రాజధాని నిర్మాణంలో నెదర్లాండ్స్ మోడల్.. ఆ ఇబ్బందులు తప్పినట్టే

ఏపీలో ఇటీవల వరదలు బీభత్సం సృష్టించిన సంగతి తెలిసిందే. బుడమేరు వాగు ఉద్ధృతి కారణంగా విజయవాడ ప్రజలు కొన్నిరోజులు నరకం చూశారు. వరదనీటిలో కాలనీలకు కాలనీలు మునిగిపోవటంతో తిండీనీరు లేక ఇబ్బందులు పడ్డారు. అయితే అమరావతి రాజధాని నిర్మాణం చేపడుతున్న ఏపీ ప్రభుత్వం.. భవిష్యత్తులో ఇలాంటి విపత్తులు రాకుండా జాగ్రత్త పడుతోంది. రాజధాని అమరావతికి వరద ముప్పు లేకుండా చేసేందుకు నెదర్లాండ్స్ తరహా విధానం అనుసరించనున్నారు. అమరావతికి వరద ముప్పును తగ్గించేందుకు, వరదనీటి నిర్వహణ కోసం 217 చదరపు కిలోమీటర్ల పరిధిలో నూతన రిజర్వాయర్లు నిర్మించాలని భావిస్తోంది. కొండవీటి, పాలవాగు వద్ద గ్రావిటీ కెనాల్‌ రిజర్వాయర్లు నిర్మిస్తుండగా.. నీరుకొండ, కృష్ణాయపాలెం, శాఖమూరు, ఉండవల్లి వద్ద అదనపు నీటిని నిలువ చేసేలా రిజర్వాయర్లు నిర్మించనున్నారు.

సోమవారం సీఆర్‌డీఏ సమావేశం జరిగింది. ఈ సమావేశంలో పలు కీలక నిర్ణయాలు తీసుకున్నారు. అమరావతిలో మౌలిక సదుపాయాల అభివృద్ధి లక్ష్యంగా నెదర్లాండ్స్ గ్రావిటీ కెనాల్ సిస్టమ్ అమలు చేయాలని నిర్ణయించారు. అలాగే రింగ్ రోడ్ల నిర్మాణం చేపట్టనున్నారు. జనవరిలోగా వీటన్నింటికీ కొత్తగా టెండర్లు పిలవనున్నారు. మరోవైపు వరద నివారణ ప్రణాళికల అమలుకు రాష్ట్ర ప్రభుత్వం ప్రాధాన్యం ఇస్తుందని మంత్రి నారాయణ చెప్పారు. అమరావతి అభివృద్ధికి ప్రపంచబ్యాంకు రూ.15,000 కోట్లు కేటాయించేందుకు అంగీకరించిందని తెలిపారు. అమరావతి అభివృద్ధికి అవసరమైన నిధులను పొందేందుకు ప్రపంచ బ్యాంకు ప్రతినిధులు కోరినట్లు వరద నివారణ చర్యలను త్వరితగతిన పూర్తిచేస్తామని వెల్లడించారు.

మరోవైపు ప్రపంచంలోని ఐదు అత్యుత్తమ నగరాల్లో ఒకటిగా అమరావతి నిలిచేలా ప్రణాళికలు వేస్తున్నామని మంత్రి నారాయణ తెలిపారు. రాజధాని నిర్మాణ పనులకు డిసెంబర్‌ చివరిలోగా టెండర్లు పిలవాలని అధికారులను ఆదేశించినట్లు చెప్పారు. ప్రస్తుతం మంత్రులు, జడ్జిలు, ఇతర బంగ్లాలకు టెండర్లు పిలిచామని.. అందులో కొన్ని పనులు ఇప్పటికే మొదలయ్యాయని వివరించారు. వరదల నివారణ కోసం 217 చదరపు కిలోమీటర్ల పరిధిలో మూడు కాలువలు వస్తున్నాయన్న నారాయణ.. వైకుంఠపురం, లామ్ సహా మిగిలిన చోట్ల రిజర్వాయర్లు నిర్మించాలని నెదర్లాండ్స్ కంపెనీ సూచించినట్లు చెప్పారు. అన్ని పనుల్ని మూడేళ్లలోపు పనిచేయాలనే లక్ష్యంతో ఉన్నట్లు వివరించారు.