ఒబామా పుస్తకంలో మన్మోహన్ ప్రస్తావన.. అమెరికా మాజీ అధ్యక్షుడు ఏం రాశారంటే

భారత మాజీ ప్రధాన మంత్రి మన్మోహన్ సింగ్‌ మృతికి ప్రపంచ దేశాధినేతలు సంతాపం తెలుపుతున్నారు. ఆయనతో తమకున్న అనుబంధాన్ని వారు ఈ సందర్భంగా గుర్తుకు తెచ్చుకుంటున్నారు. ఇదిలా ఉండగా.. అమెరికా మాజీ అధ్యక్షుడు బరాక్ ఒబామా తన పుస్తకంలో మన్మోహన్ పేరును ప్రస్తావించారు. ‘ఏ ప్రామిస్డ్ ల్యాండ్’ పేరుతో ఒబామా తన జ్ఞాపకాలను 2020లో పుస్తకరూపంలో తీసుకొచ్చిన విషయం తెలిసిందే. అందులో భారత మాజీ ప్రధాని మన్మోహన్ గురించి రాస్తూ.. ‘‘ అత్యంత అసాధారణ ప్రతిభ కలిగిన వ్యక్తి’ అంటూ కొనియాడారు. ఆలోచనాపరుడు, నిజాయతీ కలిగిన వ్యక్తి అని ప్రశంసలు కురిపించారు.

‘‘నిరంతరం భారతీయుల సంక్షేమం కోసమే ఆలోచించారు.. పాటుపడ్డారు.. ప్రతిభావంతుడైన ఆర్థికవేత్తగా, ప్రధానిగా ఆయన చేపట్టిన సంస్కరణలు భారత్‌లోని లక్షలాది మందిని పేదరికం నుంచి బయటపడేశాయి.. తెలివైన, ఆలోచనాత్మకమైన, కపటం లేని నిజాయతీతో కూడిన వ్యక్తిత్వం మన్మోహన్‌ సింగ్ సొంతం’ అని ఒబామా తన పుస్తకంలో రాసుకొచ్చారు.‘భారత ప్రధానిగా మన్మోహన్ సింగ్ పురోగతికి తగిన చిహ్నంగా కనిపించారు: తరుచూ హింసకు గురువుతోన్న సిక్కు సమాజానికి చెందిన నేత దేశంలో అత్యున్నత పదవి చేపట్టారు.. ప్రజల అభిరుచులకు అనుగుణంగా ఎటువంటి అవినీతి లేకుండా ఉన్నత జీవన ప్రమాణాలను కల్పించి వారి విశ్వాసాన్ని గెలుచుకున్న అత్యంత ప్రతిభావంతుడైన సాంకేతికవేత్త’ అని పొగడ్తల్లో ముంచెత్తారు. అమెరికాకు రెండుసార్లు అధ్యక్షుడైన ఒబామా.. 2009 నుంచి 2017 వరకు వైట్‌హౌస్‌లో ఉన్నారు.

ఇక, అమెరికా అధ్యక్షుడి హోదాలో భారత్ పర్యటనకు 2010లో వచ్చిన బరాక్ ఒబామా.. మన్మోహన్‌ను ఓ మంచి స్నేహితుడు అని అన్నారు. అంతేకాదు, తాను కలిసి గొప్ప నాయకుల్లో ఆయన ఒకరని చెప్పారు. అలాగే, లండన్ వేదికగా జరిగిన 2009 జీ20 శిఖరాగ్ర సదస్సులో ఒబామా మాట్లాడుతూ.. ‘భారత అభివృద్ధి, వికాసంలో మన్మోహన్ సింగ్‌ కారణమని చెప్పొవచ్చు. ఈ శిఖరాగ్ర సమావేశం ముగిసే సమయానికి ఆయన నాకు స్నేహితుడు అవుతారని అనుకుంటున్నాను’ అని పేర్కొన్నారు. జీ20 డిన్నర్‌లో కేవలం ఒబామా, మన్మోహన్‌‌లను మాత్రమే ఆహ్వానించారు.

మరో సందర్భంలో తాను భారత్ ప్రధాని మన్మోహన్‌తో సహ ఐదుగుర్ని మాత్రమే స్నేహితులని పిలుస్తానని చెప్పారు. “ఏంజెలా మెర్కెల్ (జర్మనీ), మన్మోహన్ సింగ్ (భారత ప్రధాని), అధ్యక్షుడు లీ (దక్షిణ కొరియా), ఎర్డోగాన్ (టర్కీ ప్రధాని) డేవిడ్ కామెరూన్ (యూకే ప్రధాని) గురించి మీరు అడిగితే వాళ్లు స్నేహితులని చెబుతాను. స్నేహాలు, బంధాలు నమ్మకం, విశ్వాసంతో ఏర్పడతాయి... ప్రభావవంతమైన దౌత్యాన్ని అమలు చేయడానికి మాకు లభించిన దానిలో ఇది గొప్ప అవకాశం’’ అని ఒబామా చెప్పారు.