స్టేజీ పైనుంచి పడిపోయిన కాంగ్రెస్ ఎమ్మెల్యే.. వెంటిలేటర్‌పై చికిత్స

కేరళకు చెందిన మహిళా కాంగ్రెస్ ఎమ్మెల్యే ఉమా థామస్ ఆదివారం రోజు ఓ కార్యక్రమానికి అతిథిగా వెళ్లారు. అయితే అక్కడి స్టేజీపైకి ఎక్కిన ఆమె.. పొరపాటున కాలుజారి కింద పడిపోయారు. 20 అడుగుల పైనుంచి ఆమె కింద పడడంతో.. తలకు, వెన్నుముకకు తీవ్ర గాయాలు అయ్యాయి. విషయం గుర్తించిన సిబ్బంది వెంటనే ఉమా థామస్‌ను ప్రైవేటు ఆస్పత్రిలో చేర్పించాయి. ప్రస్తుతం వెంటిలేటర్‌పై చికిత్స పొందుతున్న ఆమె ఆరోగ్య పరిస్థితి ఎలా ఉంది, అసలేం జరిగిందో మనం ఇప్పుడు తెలుసుకుందాం.

కేరళ కొచ్చిలోని జవహార్‌లాల్ నెహ్రూ అంతర్జాతీయ స్టేడియంలో ఆదివారం సాయంత్రం ఓ కార్యక్రమం నిర్వహించారు. అయితే దీనికి ముఖ్య అతిథిగా త్రిక్కకర కాంగ్రెస్ పార్టీ ఎమ్మెల్యే ఉమా థామస్‌ను ఆహ్వానించారు. వారి అహ్వానం మన్నించిన ఆమె సాయంత్రం ఆ కార్యక్రమానికి హాజరు అయ్యారు. వ్యాఖ్యాత పిలవగానే స్టేజీపైకి వెళ్లారు. అయితే తన కుర్చీ వద్దకు వెళ్లి కూర్చుబోయేలోపే ఆమె కాలుజారి స్టేజీపై నుంచి కింద పడిపోయారు. స్టేజీ సరిగ్గా లేకపోవడంతో.. 20 అడుగుల ఎత్తు నుంచి జారీ కింద పడ్డారు.

 కింద మొత్తం కాంక్రీట్ ఉండడంతో ఒక్కసారిగా కింద పడిపోయిన ఎమ్మెల్యే ఉమా థామస్ తలకు తీవ్ర గాయాలు అయ్యాయి. విషయం గుర్తించిన సిబ్బంది వెంటనే ఆమెను కింద నుంచి బయటకు తీసుకు వచ్చారు. అనంతరం స్థానికంగా ఉన్న ఓ ప్రైవేటు ఆస్పత్రికి తరలించారు. ప్రస్తుతం ఆమె పరిస్థితి కాస్త విషమంగా ఉండడంతో ఐసీయూలో ఉంచి చికిత్స అందిస్తున్నట్లు కేరళ మంత్రి పి రాజీవ్ వెల్లడించారు. అలాగే తాను వైద్యులతో పాటు ఆరోగ్య శాఖ మంత్రితో కూడా మాట్లాడినట్లు వివరించారు. అంతేకాకుండా కాంగ్రెస్ ఎమ్మెల్యే ఉమా థామస్‌కు మెరుగైన వైద్య చికిత్స అందిస్తున్నట్లు అక్కడి వైద్యులు తెలిపారని చెప్పుకొచ్చారు.

అలాగే వైద్యులు కూడా ఎమ్మెల్యే ఉమా థామస్ ఆరోగ్య పరిస్థితులపై హెల్త్ బులిటెన్ విడుదల చేశారు. ఉమా థామస్ తలకు తీవ్ర గాయం కావడంతో ఆమెకు గ్రేడ్ 2 డిఫ్యూజ్ అక్ష సంబంధ గాయం అయినట్లు తెలిపారు. అంటే మెదడుకు గాయమైనట్లు వివరించారు. అలాగే గర్భాశయం, వెన్నుముకలో కూడా గాయాలు అయ్యాయని చెప్పుకొచ్చారు. పైనుంచి కింద పడడం వల్ల ముఖం, పక్కటెముకల్లో పగుళ్లు ఏర్పడ్డాయని, ఊపిరితిత్తుల్లో కూడా రక్త స్రావం అవుతుందని వైద్యులు స్పష్టం చేశారు.

అయితే అన్నింటికీ తాము మెరుగైన చికిత్స అందిస్తున్నామని.. 24 గంటల గడిచిన తర్వాతే ఆమె ఆరోగ్య పరిస్థితి గురించి స్పష్టంగా చెప్పగలమని కూడా వైద్యులు వివరించారు. వేదికపై ఏర్పాటులో లోపాలు ఉండడం వల్లే ఈ ప్రమాదం జరిగిందని గుర్తించిన పోలీసులు.. కార్యక్రమ నిర్వాహకులపై కేసు పెట్టారు. ప్రస్తుతం దర్యాప్తు చేస్తున్నారు. మరోవైపు కాంగ్రెస్ ఎమ్మెల్యే ఆస్పత్రిలో చేరినట్లు తెలుసుకున్న ఆమె అభిమానులు.. ఉమా థామస్ త్వరగా కోలుకోవాలంటూ దేవుడిని ప్రార్థిస్తున్నారు.