నా కాళ్లు మొక్కితే మీ పనులు చేయను..: కేంద్రమంత్రి రాక్, ప్రజలు షాక్

ప్రజలకు ఏవైనా సమస్యలు వచ్చిన వెంటనే సాయం కోసం స్థానికంగా ఉండే ప్రజా ప్రతినిధులు, రాజకీయ నాయకుల వద్దకు వెళ్లడం చాలా కామన్. అలా వెళ్లిన వాళ్లు తమ కష్టాలు చెప్పుకుంటూ కన్నీళ్లు కార్చడం, వాటిని తీర్చమంటూ అధికారుల కాళ్లూ, చేతులు పట్టుకోవడం కూడా మనం చాలా సార్లే చుసుంటాం. అయితే అలాంటి వాటికే చెక్ పెడుతూ.. ఓ కేంద్ర మంత్రి షాకింగ్ పోస్టర్లు పెట్టించాడు. అవి చూసిన ప్రజలంతా తెగ ఆశ్చర్యపోతున్నారు. తమ పనులు చేయించుకోవడానికి మంత్రి కాళ్లు పట్టుకోవాలా వద్దా అని ఆలోచిస్తున్నారు. అయితే పాదాలు తాకేందుకు భయపడడం ఏంటి అనుకుంటున్నారా.. అవునండి అక్కడి ఆఫీసులో ఉండే కేంద్రమంత్రి కాళ్లు మొక్కితే వారి పనులు అస్సలే చేయరట. ఆ కథేంటో చూద్దాం పదండి.

మధ్య ప్రదేశ్‌లోని టికంగఢ్‌లో ఉన్న కేంద్రమంత్రి వీరేంద్ర కుమార్ ఆఫీసు బయట షాకింగ్ పోస్టర్లు పెట్టించారు. ముఖ్యంగా అందులో.. "నా కాళ్లు ఎవరూ మొక్కకూడదు. పాదాలు తాకడం అనేది పూర్తిగా నిషేధం.. ఎవరైనా వీటిని ఉల్లంఘించి కాళ్లు మొక్కితే నేను ఎలాంటి పని అయినా చేయను" అంటూ రాసి ఉంది. అయితే కేంద్ర మంత్రి వీరేంద్ర కుమార్‌యే దగ్గరుండి ఈ పోస్టర్లు పెట్టించినట్లు తెలుస్తోంది. చాలా రోజులుగా వచ్చిన వాళ్లంతా తన కాళ్లు పట్టుకోవడం తనకు ఏమాత్రం నచ్చకే ఇలా చేసినట్లు సమాచారం.

అయితే ఆయన వద్దకు వెళ్లిన ప్రజలు ఈ పోస్టర్లు చూసి ఆశ్చర్యపోతున్నారు. ఎరైనా కాళ్లు పట్టుకోవడానికి చాలా గౌరవంగా భావిస్తుంటారు. కానీ కేంద్రమంత్రి ఇలా పెట్టేసరికి.. అందరూ ఏం చేయాలో పాలుపోక ఆలిచిస్తూ కూర్చుండిపోతున్నారు. కానీ కేంద్ర మంత్రి వీరేంద్ర కుమార్ గురించి బాగా తెలిసిన వాళ్లు మాత్రం ఆయన ఎప్పుడూ అంతే అంటూ నేరుగా లోపలికి వెళ్లిపోతున్నారు. ఎంత పెద్ద పదవిలో ఉన్నా చాలా సాదాసీదాగా వ్యవహరించే వ్యక్తి అంటూ ప్రశంసల వర్షం కురిపిస్తున్నారు.

మొదటి నుంచి వీరేంద్ర కుమార్ తన పని తాను చేసుకుంటూ వెళ్లిపోతారు. ఎవరి వద్ద నుంచి గౌరవ, మర్యాదాలను పొందాలనుకోరు. అందరినీ సమానంగా చూస్తూ.. పేద వాళ్లను కూడా మాట్లాడిస్తుంటారు. ముఖ్యంగా తన నియోజక వర్గం నుంచి కలెక్టరేట్ వరకు నడుచుకుంటూ వెళ్తూ.. ప్రజల సమస్యలను నేరుగా అడిగి తెలుసుకుంటారు. 1996లో రాజకీయాల్లోకి వచ్చిన వీరేంద్ర కుమార్.. 2009లో టికంగఢ్ నుంచి తొలిసారి ఎంపీగా గెలిచారు. ఆ తర్వాత 2014, 2019లోనూ విజయం సాధించి తన పదివిని కొనసాగిస్తున్నారు. అలాగే 2024లోనూ గెలవగా.. బీజేపీ ఆయనకు మంత్రి పదవిని కట్టబెట్టింది. కేంద్ర సామాజిక న్యాయం, సాధికారికత శాఖ బాధ్యతలను అప్పగించింది.