ఇజ్రాయేల్‌పై ప్రతీకారం.. రూటు మార్చిన ఇరాన్.. ఈసారి అక్కడ నుంచే ప్లాన్!

పశ్చిమాసియాలో ఉద్రిక్తతలు ఏమాత్రం తగ్గుముఖం పట్టకపోగా.. పరిస్థితులు నానాటికీ దిగజారుతున్నాయి. ఇటీవల ఇజ్రాయేల్‌ తమపై చేసిన దాడులతో రగిలిపోతోన్న ఇరాన్‌.. మరోసారి ప్రతీకార దాడికి సిద్ధమవుతున్నట్లు తెలుస్తోంది. అయితే ఈ దాడులు తమగడ్డపై నుంచి కాకుండా ఇరాక్ నుంచి చేయాలని టెహ్రాన్ ప్లాన్ చేసినట్లు ఇజ్రాయేల్ నిఘా వర్గాలకు సమాచారం అందింది. నవంబర్‌ 5న అమెరికా అధ్యక్ష ఎన్నికలు జరగనుండగా.. అంతకుముందే ఈ దాడులు చేసే అవకాశం ఉన్నట్లు సమాచారం. భారీ ఎత్తున డ్రోన్లు, బాలిస్టిక్‌ మిస్సైళ్లు వినియోగించేందుకు ఇరాన్ ఏర్పాట్లు చేస్తున్నట్లు యాక్సియోస్‌ రిపోర్టు వెల్లడించింది.

ఇరాక్‌లోని ఇరాన్‌ అనుకూల మిలిటెంట్ల ద్వారా ఈ దాడి నిర్వహించేందుకు ఆ దేశం సిద్ధమవుతున్నట్లు ఆ నివేదిక పేర్కొంది. ఇజ్రాయేల్‌ మరోసారి ప్రతీకార చర్యలు చేపట్టకుండా ఆ దేశంపై భారీ దాడికి ప్లాన్ చేస్తున్నట్లు వెల్లడైంది. ఈ నేథ్యంలోనే ఇజ్రాయేల్‌పై ప్రతిదాడికి సిద్ధం చేయాలని ఇరాన్ సుప్రీం నేత అయతుల్లా అలీ ఖమేని తన దళాలను ఆదేశించినట్లు ఓ వార్తా సంస్థ కథనం ప్రచురించింది. ఇటీవల ఇజ్రాయేల్‌ జరిపిన దాడుల్లో జరిగిన నష్టం, ప్రతిదాడికి సంబంధించి ఇరాన్ అధికారులు చర్చలు నిర్వహించినట్లు సమాచారం. ఈ సందర్భంలో ఇజ్రాయెల్‌పై దాడికి సిద్ధం కావాలని అలీ ఖమేనీ తన సైనిక అధికారులను ఆదేశించినట్లు వార్తలొచ్చాయి.

ఇందులోభాగంగా టెహ్రాన్‌ దళాలు టెల్‌అవీవ్‌కు చెందిన సైనిక స్థావరాల జాబితాను రూపొందిస్తున్నట్లు అంతర్జాతీయ మీడియా కథనం పేర్కొంది. హమాస్‌ చీఫ్ ఇస్మాయెల్‌ హనీయా, హెజ్బొల్లా చీఫ్‌ సయ్యద్‌ హసన్‌ నస్రల్లా, ఇరాన్‌ రివల్యూషనరీ గార్డ్స్‌కు చెందిన నిల్పోరూషన్‌ మరణానికి ప్రతీకారంగా ఇజ్రాయెల్‌పై ఇరాన్ దాడులకు పాల్పడిన సంగతి తెలిసిందే. అక్టోబరు 1న టెల్‌అవీవ్‌పై దాదాపు 200 బాలిస్టిక్ క్షిపణులతో ఇరాన్‌ విరుచుకుపడింది. దీనికి ప్రతీకారంగా ఇరాన్‌ సైనిక స్థావరాలు, క్షిపణి తయారీ కేంద్రాలపై ఇజ్రాయేల్‌ వైమానిక దాడులు చేసింది.

ఈ దాడుల్లో టెహ్రాన్‌కు చెందిన నలుగురు సైనికులు మృతి చెందగా.. క్షిపణి నిర్వహణ కేంద్రాలు పూర్తిగా ధ్వంసమయ్యాయి. ఈ దాడులను తీవ్రంగా పరిగణిస్తున్నట్లు ఇరాన్ హెచ్చరించింది. అయితే ఈ అంశాన్ని తీవ్రతరం చేయొద్దని, ఇంతటితో ముగించాలని అమెరికా సహా పలు దేశాలు ఇరాన్‌కు సూచించాయి. మరోవైపు, అమెరికాలో అధ్యక్ష ఎన్నికలకు ముందే ఇజ్రాయేల్‌పై ఇరాన్ ప్రతిదాడి చేస్తోందని ఇటీవల ఓ అంతర్జాతీయ వార్తా సంస్థ కథనాన్ని ప్రచురించడం ఆందోళనకు గురిచేస్తోంది. ఈ పరిణామాలు ఎలాంటి పరిస్థితికి దారితీస్తాయోనని ప్రపంచ దేశాలు ఆందోళన వ్యక్తం చేస్తున్నాయి.