ఏపీలో మహిళలకు ఉచిత బస్సు ప్రయాణం.. ఆ పండగ నుంచే ప్రారంభం

ఆంధ్రప్రదేశ్ అసెంబ్లీ ఎన్నికల సందర్భంగా తెలుగుదేశం-జనసేన-బీజేపీ నేతృత్వంలోని కూటమి.. ప్రకటించిన సూపర్ సిక్స్ పథకాలను చంద్రబాబు ప్రభుత్వం ఒక్కొక్కటిగా అమలు చేస్తోంది. ఇక ఎప్పటి నుంచో ఆంధ్రప్రదేశ్‌ మహిళలు ఎదురుచూస్తున్న ఉచిత బస్సు ప్రయాణానికి సంబంధించి మరో కీలక అప్‌డేట్ ఇప్పుడు బయటికి వచ్చింది. ఉగాది పండగను పురస్కరించుకుని.. అప్పటి నుంచి ఈ పథకానికి శ్రీకారం చుట్టాలని కూటమి ప్రభుత్వం కసరత్తు చేస్తోంది. ఏపీలో మహిళలకు ఉచిత బస్సు ప్రయాణానికి సంబంధించి.. సోమవారం అధికారులతో సీఎం చంద్రబాబు కీలక సమావేశం నిర్వహించారు.

ఉగాది పండగ నుంచి మహిళలకు ఉచిత బస్సు ప్రయాణం కల్పించే దిశగా ప్రభుత్వం చర్యలు మరింత వేగవంతం చేసింది. తాజాగా సోమవారం ముఖ్యమంత్రి నారా చంద్రబాబు నాయుడు ఉన్నతాధికారులతో కీలక సమావేశం నిర్వహించారు. ఈ భేటీకి ఏపీ రవాణా శాఖ మంత్రి రాం ప్రసాద్‌రెడ్డి, డీజీపీ ద్వారకా తిరుమలరావు, ఆర్టీసీ ఎండీ సహా ఇతర ఉన్నతాధికారులు హాజరయ్యారు. ఈ సందర్భంగా రాష్ట్రంలో మహిళలకు ఉచిత బస్సు ప్రయాణం అమలు చేసే అంశంపై అధికారులు తీసుకుంటున్న చర్యలపై ముఖ్యమంత్రి అడిగి తెలుసుకున్నారు.

అయితే ఇప్పటికే ఈ మహిళలకు ఉచిత బస్సు విధానం అమలులో ఉన్న ఢిల్లీ, కర్ణాటక, తెలంగాణ రాష్ట్రాల్లో పరిస్థితిని అధ్యయనం చేస్తామని అధికారులు వెల్లడించారు. దీనిపై వీలైనంత త్వరగా సమగ్ర నివేదికను అందజేయాలని.. అధికారులకు సీఎం చంద్రబాబు ఆదేశాలు జారీ చేశారు. అయితే ఉగాది పండగ నాటికి ఈ ఉచిత బస్సు పథకం అమల్లోకి తెచ్చేలా పనులు వేగవంతం చేయాలని అధికారులకు సీఎం చంద్రబాబు దిశానిర్దేశం చేశారు.

ఇక ఉచిత బస్సు ప్రయాణం అమలుకు సంబంధించి ఇప్పటికే ప్రభుత్వం ముగ్గురు మంత్రులతో కేబినెట్ సబ్ కమిటీని ఏర్పాటు చేసింది. అయితే అధికారులు ఇచ్చిన నివేదికను పరిశీస్తున్న కేబినెట్ సబ్ కమిటీ.. ఇప్పటికే ప్రాథమికంగా కొన్ని అంచనాలు వేసింది. ఈ ఉచిత బస్సు పథకాన్ని అందుబాటులోకి తీసుకువస్తే.. రోజుకు 10 లక్షల మంది ప్రయాణికులు ఎక్కుతారని అంచనా వేస్తున్నారు. ఇందుకోసం ప్రస్తుతం రాష్ట్రంలో నడుస్తున్న బస్సులకు అదనంగా మరో 2వేల బస్సులు, 11వేలకుపైగా సిబ్బందిని అవసరం అవుతాయని పేర్కొన్నారు.

ఏపీలో నిత్యం ఆర్టీసీ బస్సుల్లో సగటున రోజుకు 27 లక్షల మంది ప్రయాణాలు చేస్తున్నారు. ఇందులో ఏసీ బస్సులు, సూపర్ లగ్జరీ, అల్ట్రా డీలక్స్‌ బస్సుల్లో రోజుకు 3 లక్షలమంది ప్రయాణిస్తున్నారు. అంటే ఎక్స్‌ప్రెస్, పల్లె వెలుగు, అల్ట్రా పల్లె వెలుగు బస్సుల్లో మిగిలిన 24లక్షలమంది ప్రయాణాలు చేస్తున్నారు. ప్రస్తుతం టికెట్ల ద్వారా రోజు సగటున రూ.16 కోట్ల నుంచి రూ.17 కోట్ల రాబడి ఆర్టీసీకి వస్తోంది. ఇందులో మహిళా ప్రయాణికుల ద్వారా రూ.6 నుంచి 7 కోట్లు వస్తోందని అంచనా. మహిళలకు ఉచిత బస్సు పథకం అమలు చేస్తే.. ఆర్టీసీకి నెలకు రూ.200 కోట్లు ఆదాయం తగ్గుతుందని అధికారులు అంచనా వేస్తున్నారు.