ఏపీలో కొత్త వైన్‌ షాపులతో భారీగా మద్యం విక్రయాలు.. ఈ 75 రోజుల్లో ఎంత తాగారంటే

ఆంధ్రప్రదేశ్‌లో గత వైసీపీ ప్రభుత్వ హయాంలో ప్రభుత్వమే మద్యం షాపులు నడిపేది. ఈ ఏడాది అధికారంలోకి వచ్చిన కూటమి ప్రభుత్వం.. ఆ విధానాన్ని రద్దు చేసి మళ్లీ పాత విధానాన్ని తీసుకువచ్చిన విషయం తెలిసిందే. ఈ నేపథ్యంలోనే కొత్త మద్యం షాపులు వచ్చిన తర్వాత.. ఏపీలో లిక్కర్‌ సేల్స్‌ భారీగా పెరిగాయని ఎక్సై్జ్‌ శాఖ తెలిపింది. ప్రభుత్వ మద్యం షాపుల విధానాన్ని రద్దు చేసిన చంద్రబాబు ప్రభుత్వం.. ప్రైవేటు మద్యం షాపులకు టెండర్లు పిలిచి.. ఈ ఏడాది అక్టోబర్ 16వ తేదీన కేటాయించింది. ఈ నేపథ్యంలోనే అక్టోబర్ 16వ తేదీ నుంచి డిసెంబర్ 29వ తేదీ వరకు ఆంధ్రప్రదేశ్ వ్యాప్తంగా జరిగిన మద్యం విక్రయాలకు సంబంధించిన లెక్కలను తాజాగా ఏపీ ఎక్సైజ్ శాఖ అధికారులు ప్రకటించారు.

అక్టోబర్ 16వ తేదీ నుంచి డిసెంబర్‌ 29వ తేదీ వరకు రాష్ట్రవ్యాప్తంగా రూ.6312 కోట్ల రూపాయల విలువైన మద్యం అమ్మకాలు జరిగినట్టు తెలిపింది. మొత్తం 75 రోజుల్లో 26.79 లక్షల కేసులు బీర్లు అమ్ముడు పోయాయని వెల్లడించింది. అదే సమయంలో 83.75 లక్షల కేసుల మద్యం విక్రయించినట్లు పేర్కొంది. ఆంధ్రప్రదేశ్ వ్యాప్తంగా ఉన్న బార్లు, వైన్ షాపులు కలిపి మొత్తంగా ఈ అమ్మకాలు జరిగినట్టు ఏపీ ఎక్సైజ్ శాఖ స్పష్టం చేసింది. ఇక డిసెంబర్ 31వ తేదీ, జనవరి 1వ తేదీకి సంబంధించి.. ఇప్పటికే మద్యం షాపులు, బార్ల నుంచి వచ్చిన ఇండెంట్ ఆధారంగా ఈ రోజుకి ఆరోజు సరుకును పంపుతున్నట్టు ఎక్సైజ్ శాఖ అధికారులు వెల్లడించారు.

ఇక గత ప్రభుత్వం అందుబాటులో ఉంచిన బ్రాండ్లను పూర్తిగా రద్దు చేసిన కొత్త ప్రభుత్వం.. వాటి స్థానంలో 2019కి ముందు అందుబాటులో ఉన్న పాత బ్రాండ్లను మళ్లీ తీసుకువచ్చింది. తక్కువ ధరలకు నాణ్యమైన మద్యం అందిస్తామని ఇప్పటికే హామీ ఇచ్చిన చంద్రబాబు ప్రభుత్వం అదే చేస్తోంది. మరోవైపు.. న్యూ ఇయర్ సందర్భంగా మరింత ఎక్కువగా మద్యం విక్రయాలు సాగుతాయని అటు మద్యం షాపు ఓనర్లు.. ఇటు ప్రభుత్వం అంచనా వేస్తోంది. డిసెంబర్‌ 30, 31వ తేదీలతో పాటు.. జనవరి 1వ తేదీనా మద్యం అమ్మకాలు మరింత పెరుగుతాయని పేర్కొంటున్నారు. మరికొన్ని రోజుల్లోనే సంక్రాంతి పండగ రానున్న నేపథ్యంలో మద్యం విక్రయాల్లో మరింత భారీగా పెరుగుదల ఉంటుందని అంచనాలు వేస్తున్నారు.