ఆ 9 కొత్త జిల్లాల ఏర్పాటు రద్దు.. సర్కార్ సంచలన నిర్ణయం

రాజస్థాన్‌లో అధికారంలో ఉన్న బీజేపీ సర్కార్ కీలక నిర్ణయం తీసుకుంది. ఇప్పటివరకు రాజస్థాన్‌లో 50 జిల్లాలు, 10 డివిజన్లు ఉండగా.. తాజాగా ముఖ్యమంత్రి భజన్ లాల్ శర్మ.. అందులో 9 జిల్లాలను, 3 డివిజన్లను రద్దు చేశారు. దీంతో ప్రస్తుతం ఆ రాష్ట్రంలో కేవలం 41 జిల్లాలు, 7 డివిజన్లు మాత్రమే ఉండనున్నాయి. గతంలో రాజస్థాన్‌లో కాంగ్రెస్ పార్టీ అధికారంలో ఉన్నపుడు.. అప్పటి ముఖ్యమంత్రి అశోక్ గెహ్లాత్.. కొత్తగా ఏర్పాటు చేసిన జిల్లాలు, డివిజన్ల నుంచి.. 9 జిల్లాలు, 3 డివిజన్లను రద్దు చేస్తూ.. ప్రస్తుత బీజేపీ ప్రభుత్వం శనివారం సంచలన నిర్ణయం తీసుకుంది.

ముఖ్యమంత్రి భజన్ లాల్ శర్మ నేతృత్వంలో శనివారం భేటీ అయిన రాజస్థాన్ కేబినెట్.. ఈ నిర్ణయానికి ఆమోద ముద్ర వేసింది. అశోక్ గెహ్లాత్ నేతృత్వంలోని కాంగ్రెస్ ప్రభుత్వం కొత్తగా 17 జిల్లాలను, 3 డివిజన్లను ఏర్పాటు చేసింది. అయితే అందులో 9 జిల్లాలు, 3 డివిజన్లను తాజాగా తొలగిస్తూ రాజస్థాన్ మంత్రివర్గం కీలక నిర్ణయం తీసుకుంది. రద్దు చేసిన డివిజన్లలో పాలి, సికార్, బన్స్వారా ఉన్నాయి. ఇక జిల్లాల విషయానికి వస్తే.. దూడు, కేక్రి, నీమ్‌కథానా, గంగాపూర్ సిటీ, జైపూర్ రూరల్, జోధ్‌పూర్ రూరల్, అనుప్‌గఢ్, సాంచోర్, షాపురా జిల్లాలను రాజస్థాన్ ప్రభుత్వం రద్దు చేసింది. ఈ నిర్ణయం తర్వాత రాజస్థాన్‌లో ప్రస్తుతం 41 జిల్లాలు, 7 డివిజన్లు ఉన్నాయి.

గతంలో రాజస్థా్న్‌ ముఖ్యమంత్రి అశోక్ గెహ్లాట్ నేతృత్వంలోని కాంగ్రెస్ ప్రభుత్వం.. కొత్తగా 17 జిల్లాలు ఏర్పాటు చేసింది. అందులో 9 జిల్లాలను తాజాగా బీజేపీ ప్రభుత్వం రద్దు చేసింది. ఇక రాజస్థాన్ కేబినెట్ నిర్ణయాలను మంత్రులు సుమిత్ గోదారా, జోగారామ్ పటేల్.. మీడియా సమావేశంలో వివరించారు. రాజస్థాన్ కేబినెట్ సమావేశంలో తీసుకున్న నిర్ణయం ప్రకారం.. డుడు, కేక్రీ, షాపురా, నీమ్‌కథానా, గంగాపూర్ సిటీ, జైపూర్ రూరల్, జోధ్‌పూర్ రూరల్, అనుప్‌గఢ్, సంచోర్ జిల్లాలను రద్దు చేసినట్లు వెల్లడించారు. ఇక బలోత్రా, ఖైర్తాల్-తిజారా, బీవార్, కోట్‌పుట్లీ-బహరోడ్, దిద్వానా-కుచమన్, ఫలోడి, డీగ్, సన్లుబర్ జిల్లాలు అలాగే కొనసాగుతాయని పేర్కొన్నారు.

అశోక్ గెహ్లాత్ నేతృత్వంలోని కాంగ్రెస్ ప్రభుత్వం.. రాజస్థాన్ అసెంబ్లీ ఎన్నికలకు ముందు చివరి దశలో 17 జిల్లాలు, 3 డివిజన్లను ఏర్పాటు చేసింది. అయితే జిల్లాలు, డివిజన్లను రద్దు చేస్తూ రాజస్థాన్ బీజేపీ సర్కార్ తీసుకున్న నిర్ణయం పట్ల కాంగ్రెస్ పార్టీ తీవ్రంగా విమర్శలు గుప్పించింది. ప్రజల సౌకర్యం కోసం గత ప్రభుత్వం కొత్త జిల్లాలను ఏర్పాటు చేసి కాంగ్రెస్ పార్టీ చారిత్రాత్మక పని చేసిందని తెలిపింది. అలాంటి నిర్ణయాన్ని వెనక్కి తీసుకుంటూ రాజకీయ పక్షపాతంతోనే భజన్ లాల్ శర్మ ప్రభుత్వం కొత్త జిల్లాలను, డివిజన్లను రద్దు చేసిందని హస్తం పార్టీ తీవ్రంగా తప్పుపట్టింది.