కేరళ మినీ పాకిస్థాన్.. అందుకే అన్నాచెల్లెళ్లు ఎంపీలయ్యారు.. మంత్రి వివాదాస్పద వ్యాఖ్యలు

మహారాష్ట్ర మంత్రి, బీజేపీ నేత నితేశ్ రాణే నోరుజారి వివాదంలో ఇరుక్కున్నారు. కేరళను మినీ పాకిస్థాన్‌గా అభివర్ణించిన ఆయన.. అక్కడ ప్రజలను ఉగ్రవాదులతో పోల్చారు. అందుకే రాహుల్ గాంధీ, ఆయన సోదరి ప్రియాంక గాంధీలు ఎంపీలు గెలిచారని వ్యాఖ్యానించారు. ఔరంగజేబు సేనాని అప్ఘల్‌ఖాన్‌పై ఛత్రపతి శివాజీ మహరాజ్ చారిత్రక విజయం సాధించిన సందర్భాన్ని పురస్కరించుకుని ముంబయిలో సోమవారం ఓ కార్యక్రమం నిర్వహించారు. ఈ కార్యక్రమంలో పాల్గొన్న మహారాష్ట్ర మత్స్య శాఖ మంత్రి నితీశ్ రాణే చేసిన వ్యాఖ్యలపై తీవ్ర దుమారం రేగుతోంది.

నితేశ్ రాణే మాట్లాడుతూ.. ‘‘కేరళ మీనీ పాకిస్థాన్‌కు ఏమాత్రం తీసిపోదు. అందువల్లే అక్కడ రాహుల్, ఆయన సోదరి విజయం సాధించారు... ఉగ్రవాదులంతా వారికి ఓటేశారు. నేను వాస్తవమే మాట్లాడుతున్నారు. టెర్రరిస్టుల మద్దతుతోనే వాళ్లు ఎంపీలయ్యారు'’ అని రాణే వివాదాస్పద వ్యాఖ్యలు చేశారు. 2019 ఎన్నికల్లో అమేధీ, వయనాడ్ నుంచి పోటీచేసిన రాహుల్ గాంధీ.. వయనాడ్‌లో గెలిచారు. ఈసారి ఎన్నికల్లో వయనాడ్, రాయబరేలిలో పోటీచేసిన రాహుల్ రెండు చోట్ల విజయాన్ని అందుకున్నారు. అయితే, వయనాడ్ స్థానానికి ఆయన రాజీనామా చేయడంతో అక్కడ జరిగిన ఉప ఎన్నికల్లో ప్రియాంక గాంధీ వాద్రా విజయం సాధించారు.

అయితే, రాణే వ్యాఖ్యలపై కాంగ్రెస్, ఎన్సీపీ (శరద్ పవార్), శివసేన (యూబీటీ) సహా ప్రముఖ జర్నలిస్ రాజ్‌దీప్ సర్దేశాయ్ విమర్శలు గుప్పించారు. ఇలాంటి వాళ్లు అసెంబ్లీలో జైల్లో ఉండాలని రాజ్‌దీప్ ట్వీట్ చేశారు. కాంగ్రెస్ నేత పవన్ ఖేర్ మాట్లాడుతూ.. ‘వచ్చే ఎన్నికల్లో కేరళ నుంచి బీజేపీ పోటీ చేస్తుందో లేదో మీ పార్టీ అధ్యక్షుడు జేపీ నడ్డాను అడగండి... రాజ్యాంగ వ్యతిరేక వ్యాఖ్యలు చేయడం కమలం పార్టీ నేతలకు అలవాటుగా మారిపోయింది’ అని మండిపడ్డారు. ఇక, రాణే వ్యాఖ్యలను పరిగణనలోకి తీసుకుంటారో లేదో చెప్పాలని మహారాష్ట్ర సీఎం దేవేంద్ర ఫడ్నవిస్‌ను ఎన్‌సీపీ (ఎస్‌పీ) నిలదీసింది. మోదీ మెజార్టీ లక్షకు పడిపోవడంతో ఆందోళన చెందుతున్న బీజేపీ నేతలు.. వయనాడ్‌లో ప్రియాంక గాంధీ గెలుపును జీర్ణించుకోలేకపోతున్నారని శివసేన (యూబీటీ) దుయ్యబట్టింది.

ఆయన్ను ఇంకా మంత్రి పదవిలో ఎందుకు కొనసాగిస్తున్నారని కాంగ్రెస్ అధికార ప్రతినిధి అతుల్ లోంధే పాటిల్ విమర్శించారు. ‘భారత సార్వభౌమాధికారం, ఐక్యతను కాపాడే రాజ్యాంగంపై ప్రమాణం చేసిన వ్యక్తి దేశంలోని ఓ రాష్ట్రాన్ని పాకిస్థాన్‌గా.. ప్రజలను ఉగ్రవాదులని పోల్చారు.. ఇంకా ఆయనకు మంత్రిపదవిలో ఉండే అర్హత ఉందా’ అని ప్రశ్నించారు.

కాగా, తన వ్యాఖ్యలపై మంత్రి స్పష్టత ఇచ్చారు. ఆయన ఏఎన్ఐతో మాట్లాడుతూ.. ‘మనది హిందూ దేశంగానే ఉండాలి.. అన్ని విధాలుగానూ హిందువులను రక్షించుకోవాలి.. భారత్‌లో కేరళ అంతర్భాగం.. అయితే, అక్కడ హిందూ జనాభా తగ్గడం ఆందోళనకు గురిచేస్తోంది.. హిందువులను ముస్లింలు, క్రైస్తవులుగా మార్చేస్తున్నారు.. అందుకే కేరళను నేను పాకిస్థాన్‌తో పోల్చాను.. పాక్‌లోని హిందువుల మాదిరిగానే స్వంత దేశమైన కేరళలో ఉంది.. దీనిపై చర్యలు తీసుకోవాలి.. నేను నా ప్రసంగంలో ఇదే చెప్పాను’ అని వ్యాఖ్యానించారు.