5 వేల కోట్లతో పెళ్లి.. ఈనెల 28న జెఫ్ బెజోస్ రెండో వివాహం

2019లో విడాకులు తీసుకున్న ధనవంతుడు, అమెజాన్ వ్యవస్థాపకుడు జెఫ్ బెజోస్ మరోసారి పెళ్లి బంధంలోకి అడుగుపెట్టబోతున్నారు. తన ప్రేయసి లారెన్ శాంచెజ్‌ను డిసెంబర్ 28వ తేదీన వివాహం చేసుకోనున్నట్లు అంతర్జాతీయ మీడియా కథనాలు వెల్లడించాయి. కొలరాడోలోని ఆస్పెన్‌లో అతికొద్దిమంది సన్నిహితులు, కుటుంబ సభ్యుల సమక్షంలో జెఫ్ బెజోస్-లారెన్ శాంచెజ్ ఒక్కటి కానున్నట్లు సంబంధిత వర్గాలు వెల్లడించినట్లు మీడియా తెలిపింది. ఇక వీరిద్దరూ వింటర్ వండర్‌ల్యాండ్ వెడ్డింగ్‌ పద్దతిలో పెళ్లి చేసుకోబోతున్నారని సమాచారం.

ఇక 60 ఏళ్ల జెఫ్ బెజోస్ తన రెండో పెళ్లికి భారీగా ఖర్చు చేస్తున్నట్లు తెలుస్తోంది. జెఫ్ బెజోస్-లారెన్ శాంచెజ్ వివాహానికి ఏకంగా రూ. 5096 కోట్లు ఖర్చు పెట్టనున్నట్లు సమాచారం. ఇక గతేడాది మే నెలలోనే జెఫ్ బెజోస్-లారెన్ శాంచెజ్ జంటకు నిశ్చితార్థం జరిగింది. ఫ్రాన్స్‌లో వెకేషన్‌కు వెళ్లిన సందర్భంలో ఓ లగ్జరీ నౌకలో 2.5 మిలియన్‌ డాలర్లు అంటే మన భారత కరెన్సీలో ఏకంగా రూ.21 కోట్ల విలువైన గులాబీ రంగు వజ్రాల ఉంగరం ఇచ్చి జెఫ్ బెజోస్‌ లారెన్ శాంచెజ్‌కు ప్రపోజ్‌ చేసినట్లు అప్పట్లో కథనాలు వెలువడ్డాయి.

ఇక 54 ఏళ్ల లారెన్ శాంచెజ్ గతంలో జర్నలిస్ట్‌‌గా పనిచేశారు. ది వ్యూ, కేటీ టీవీ, ఫాక్స్ 11 వంటి ప్రముఖ ఇంటర్నేషనల్ ఛానెల్స్‌లో రిపోర్టర్‌గానూ, న్యూస్ ప్రజెంటర్‌గా లారెన్ శాంచెజ్ విధులు నిర్వర్తించారు. ఇక లారెన్‌ శాంచెజ్‌కు గతంలో పాట్రిక్ వైట్‌సెల్ అనే వ్యక్తితో పెళ్లి జరగ్గా.. ఆ జంటకు ఇద్దరు పిల్లలు ఉన్నారు. మాజీ ఎన్‌ఎఫ్‌ఎల్‌ ఆటగాడు టోనీ గోంజలెజ్‌తోనూ ఆమె ఒక కుమారుడికి జన్మనిచ్చారు. అయితే జెఫ్ బెజోస్‌కు ఇది రెండో పెళ్లి కాగా.. లారెన్ శాంచెజ్‌కు మాత్రం మూడో వివాహం.

జెఫ్ బెజోస్ తన మొదటి భార్య మెకంజీ స్కాట్‌కు 2019లో విడాకులు ఇచ్చారు. జెఫ్ బెజోస్-మెకంజీ స్కాట్‌ జంటకు మొత్తం నలుగురు పిల్లలు ఉన్నారు. ఇక 2018 నుంచే జెఫ్ బెజోస్‌, లారెన్‌ శాంచెజ్ డేటింగ్‌లో ఉన్నట్లు తెలుస్తోంది. జెఫ్ బెజోస్‌ తన భార్య మెకంజీ స్కాట్‌తో ఉన్న 25 ఏళ్ల బంధానికి స్వస్తి పలుకుతూ 2019లో విడాకులు తీసుకునే వరకు ఆ విషయం బయటికి రాలేదు. ప్రస్తుతం జెఫ్ బెజోస్ ఆస్తి విలువ 251 బిలియన్ డాలర్లు అంటే మన భారత కరెన్సీలో రూ.21.32 లక్షల కోట్లు.