తిరుమల శ్రీవారి భక్తులకు రిలీఫ్.. ఆ ఇబ్బందులు తప్పేలా టీటీడీ కీలక చర్యలు.. ఈవో వెల్లడి

కలియుగ ప్రత్యక్ష దైవం శ్రీనివాసుడు కొలువైన తిరుమలలో సామాన్య భక్తులకు పెద్దపీట వేస్తున్నామని టీటీడీ ఈవో శ్యామలరావు వెల్లడించారు. తిరుమలలో ప్రక్షాళన ప్రారంభించామన్న ఈవో.. ఈ క్రమంలోనే అనేక చర్యలు తీసుకుంటున్నట్లు చెప్పారు. టీటీడీ ఈవో శ్యామలరావు ఆదివారం విలేకర్ల సమావేశం నిర్వహించారు. ఈ సందర్భంగా పలు కీలక విషయాలను ప్రస్తావించారు. తిరుమల శ్రీవారి దర్శనానికి వచ్చే భక్తులు అనధికారిక దుకాణాల ద్వారా ఇబ్బందులు పడుతున్నారని ఈవో చెప్పారు. ఈ నేపథ్యంలో.. తిరుమలలోని అనధికార షాపులు, హాకర్లపై కఠినమైన చర్యలు తీసుకుంటామని చెప్పారు.

తాము బాధ్యతలు చేపట్టిన తర్వాత ఈ ఆరు నెలల కాలంలో తిరుమలలో సామాన్య భక్తులకు మెరుగైన సౌకర్యాల కల్పనకు పటిష్టమైన చర్యలు తీసుకున్నట్లు టీటీడీ ఈవో వెల్లడించారు. సీఎం నారా చంద్రబాబు నాయుడు ఆదేశాలు, సూచనలకు అనుగుణంగా సామాన్య భక్తులకు ప్రాధాన్యమిస్తున్నామని.. తిరుమల పవిత్రత కాపాడేందుకు పటిష్ట చర్యలు తీసుకుంటున్నామని చెప్పారు. సర్వదర్శనం భక్తులు క్యూలైన్లలో వేచి ఉండే సమయాన్ని తగ్గించినట్లు చెప్పారు. అలాగే తిరుపతి లడ్డూ నాణ్యత, పారిశుధ్యం, క్యూలైన్ల నిర్వహణపై ప్రత్యేక దృష్టి పెట్టినట్లు వెల్లడించారు.

తిరుమల లడ్డూ తయారీకి వినియోగించే నెయ్యిని పరీక్షించేందుకు తిరుమలలో అధునాతన ల్యాబ్ ఏర్పాటు చేస్తామన్నారు. ఈ ల్యాబ్‌లో పనిచేసే సిబ్బందికి ప్రత్యేక ట్రైనింగ్ ఇస్తామని టీటీడీ ఈవో చెప్పారు. తిరుమల ప్రసాదాల తయారీకి అవసరమైన ముడిసరుకుల సరఫరా కోసం రిలయన్స్‌తో ఒప్పందం చేసుకున్నామన్న టీటీడీ ఈవో శ్యామలరావు.. జీడిపప్పు, బాదంపప్పు, శనగ పప్పు, కందిపప్పు, ఉద్దిపప్పు వంటి పదార్థాలను రిలయన్స్ సరఫరా చేస్తుందన్నారు. తిరుమలలోని ఆకాశగంగ, పాపవినాశనం తీర్థాలను అభివృద్ధి చేస్తామని.. టీటీడీ పరిధిలోని 61 ఆలయాల అభివృద్ధికి కృషి చేస్తున్నట్లు చెప్పారు.

తిరుమలలో దాతలు నిర్మించిన అతిథి గృహాల పేర్లు మార్చేందుకు చర్యలు తీసుకున్నామన్న ఈవో.. తిరుమలలోని 45 అతిథి గృహాలకు టీటీడీ సూచించే పేర్లను దాతలు ఎంపిక చేయాల్సి ఉంటుందన్నారు. తిరుమల క్షేత్రాన్ని అన్ని ఆధ్యాత్మిక నగరాలకు ఆదర్శంగా నిలిపేలా చర్యలు తీసుకుంటున్నామని.. కాలిబాట, మల్టీ లెవెల్ పార్కింగ్, రోడ్ల విస్తరణ, లింక్ రోడ్డుల నిర్మాణం చేపడతామని టీటీడీ ఈవో చెప్పారు. 42 ఎకరాల్లో బేస్ క్యాంపు ఏర్పాటు, తిరుమలకు వచ్చే వాహనాల నియంత్రణకు చర్యలు తీసుకుంటున్నట్లు వివరించారు.

టీటీడీలోని అన్యమత ఉద్యోగస్తులను ఇతర శాఖలకు బదిలీ చేస్తామని.. లేదంటే వీఆర్ఎస్ అవకాశం కల్పిస్తామని టీటీడీ ఈవో శ్యామలరావు తెలిపారు. హిందూ ధార్మిక పరిషత్ కోసం టీటీడీ ఏటా వందకోట్లు ఖర్చు చేస్తోందన్న ఈవో.. ధార్మిక పరిషత్‌లో లోపాలను గుర్తించామని.. ఆడిట్ నిర్వహిస్తామని స్పష్టం చేశారు. ధార్మిక పరిషత్‌పై నిపుణుల కమిటీ వేసి, సలహాలు సూచనలు తీసుకుంటామన్నారు. ఇక యువతలో భక్తిభావం పెంపొందించేలా చర్యలు తీసుకుంటామన్న టీటీడీ ఈవో.. ఇందుకు చాగంటి సాయం తీసుకోనున్నట్లు చెప్పారు. తిరుమలలోని పెద్ద హోటల్స్, జనతా క్యాంటీన్లపై పాలసీ తెస్తామని వెల్లడించారు.