భద్రతను తగ్గించుకున్న చంద్రబాబు.. ఏపీ సీఎం ఆలోచన బావుంది, మంచి కారణమే!

ఆంధ్రప్రదేశ్ ముఖ్యమంత్రి చంద్రబాబు భద్రతను తగ్గించుకున్నారు. అదేంటి ఎవరైనా భద్రతను పెంచుకుంటారు కదా.. తగ్గించుకోవడం అనుకుంటున్నారా. ఈ నిర్ణయం వెనుక ఓ మంచి కారణమే ఉంది. ముఖ్యమంత్రిగా ప్రమాణ స్వీకారం చేసిన రోజు నుంచి చంద్రబాబు భ్రదత పేరుతో ప్రజల్ని ఇబ్బంది పెట్టొద్దని పదే, పదే చెబుతున్నారు. తిరుమల వెళ్లిన సమయంలో భద్రత పేరుతో పరదాలు కట్టగా.. వెంటనే తొలగించమని చెప్పారు. ఆ తర్వాత కూడా తన కోసం గంటల తరబడి ట్రాఫిక్‌ను ఆపొద్దని సూచించారు. తనను ప్రజలుకు, కార్యకర్తలకు దూరం చేసేలా సెక్యూరిటీ ఉండకూడదని ఆదేశించారు. కానీ నిఘా విభాగం, సెక్యూరిటీ వింగ్ మాత్రం ప్రోటోకాల్ ఉంటుంది కాబట్టి తప్పదంటున్నారు. ఈ క్రమంలో పోలీసులు, ముఖ్యమంత్రి చంద్రబాబు కలిసి కీలక నిర్ణయం తీసుకున్నారు. ఈ మేరకు ముఖ్యమంత్రి భద్రతకు సంబంధించి సాంకేతికతను పెంచి సెక్యూరిటీని తగ్గించారు.

చంద్రబాబు భద్రతకు సంబంధించి సాంకేతిక సాయాన్ని వినియోగిస్తున్నారు పోలీసులు. ఈ మేరకు ముఖ్యమంత్రి సెక్యూరిటీ కూడా గణనీయంగా తగ్గించారు. భారీ భద్రత, బందోబస్తుకు దూరంగా ఉంటున్నారు. అయితే పోలీసులు చంద్రబాబు నివాసంలో అటానమస్ డ్రోన్ల సాయంతో భద్రతను పర్యవేక్షిస్తున్నారు. అంటే సెక్యూరిటీ సిబ్బందిని తగ్గించి.. టెక్నాలజీ సాయం తీసుకోవాలని ముఖ్యమంత్రి ఆదేశించారు. దీంతో అంందుకు తగిన విధంగా చర్యలు తీసుకున్నారు. చంద్రబాబు నివాసం ఉండే ఉండవల్లిలోని ముఖ్యమంత్రి నివాసంలో అత్యాధునిక డ్రోన్‌ను ఏర్పాటు చేశారు పోలీసులు.

పోలీసులు ఈ డ్రోన్ సాయంతో ముఖ్యమంత్రి షెడ్యూల్‌కు తగిన విధంగా ప్రతి రెండు గంటలకు ఒకసారి ఉండవల్లి నివాస పరిసర ప్రాంతాల్లో డ్రోన్‌తో షూట్ చేస్తున్నారు. ఒకవేళ అనుమానాస్పదంగా ఏదైనా కనిపిస్తే.. మానిటరింగ్ టీమ్‌కు సమాచారం అందిస్తారు. చంద్రబాబు నివాసంలో ఏర్పాటు చేసిన ఈ డ్రోన్ అటానమస్ విధానంలో ఆటోపైలట్‌గా ఆ సమయానికి ఎగురుతుంది. మళ్లీ దానికదే డక్‌పై ల్యాండ్ కాగానే ఛార్జింగ్ అవుతుంది. ఈ డ్రోన్ పంపే డేటాను పరిశీలిస్తూ సెక్యూరిటీ అధికారులు ఇంటి పరిసరాల్లో సెక్యూరిటీ పర్యవేక్షిస్తున్నారు.

అదే విధంగా జిల్లాల్లో అధికారులకు కూడా ఇవే ఆదేశాలను పాటించాలని నిర్ణయించారు.. ఈ మేరకు ప్రభుత్వం క్లారిటీ ఇచ్చిందట. ఈ మేరకు తగిన విధంగా ముఖ్యమంత్రి ఆదేశాలతో భద్రతలో మార్పులు చేశారు సెక్యూరిటీ సిబ్బంది. అలాగే గత ప్రభుత్వంలో సీఎంకు 900మందికిపైగా భద్రత కల్పించేవారని.. ప్రస్తుతం చంద్రబాబుకు 121మందితో భద్రత కల్పిస్తున్నట్లు చెబుతున్నారు. గత ప్రభుత్వ హయాంలో ముఖ్యమంత్రి కాన్వాయ్‌‌లో 17 వాహనాలు ఉంటే.. ప్రస్తుతం చంద్రబాబు జడ్ ప్లస్ భద్రత ఉన్న చంద్రబాబు కాన్వాయ్‌లో 11 వాహనాలు ఉన్నాయి. అంటే చంద్రబాబు వీలైనంత వరకు భద్రతను తగ్గించుకున్నారనే చెప్పాలి. మొత్తం మీద ఏపీ ముఖ్యమంత్రి తీసుకున్న నిర్ణయం ఆసక్తికరంగా మారింది.