మాజీ ప్రధాని చనిపోతే వేడుకలా.. రాహుల్ గాంధీ వియత్నాం పర్యటనపై రాజకీయ దుమారం!

మూడ్రోజుల క్రితమే భారతదేశ మాజీ ప్రధాని మన్మోహన్ సింగ్ చనిపోయిన విషయం అందరికీ తెలిసిందే. ప్రభుత్వ లాంఛనాలతో సింగ్ అంత్యక్రియలు పూర్తి కాగా.. ఆయన అస్థికలను సైతం యమునా నదిలో కలిపేశారు. అయితే ఇలాంటి బాధాకర సమయంలో రాహుల్ గాంధీ వియత్నాం పర్యటనకు వెళ్లడంతో రాజకీయ దుమారం రేగుతోంది. బీజేపీకి చెందిన కొందరు నాయకులు రాహుల్ గాంధీ పర్యటనను తప్పు పట్టారు. దీనిపై కాంగ్రెస్ కూడా స్పందించి గట్టిగా వార్నింగ్ ఇచ్చింది. ఆ పూర్తి వివరాలు ఏంటో మనం ఇప్పుడు తెలుసుకుందాం.

కాంగ్రెస్ అగ్ర నాయకుడు రాహుల్ గాంధీ తాజాగా వ్యక్తిగత పర్యటన కోసం వియత్నాం వెళ్లారు. అయితే దీనిపై బీజేపీ నాయకుడు అమిత్ మాలవీయ తీవ్ర విమర్శలు చేశారు. ముఖ్యంగా మాజీ ప్రధాని సంతాప సమయంలో.. రాహుల్ గాంధీ నూతన సంవత్సర వేడుకల కోసం వియత్నాం వెళ్లారంటూ ఎక్స్ వేదికగా రాసుకొచ్చారు. అంతేకాకుండా రాహుల్ గాంధీ తన ప్రయోజనాల కోసం మన్మోహన్ సింగ్ మరణాన్ని రాజకీయం చేశారంటూ తెలిపారు. అక్కడితో ఆగకుండా గాంధీలు, కాంగ్రెస్ పార్టీ సిక్కులను ద్వేషిస్తారని తెలిపారు. ఇందిరా గాంధీ కూడా దర్బార్ సాహిబ్‌ను అవమానించారనే విషయాన్ని ఎప్పటికీ మర్చిపోవద్దంటూ స్పష్టం చేశారు.

ఈ ఒక్క పోస్టుతో కాంగ్రెస్ నేతలు తీవ్ర ఆగ్రహం వ్యక్తం చేస్తున్నారు. ఇలాంటి వ్యాఖ్యలు ఎలా చేయగల్గుతున్నారంటూ బీజేపీకి వ్యతిరేకంగా కామెంట్లు చేస్తున్నారు. ముఖ్యంగా కాంగ్రెస్ ప్రతినిధి మాణిక్కం ఠాగూర్.. మాలవీయ చేసిన కామెంట్లపై తీవ్రంగా స్పందించారు. బీజేపీ ఇలాంటి తప్పుదోవ పట్టించే రాజకీయాలను ఎప్పుడు మానేస్తుందంటూ సూటిగా ప్రశ్నించారు. బీజేపీ మంత్రులు.. డాక్టర్ సాహెబ్ కుటుంబంతో వ్యవహరించిన తీరు సిగ్గుచేటని చెప్పుకొచ్చారు. అంతేకాకుండా రాహుల్ గాంధీ విదేశాలకు వెళ్తే మీకెందుకు అంత బాధ కల్గుతుందని అన్నారు. కనీసం నూతన సంవత్సరంలో అయినా సరే బాగు పడండి అంటూ హితవు పలికారు.

మన్మోహన్ సింగ్ అస్థికలను యమునా నదిలో కలిపేటప్పుడు కాంగ్రెస్ నాయకులు హాజరు కాకపోవడాన్ని కూడా బీజేపీ నేతలు తప్పు పట్టారు. అయితే దీనిపై కూడా కాంగ్రెస్ నేతలు స్పందించారు. సింగ్ కుటుంబానికి వ్యక్తిగత గోప్యత ఇవ్వాలనే ఉద్దేశంతోనే తాము అక్కడకు వెళ్లలేదని చెప్పుకొచ్చారు. ఇదిలా ఉండగా.. మన్మోహన్ సింగ్ డిసెంబర్ 26వ తేదీ రోజు రాత్రి తీవ్ర అనారోగ్యం పాలై 92 ఏళ్ల వయసులో తుదిశ్వాస విడిచారు. దీంతో దేశవ్యాప్తంగా ఉన్న నాయకులు, ప్రజలు సంతాపం వ్యక్తం చేస్తున్నారు. కేంద్ర ప్రభుత్వం కూడా ఆయన చేసిన సేవలను స్మరించుకుంటూ ఏడు రోజుల పాటు సంతాప దినాలు పాటించాలని నిర్ణయించింది. ఈక్రమంలోనే బీజేపీ, కాంగ్రెస్ మధ్య గొడవ నడుస్తోంది.