పంజాబీ సింగర్ ధిల్లాన్ ఇంటి వద్ద కాల్పుల ఘటన.. వీడియో వైరల్

గత సెప్టెంబరులో కెనడాలోని పంజాబీ గాయకుడు ఏపీ ధిల్లాన్ ఇంటి వద్ద కాల్పులు ఘటన చోటుచేసుకున్న విషయం తెలిసిందే. తాజాగా, ఈ ఘటనకు సంబంధించిన వీడియో వెలుగులోకి వచ్చింది. సెప్టెంబరు 2న జరిగిన ఈ ఘటనలో రెండు కార్లకు దుండుగులు నిప్పంటించారు. వాంకోవర్‌లోని ధిల్లాన్ నివాసం ఉండే బంగ్లా బయట కార్లు దగ్దమవుతున్న వీడియో ప్రస్తుతం వైరల్ అవుతోంది. బాలీవుడ్ హీరో సల్మాన్ ఖాన్ నటించి ఓల్ మనీ సినిమాలో పాట పాడినందుకు ధిల్లాన్‌ను లారెన్స్ బిష్ణోయ్ గ్యాంగ్ టార్గెట్ చేసింది.ఈ కాల్పుల ఘటనకు ఆ గ్యాంగ్ బాధ్యత వహిస్తూ ప్రకటన చేసింది.

తాజాగా, ఈ కేసులో ఒంటారియోకు చెందిన అభిజీత్ కింగ్రా అనే 25 ఏళ్ల భారతీయ యువకుడ్ని కెనడా పోలీసులు అరెస్ట్ చేశారు. అలాగే, విక్రమ్ వర్మ (23) అనే మరో భారతీయుడికి సైతం అరెస్ట్ వారెంట్ జారీ అయ్యింది. కింగ్రాపై ఉద్దేశపూర్వకంగా కాల్పులు, వాహనాలకు నిప్పంటించారనే అభియోగాలు నమోదుచేసినట్టు కెనడా పోలీసులు వెల్లడించారు. నవంబరు 1న అతడ్ని కోర్టులో ప్రవేశపెట్టనున్నారు. ఇక, విక్రమ్ వర్మకు సంబంధించి ఎటువంటి ఫోటోను విడుదల చేయని కెనడా పోలీసులు.. అతడి ఎత్తు, జుత్తు, కళ్ల గురించి వివరాలు తెలిపారు. ప్రస్తుతం వర్మ భారత్‌లో ఉన్నట్టు అనుమానిస్తున్నారు.

పంజాబీ గాయకుడైన ఏపీ ధిల్లాన్... బ్రౌన్ ముండే, ఎక్స్‌క్యూజ్, సమ్మర్ హై, విత్ యూ, దిల్ న్యూ, ఇన్సానే సహా అనేక పంజాబీ ఆల్బమ్‌‌లను రూపొందించారు. కాగా, కెనడాలోని జ్యువెలరీ హౌస్‌లో జరిగిన కాల్పుల ఘటనకు తామే కారణమని బిష్ణోయ్ గ్యాంగ్ ప్రకటించింది. లారెన్స్ బిష్ణోయ్ అనుచరుడు రోహిత్ గోడారా సైతం ధిల్లాన్‌ను చంపుతానని బెదిరింపులకు పాల్పడుతూ సోషల్ మీడియాలో పోస్ట్ పెట్టాడు. గత నెలలో మహారాష్ట్ర మాజీ మంత్రి, సల్మాన్ ఖాన్ స్నేహితుడు బాబా సిద్ధిఖీని లారెన్స్ ముఠా హత్య చేసిన విషయం తెలిసిందే. ఈ ఘటనతో దేశవ్యాప్తంగా లారెన్స్ గ్యాంగ్ గురించి మరోసారి తీవ్ర చర్చ జరుగుతోంది. సల్మాన్‌తో ఎవరు స్నేహం చేసినా ఇదే గతి పడుతుందని హెచ్చరించింది.