయితే.. ఈ ఘటన కాస్త ఆలస్యంగా వెలుగులోకి వచ్చింది.

నాచారానికి చెందిన దీప్తి అనే యువతి.. హెచ్ఎంటీ నగర్ సరస్వతి కాలనీనిలో తన తల్లితో నివాసం ఉంటుంది. దీప్తి తార్నాక ఐఐసీటీలో పరిశోధక విద్యార్థినిగా ఉంది. దీప్తి తండ్రి సంగీతరావు. అయితే.. రెండేళ్లుగా దీప్తి తన తండ్రితో కాకూడా.. తల్లితో కలిసి వేరుగా నివసిస్తోంది. అయితే.. ఐజీ ఆఫీసులో కానిస్టేబుల్‌గా విధులు నిర్వహిస్తున్న బిల్ల అనిల్.. తన భార్యకు ఐఐసీటీలో అవుట్ సోర్సింగ్ ఉద్యోగం కోసం.. దీప్తి తండ్రిని సంప్రదించాడు. పైగా.. సంగీత రావుకు రూ.15 లక్షలు డబ్బులు ఇచ్చినట్లు తెలుస్తోంది. కానీ.. డబ్బులు తీసుకున్న దీప్తి తండ్రి సంగీతరావు మాత్రం ఇచ్చిన మాట ప్రకారం ఉద్యోగం ఇప్పించలేదు.

రోజులు గడుస్తుండటంతో.. విసుగెత్తిన అనిల్‌ సంగీత రావును డబ్బులు తిరిగి ఇచ్చేయాలని డిమాండ్ చేశాడు. ఎంత అడిగినా సంగీతరావు ఎలాంటి రెస్పాన్స్ ఇవ్వకపోవటంతో.. అనిల్ భార్య అనిత కూడా సీన్‌లోకి ఎంటరైంది. సంగీత రావుతో పాటు ఆయన కుమార్తె అయిన దీప్తి మీద.. అనిల్, అనిత నాచారం పోలీస్ స్టేషన్‌లో ఫిర్యాదు చేశారు. అయితే.. వాళ్లు ఫిర్యాదు చేసేంత వరకు అనిల్ తన తండ్రికి జాబు కోసం తన తండ్రికి డబ్బులు ఇచ్చిన విషయం దీప్తికి ఏమాత్రం తెలియకపోవటం అసలు ట్విస్ట్. ఈ వ్యవహారంలో తనకు ఎలాంటి ప్రమేయం లేదని.. తాను తండ్రితో కలిసి ఉండటం లేదని దీప్తి ఎంత చెప్పినా అనిల్‌, అనిత వినలేదు. డబ్బుల విషయంలో దీప్తి మీద ఒత్తిడి పెంచారు.

అనిల్, అనిత ఫిర్యాదుతో పాటు వాళ్లు పెట్టే వేధింపులతో దీప్తి తీవ్ర మనస్థాపానికి లోనైంది. తనకు ఏమాత్రం సంబంధంలేని వ్యవహారం కావటం.. ఇటు తన తల్లితోనూ చెప్పుకోలేక లోలోపలే మధన పడటం ఆమెను కుంగదీసింది. తనకు జరిగిన అవమానాన్ని తట్టుకోలేక కఠిన నిర్ణయం తీసుకుంది. ఈ క్రమంలోనే.. బుధవారం (డిసెంబర్ 25న) రాత్రి సెల్ఫీ వీడియో తీసుకొని మరీ ఆత్మహత్యకు పాల్పడింది.

కూతురు తన గది నుంచి ఎంతకూ బయటకు రాకపోవడంతో ఏమైందో తెలియక దీప్తి తల్లి గది తలుపు తీసి చూడగా.. విగతజీవిగా కనిపించింది. వెంటనే పోలీసులు సమాచారం ఇవ్వటంతో.. హుటాహుటిన ఘటనా స్థలికి చేరుకున్న పోలీసులు.. కేసు నమోదు చేశారు. దీప్తి ఫోన్‌లో వీడియోను చూసిన తల్లి.. అనిల్, అనిత వేధింపుల వల్లనే చనిపోయిందని ఆరోపించింది. వారి వేధింపుల వల్లే తన కూతురు ఆత్మహత్య చేసుకుందంటూ ఫిర్యాదు చేసింది. ఈ క్రమంలో.. దీప్తి తండ్రి సంగీత రావు, అనిల్‌, అనితను పోలీసులు అదుపులోకి తీసుకుని విచారించనున్నారు.