దేశంలో 7కు చేరిన హెచ్ఎంపీవీ కేసులు.. రాష్ట్రాలకు కేంద్రం కీలక సూచనలు

చైనాలో వ్యాపిస్తోన్న కొత్తరకం హ్యూమన్‌ మెటాన్యుమో వైరస్‌ ప్రపంచాన్ని కలవరానికి గురిచేస్తోంది. ఈ వైరస్‌ భారత్‌లోనూ క్రమంగా విస్తరిస్తోంది. తాజాగా, మహారాష్ట్రలో ఇద్దరు చిన్నారులకు వైరస్ నిర్దారణ అయ్యింది. దీంతో దేశంలో హెచ్ఎంపీవీ కేసుల సంఖ్య ఏడుకు చేరింది. కర్ణాటక, గుజరాత్, తమిళనాడుల్లో సోమవారం తొలి కేసులు వెలుగుచూసిన విషయం తెలిసిందే. బెంగళూరులో రెండు, చెన్నైలో రెండు, అహ్మదాబాద్‌లో ఒక కేసు నమోదయ్యింది. నాగ్‌పూర్‌లో జలుబు, జ్వరంతో బాధపడుతోన్న 7 ఏళ్లు, 13 ఏళ్లు చిన్నారులు ఇద్దరికీ పరీక్షలు చేయగా.. వైద్య నివేదికలో హెచ్ఎంపీవీ పాజిటివ్‌గా వచ్చింది. ప్రస్తుతం ఈ ఇద్దరు పిల్లలకు ఆసుపత్రిలో చికి్త్స కొనసాగుతోందని, పరిస్థితి నిలకడగా ఉందని వైద్యులు తెలిపారు.

మరోవైపు, ఈ వైరస్‌పై ఎంతమాత్రం ఆందోళన చెందవద్దని, ఇది పాతదేనని కేంద్ర ఆరోగ్య శాఖ స్పష్టం చేసింది. అయితే, వైరస్ వ్యాప్తి విషయంలో పర్యవేక్షణ పెంచాలని రాష్ట్రాలు, కేంద్రపాలిత ప్రాంతాలకు కేంద్రం సూచించింది. బెంగళూరులోని మూడు నెలల శిశువు కోలుకోవడంతో ఆసుపత్రి నుంచి డిశ్చార్జ్ చేశారు. 8 నెలల బాలుడు కోలుకుంటున్నట్లు బాప్టిస్ట్ ఆస్పత్రి వర్గాలు వెల్లడించాయి. దేశంలో మొదటి హెచ్‌ఎంపీవీ కేసులు ఇవేనని ఐసీఎంఆర్‌ ప్రకటించింది. చెన్నైలోనూ ఇద్దరు పిల్లలకు ఈ వైరస్‌ నిర్ధారణ అయింది. జ్వరం, జలుబు, దగ్గుతో చేట్‌పేట్, గిండిలోని ఆసుపత్రిలో చేరిన పిల్లల రక్త నమూనాలను పరీక్షించగా పాజిటివ్‌గా వచ్చింది. అహ్మదాబాద్ డిసెంబరు 26న ఆసుపత్రిలో చేరిన రాజస్థాన్‌కు చెందిన రెండు నెలల శిశువుకు సోమవారం హెచ్‌ఎంపీవీ బయటపడింది.

ఈ చిన్నారి పరిస్థితి ఆందోళనకరంగా ఉండటంతో తొలుత వెంటిలేటర్‌పై చికిత్స కొనసాగించారు. క్రమంగా ఆ శిశువు పరిస్థితి మెరుగుపడి ఆరోగ్యం నిలకడగా ఉందని అధికార వర్గాలు వెల్లడించాయి. అయితే, ఈ పిల్లల తల్లిదండ్రులు, కుటుంబసభ్యులకు విదేశీ ప్రయాణ నేపథ్యం లేదని తెలిపారు. వీరికి ఎలా సోకిందనేది అంతుచిక్కడం లేదు. సోమవారం వైరస్ నిర్దారణ అయిన ఐదుగురు చిన్నారులు ఏడాదిలోపు వయసున్నవారే.

మరోవైపు, ఈ వైరస్‌ గురించి ఎవరూ భయపడాల్సిన అవసరం లేదని కేంద్ర ఆరోగ్యశాఖ మంత్రి జేపీ నడ్డా భరోసా ఇచ్చారు. పరిస్థితిని ఆరోగ్యశాఖతోపాటు ఐసీఎంఆర్, ఎన్‌సీడీసీ నిశితంగా గమనిస్తున్నాయని ఆయన తెలిపారు. 2001లోనే హెచ్ఎంపీవీ వైరస్‌ను గుర్తించారని, చాలాఏళ్లుగా ప్రపంచవ్యాప్తంగా వ్యాప్తిలో ఉందని అన్నారు. గాలి ద్వారా ఇది వ్యాప్తిచెందుతుందని, అన్ని వయసుల వారినీ ప్రభావితం చేస్తుందని వివరించారు. వైరస్ మన దేశంలోకి ప్రవేశించడంతో రాష్ట్ర ప్రభుత్వాలను కేంద్రం అప్రమత్తం చేసింది. ఎటువంటి పరిస్థితులను ఎదుర్కొడానికైనా సిద్ధంగా ఉండాలని సూచించింది. ప్రస్తుతానికి భయపడాల్సిన పనిలేదని, వైద్య సౌకర్యాలను మెరుగుపరుచుకోవాలని తెలిపింది.