మన్మోహన్ సింగ్ అంత్యక్రియల్లో గాంధీ కుటుంబ సభ్యులెవరూ పాల్గొనలేదా

భారత మాజీ ప్రధాని మన్మోహన్ సింగ్ అంత్యక్రియలు దేశరాజధాని ఢిల్లీలోని నిగమ్‌బోధ్ ఘాట్‌లో ముగిశాయి. ప్రభుత్వ లాంఛనాలతో, సిక్కు సంప్రదాయం ప్రకారం మాజీ ప్రధాని అంత్యక్రియలను నిర్వహించారు. నిగమ్‌బోధ్ ఘాట్ వద్ద మన్మోహన్ భౌతిక కాయానికి ప్రధాని మోదీ, రాష్ట్రపతి ద్రౌపది ముర్ము తదితరులు నివాళులు అర్పించారు. అంతకు ముందు ఏఐసీసీ ప్రధాన కార్యాలయం నుంచి మన్మోహన్ సింగ్ భౌతిక కాయాన్ని ఊరేగింపుగా నిగమ్‌బోధ్ ఘాట్ వరకు తీసుకెళ్లారు. మన్మోహన్ అంతిమ యాత్రలో కాంగ్రెస్ నేతలెవరూ పాల్గొనలేదని, అంత్యక్రియలకు గాంధీ కుటుంబ సభ్యులు దూరంగా ఉన్నారనే ప్రచారం జరిగింది. ఇది నిజమో కాదో చూద్దాం..

క్లెయిమ్:

‘‘సోనియాను మర్చిపోండి.. రాహుల్, ప్రియాంక కూడా మన్మోహన్ సింగ్ అంత్యక్రియల్లో పాల్గొనలేదు. కుటుంబానికి చెందని కాంగ్రెస్ సభ్యులతో వారు ఇలా వ్యవహరిస్తున్నారు. సిక్కు మన్మోహన్ సింగ్ అయినా, బెంగాలీ బ్రాహ్మణ ప్రణబ్ దా అయినా, ఓబీసీ సీతారాం కేసరి అయినా లేదా తెలుగు పీవీ నరసింహరావు అయినా, వారు వారిని సేవకులుగా చూస్తారు’’ అని మిస్టర్ సిన్హా (X/MrSinha_) అనే యూజర్ డిసెంబర్ 28న ఎక్స్‌లో పోస్టు చేశారు.

‘మన్మోన్ సింగ్ అంతిమ యాత్ర.. ఈ యాత్రకు కాంగ్రెస్ పార్టీ లేదా గాంధీ కుటుంబ సభ్యులు ఎవరూ హాజరుకాలేదని సోర్సులు చెబుతున్నాయి!’ అని తెలంగాణ మాట (X/TelanganaMaata) అనే ఎక్స్‌ పేజీలో పోస్టు చేశారు.

వాస్తవమేంటి..?

మన్మోహన్ సింగ్ అంతిమ యాత్రలో కాంగ్రెస్ పార్టీ నేతలు లేదా గాంధీ కుటుంబ సభ్యులెవరూ పాల్గొనలేదనే ప్రచారం వాస్తవమా కాదా అని తేల్చడం కోసం మన్మోహన్ అంతిమ యాత్ర (Manmohan Singh Final Journey) అని గూగుల్‌లో వెతకగా.. ఎన్డీటీవీ ఛానెల్ యూట్యూబ్‌లో మాజీ ప్రధాని మన్మోహన్ సింగ్ ఫైనల్ జర్నీ పేరిట పోస్టు చేసిన వీడియో కనిపించింది. ఇందులో 6 నిమిషాల 10 సెకన్ల సమయంలో.. పుష్పాలతో అలంకరించిన మిలటరీ వాహనంలో రాహుల్ గాంధీ కూర్చొని కనిపించారు.

అలాగే రిపబ్లిక్ టీవీ ఎక్స్‌ పేజీలో మన్మోహన్ సింగ్ అంతిమ యాత్రలో రాహుల్ గాంధీ పాల్గొన్న వీడియో కనిపించింది. అంతే కాకుండా రాహుల్ గాంధీ పక్కనే రేవంత్ రెడ్డి కూడా ఈ అంతిమయాత్రలో పాల్గొన్న ఫొటోలు ఆనంద్ సింగ్ (X/Anand_Journ) అనే జర్నలిస్ట్ తన ఎక్స్ ఖాతాలో పోస్టు చేశారు.

ఇక అంత్యక్రియల్లో సోనియా, రాహుల్, ప్రియాంక గాంధీల్లో ఒక్కరు కూడా పాల్గొనలేదనే ప్రచారం నిజమో కాదో తెలుసుకోవడానికి కూడా సజగ్ టీమ్ ప్రయత్నించింది.

sonia in manmohan funeral అనే కీవర్డ్‌తో ఎక్స్‌లో సెర్చ్ చేయగా.. సీపీపీ చైర్‌పర్సన్ సోనియా గాంధీ మాజీ ప్రధాన మంత్రి డాక్టర్ మన్మోహన్ సింగ్‌కు నిగమ్ బోధ్ ఘాట్‌లో కడసారి వీడ్కోలు పలుకుతున్నారు’ అనే క్యాప్షన్‌తో న్యూస్ ఏజెన్సీ ఏఎన్ఐ వీడియోను కాంగ్రెస్ (X/INCIndia) ఎక్స్ అకౌంట్‌లో పోస్టు చేశారు. 25 సెకన్ల నిడివి ఉన్న ఈ వీడియోలో.. సోనియా గాంధీ మన్మోహన్ భౌతిక కాయానికి నివాళులు అర్పించడాన్ని చూడొచ్చు.

అంతే కాదు నిగమ్ బోధ్‌లో మన్మోహన్ కుటుంబ సభ్యులతోపాటు ఆయన పార్థీవ దేహాన్ని రాహుల్ గాంధీ సైతం తన భుజాలపై మోశారు. న్యూస్ ఏజెన్సీ ఏఎన్ఐకి చెందిన ఈ వీడియోను అంకిత్ మయాంక్ (X/mr_mayank) అనే యూజర్ ఎక్స్‌లో పోస్టు చేశారు.

మాజీ ప్రధానికి అంతిమ వీడ్కోలు పలికేందుకు నిగమ్ బోధ్ ఘాట్‌కు చేరుకున్న కాంగ్రెస్ ఎంపీ ప్రియాంక గాంధీ వాద్రా అంటూ టైమ్స్ ఆఫ్ ఇండియా ఎక్స్ పేజీలో వీడియోను పోస్టు చేశారు.

మన్మోహన్ సింగ్ అంత్యక్రియల్లో మోదీ, అమిత్ షా, గాంధీ కుటుంబం పాల్గొన్నారని.. ఇండియన్ ఎక్స్‌ప్రెస్ ఇంగ్లిష్ వెబ్‌సైట్ మన్మోహన్ సింగ్ అంత్యక్రియల లైవ్ అప్డేట్స్ పేజీలో ప్రస్తావించారు.

అసలు వాస్తవం ఇది...?

జాతీయ మీడియా కథనాలు, వీడియోలు, సోషల్ మీడియాలో అందుబాటులో ఉన్న ఫొటోలు, వీడియోలను పరిశీలించిన తర్వాత మన్మోహన్ సింగ్ అంత్యక్రియల్లో గాంధీ కుటుంబం పాల్గొనలేదనే ప్రచారంలో నిజం లేదని తేలింది.

మీకు వాస్తవాలు తెలియజెప్పడం మా బాధ్యత

నిజాల కంటే అబద్ధాలు చాలా వేగంగా వ్యాప్తి చెందుతాయి. ఫేక్ న్యూస్, తప్పుదోవ పట్టించే వాట్సాప్ మెసేజ్‌లు, ఫేక్ వైరల్ పోస్టుల పట్ల అప్రమత్తంగా ఉండటం మనందరి బాధ్యత. మీరు కూడా అలాంటి మెసేజ్‌, పోస్ట్ లేదా మీకు సందేహం ఉన్న ఏదైనా లింక్‌ మీ వరకు వస్తే, నిజ నిర్ధారణ కోసం దాన్ని మాకు పంపవచ్చు. నకిలీ వార్తలను పరిశీలించే మా టీం పూర్తి నిబద్ధతతో ఎంక్వైయిరీ చేస్తుంది, నిజానిజాలను మీకు తెలియజేస్తుంది.

కింద ఇచ్చిన Google ఫామ్‌ను ఫిల్‌ చేయడం ద్వారా మీరు ఫేక్‌ అని భావించే వైరల్ పోస్టులు లేదా వీడియోలను మాకు పంపవచ్చు. వాస్తవాన్ని తెలుసుకోవడానికి ఇక్కడ క్లిక్ చేయండి