ఫెంగల్ తుఫాను బీభత్సం.. కొండ చరియలు విరిగిపడి ఒకే కుటుంబంలో ఏడుగురు మృతి

తమిళనాడు, పుదుచ్చేరి, ఆంధ్రప్రదేశ్‌ రాష్ట్రాల్లో ఫెంగల్ తుఫాను బీభత్సం సృష్టిస్తోంది. తుఫాను తీరం దాటి 2 రోజులు దాటినా.. దాని ప్రభావంతో భారీగా వర్షాలు కురుస్తున్నాయి. ఈ క్రమంలోనే తమిళనాడులోని తిరువణ్ణామలైలో విషాదకరమైన ఘటన చోటు చేసుకుంది. కొండచరియలు విరిగిపడి ఒకే కుటుంబానికి చెందిన ఏడుగురు ప్రాణాలు కోల్పోవడం తమిళనాడులో తీవ్ర విషాదాన్ని నింపింది. తిరువణ్ణామలై కొండపై నుంచి వీఓసీ నగర్‌లోని ఇళ్లపై కొండ చరియలు విరిగిపడ్డాయి. స్థానికంగా ఉన్న రాజ్‌కుమార్‌ అనే వ్యక్తి ఇంటిపై పెద్ద బండరాయి పడటంతో పూర్తిగా ధ్వంసం అయింది.

ఫెంగల్‌ తుఫాను ప్రభావంతో తమిళనాడులోని చాలా జిల్లాల్లో కుండపోత వర్షాలు పడుతున్నాయి. భారీ వర్షాల కారణంగా ఇప్పటివరకు తమిళనాడులో 21 మంది మృత్యువాత పడ్డారు. ఇక కృష్ణగిరి జిల్లాలో బస్సులు వరద నీటిలో కొట్టుకుపోయాయి. విజుపురం, కడలూరు జిల్లాల్లో భారీ వర్షాలు కురుస్తున్నాయి. తిరువణ్ణామలై జిల్లాలో కురిసిన భారీ వర్షాలకు.. అన్నామలయార్‌ కొండచరియలు విరిగి స్థానికంగా ఉన్న మూడు ఇళ్లపై పడ్డాయి. ఈ ఘటనలో ఒకే కుటుంబానికి చెందిన ఏడుగురు ప్రాణాలు కోల్పోవడం స్థానికంగా తీవ్ర విషాదానికి కారణం అయింది. అయితే 1965 నుంచి ఇప్పటివరకు తిరువణ్ణామలై జిల్లాలో తొలిసారిగా ఇంతటి భారీ వర్షపాతం నమోదైందని తమిళనాడు మంత్రి ఈవీ వేలు వెల్లడించారు.

ఇక కొండచరియలు విరిగిపడే ప్రమాదం ఉన్న ప్రాంతాల్లో ఉన్న ప్రజలను సురక్షిత ప్రాంతాలకు తరలించడంతో భారీ ప్రమాదం తప్పింది. కృష్ణగిరి జిల్లాలో గత 24 గంటల్లోనే 50 సెంటీమీటర్లకు పైగా వర్షపాతం నమోదైనట్లు అధికారులు వెల్లడించారు. ఊతంకర బస్టాండ్‌లో ఆగి ఉన్న బస్సులు కొట్టుకుపోయిన వీడియోలు సోషల్ మీడియాలో తెగ వైరల్ అవుతున్నాయి. పోచంపల్లి పోలీస్ స్టేషన్ కూడా వరద ముంపులో మునిగిపోయింది. ఇళ్లలోకి వరద నీరు చేరి.. జనం తీవ్ర ఇక్కట్లు పడుతున్నారు. విజుపురం, కడలూరు జిల్లాల్లోని కొన్ని ప్రాంతాలు ఇప్పటికీ వరదలతో అల్లాడుతున్నాయి.

ఇక విజుపురం జిల్లాలోనే అధికారులు 49 సహాయ శిబిరాలు ఏర్పాటు చేశారు. ఫెంగల్ తుఫాను కారణంగా చెన్నై-నాగర్‌కోయిల్ వందే భారత్ సహా 10 రైళ్లను అధికారులు రద్దు చేశారు. విజుపురం వద్ద రైల్వే ట్రాక్‌పైకి నీరు చేరింది. ఈ సందర్భంగా తమిళనాడు ముఖ్యమంత్రి ఎంకే స్టాలిన్ విజుపురంలో పర్యటించి వరద బాధితులను పరామర్శించారు. సేలంలోని యెర్కాడ్‌లో కొండచరియలు విరిగిపడ్డాయి. పుదుచ్చేరిలో వర్షం తగ్గిపోవడంతో చాలా చోట్ల నీరు తగ్గుముఖం పట్టింది.