గంటకు 450 కిలోమీటర్ల వేగంతో దూసుకెళ్లే రైలు.. ఖర్చు తక్కువ, స్పీడు ఎక్కువ

మరో హైస్పీడ్ రైలును చైనా అందుబాటులోకి తీసుకువచ్చింది. ఈ రైలుకు నిర్వహించిన ట్రయల్ రన్‌లో ఏకంగా గంటకు 453 కిలోమీటర్ల వేగంతో ప్రయాణించి.. అబ్బురపరిచినట్లు అధికారులు వివరించారు. సీఆర్‌450గా పిలిచే ఈ హైస్పీడ్ రైలుకు ఆదివారం చైనా రాజధాని బీజింగ్‌లో ట్రయల్స్ నిర్వహించారు. గంటకు 400 కిలోమీటర్ల వేగంతో ఈ సీఆర్450 రైలు.. పట్టాలపై పరుగులు తీసినట్లు అధికారులు వెల్లడించారు. మరోవైపు.. ఈ రైలు మిగిలిన రైళ్ల కంటే డిజైన్‌ విషయంలో చాలా మార్పులు తీసుకువచ్చినట్లు స్పష్టం చేశారు. అధిక వేగంతో వెళ్లేందుకు దాని ఆకృతిలో మార్పు చేసినట్లు తెలిపారు.

ఈ సీఆర్450 రైలు చూడడానికి చాలా సన్నగా, బుల్లెట్‌ లాంటి ఆకారంతో ఉంటుందని చైనా రైల్వే అధికారులు చెప్పారు. ఈ రైలు అత్యధికంగా గంటకు 450 కిలోమీటర్ల వేగాన్ని అందుకుంటుందని తెలిపారు. అయితే ఈ రైలు ప్రయాణికులకు అందుబాటులోకి వస్తే.. ప్రస్తుతం ప్రపంచంలోనే అత్యంత స్పీడుతో నడిచే రైలుగా నిలుస్తుందని చైనా అధికారులు చెబుతున్నారు. ఈ సీఆర్450 రైలు ఎక్కితే బీజింగ్‌ నుంచి షాంఘైకి కేవలం రెండున్నర గంటల్లోనే ప్రయాణించవచ్చని తెలిపారు. ప్రస్తుతం బీజింగ్ నుంచి షాంఘైకి వెళ్లాలంటే 4 గంటల సమయం పడుతోంది.

ప్రస్తుతం ప్రపంచంలో ఎక్కడా లేని విధంగా చైనాలోని హైస్పీడ్‌ రైలు నెట్‌వర్క్ విస్తరించి ఉంది. చైనాలో మొత్తం 45 వేల కిలోమీటర్ల పొడవునా హైస్పీడ్ రైలు ట్రాక్‌లు నిర్మించారు. సీఆర్‌450 రైలుకు డిసెంబర్‌లో పరీక్షలు నిర్వహిస్తామని ఈ ఏడాది సెప్టెంబర్‌లోనే చైనా ప్రభుత్వరంగ రైల్వే సంస్థ పేర్కొంది. ఇక చైనా 14వ పంచవర్ష ప్రణాళికలో భాగంగా ఈ సీఆర్450 రైల్వే ప్రాజెక్టును చేపట్టారు. దీనికింద హైస్పీడ్‌ రైళ్లు, వంతెనలు, ట్రాక్‌లు, సొరంగాలు నిర్మించాలని చైనా నిర్ణయించింది.

అయితే ఈ సీఆర్450 రైలు బరువు కేవలం 10 టన్నులు మాత్రమేనని.. ప్రస్తుతం అందుబాటులో ఉన్న సీఆర్‌400 మోడల్‌ కంటే ఇది 12 శాతం బరువు తక్కువ అని అధికారులు వెల్లడించారు. ఇక ఈ సీఆర్450 రైలు 20 శాతం తక్కువ విద్యుత్‌ను తీసుకుంటుందని చెబుతున్నారు. అంతేకాకుండా గత సీఆర్400 మోడల్‌ కంటే అదనంగా 50 కిలోమీటర్ల అధిక వేగంతో ప్రయాణించగలదని తెలిపారు. ఇక ఈ సీఆర్450 రైలు.. ఇంజిన్‌ పరీక్షల్లో అత్యధికంగా గంటకు 453 కిలోమీటర్ల వేగాన్ని అందుకుందని చెప్పారు.

మరోవైపు.. ఇలాంటి హైస్పీడ్ రైళ్లు మాత్రమే కాకుండా చైనా రక్షణ సామాగ్రిని సైతం అత్యాధునికంగా తయారు చేసుకుంటుంది. 2 రోజుల క్రితమే ఆరో తరానికి చెందినదిగా చెబుతున్న జె-36 యుద్ధ విమానాన్ని చైనా ఆవిష్కరించింది. సిచువాన్‌ ప్రావిన్స్‌లోని చెంగ్డూలో ఈ జె-36 ఫైటర్ జెట్‌ను అభివృద్ధి చేసినట్లు తెలుస్తోంది. ఈ జె-36 ఫైటర్ జెట్‌కు మూడు ఇంజిన్లు ఉన్నట్లు సమాచారం. ఇది అమెరికాకు చెందిన ఎఫ్‌-35, ఎఫ్‌-22 రాప్టర్లకు ధీటుగా తయారు చేసినట్లు సమాచారం.