న్యూఇయర్ వేళ దారుణం.. హోటల్‌లో తల్లి, నలుగురు చెల్లెళ్లను హత్యచేసిన యువకుడు

కొత్త ఏడాది వేళ దారుణం చోటుచేసుకుంది. ఓ యువకుడు తన తల్లి, నలుగురు చెల్లెళ్లను విషం పెట్టి హత్య చేశాడు. ఉత్తర్ ప్రదేశ్ రాజధాని లక్నోలో బుధవారం తెల్లవారుజామున ఈ ఘటన చోటుచేసుకుంది. కుటుంబ కలహాలతోనే నిందితుడు.. ఐదుగుర్ని హత్య చేసినట్టు పోలీసులు వెల్లడించారు. ఆగ్రాకు చెందిన అర్షద్ (24) తన తల్లి అస్మా, నలుగురు చెల్లెళ్లు అలీషా (19), రహ్మీన్ (18), అక్సా (16), అలియాలను తినే ఆహారంలో విషం కలిపి, తర్వాత చేతి మణికట్టుపై కత్తితో కోసి చంపినట్టు తెలిపారు. నకా ప్రాంతంలోని హోటల్ శరణ్‌జిత్‌లో బాధిత కుటుంబం డిసెంబరు 30న దిగినట్టు చెప్పారు.

తల్లి సహా ఐదుగుర్ని హత్యచేసిన అర్షద్.. అక్కడ నుంచి పరారయ్యాడు. పోలీసులు రంగంలోకి దిగి అతడ్ని అదుపులోకి తీసుకున్నారు. లక్నో డీసీసీ రవీనా త్యాగి మాట్లాడుతూ.. ‘నిందితుడ్ని అర్షద్ (24) గుర్తించారు.. కుటుంబంలోని ఐదుగుర్ని హత్య చేశాడు.. అత్యంత క్రూరమైన చర్యకు పాల్పడిన నిందితుడ్ని స్థానిక పోలీసులు వెంటనే అరెస్ట్ చేశారు’ అని తెలిపారు. ఘటనా స్థలికి ఫోరెన్సిక్ నిపుణులు చేరుకుని.. ఆధారాలు సేకరిస్తున్నారని చెప్పారు. ఘటనపై కేసు నమోదుచేసి లోతుగా దర్యాప్తు చేపట్టామని వివరించారు.

కుటుంబ గొడవలతోనే ఈ హత్యలు చేసినట్టు ప్రాథమిక విచారణలో నిందితుడు వెల్లడించాడు. మృతదేహాలను స్వాధీనం చేసుకుని, పోస్ట్‌మార్టం కోసం తరలించినట్టు పోలీసులు తెలిపారు. ఈ హత్యల్లో అర్షద్ తండ్రి బాబర్ పాత్ర కూడా ఉన్నట్టు పోలీసులు అనుమానిస్తున్నారు. ఆ కోణంలోనూ దర్యాప్తు జరుగుతోందని పోలీస్ అధికారులు వివరించారు. ఘటనా స్థలిలో బాబర్ ఉన్నాడా? లేడా? అనేది స్పష్టంగా తెలియరాలేదు. అయితే, ఐదుగురి హత్యలకు ముందు నిందితుడి, బాధితులకు మధ్య తీవ్ర వాగ్వాదం జరిగినట్టు తెలుస్తోంది.

అయితే, ీ ఘటన గురించి పూర్తి వివరాలు ఇంకా తెలియాల్సి ఉంది. వీరంతా కలిసి ఆగ్రా నుంచి లక్నోకు ఎందుకు వచ్చినట్టు? అక్కడ ఏం జరిగింది? రెండు రోజుల నుంచి హోటల్‌లో ఎందుకు ఉన్నారు? అనేది ప్రస్తుతం పోలీసుల దర్యాప్తులో వెల్లడికానుంది.