ఘట్‌కేసర్‌ కారు దగ్దం కేసులో ట్విస్ట్.. అన్న వరుసయ్యే వ్యక్తి బ్లాక్‌మెయిల్, విస్తుపోయే నిజాలు

హైదరాబాద్ శివారు ఘట్‌కేసర్‌ పరిధిలోని ఘన్‌పూర్‌ ఓఆర్‌ఆర్‌ సర్వీసు రోడ్డులో ఈనెల 6న కారు దగ్ధమైన సంగతి తెలిసిందే. ముందుగా ఇది ప్రమాదంగా భావించగా.. కారులోని ప్రేమికులు ఆత్మహత్యకు పాల్పడినట్లు గుర్తించారు. అయితే ఈ ఘటనలో విస్తుపోయే వాస్తవాలు వెలుగులోకి వస్తున్నాయి. మృతుల్లో ఒకరైన 16 ఏళ్ల బాలిక అన్న వరసయ్యే వ్యక్తి వేధింపులు తట్టుకోలేక వారు సూసైడ్ చేసుకున్నట్లు తెలిసింది. ప్రేమ విషయం ఇంట్లో చెబుతానని బెదిరించి డబ్బులు వసూలు చేస్తుండటంతో మనస్థాపం చెంది ఆత్మహత్యకు పాల్పడినట్లు సమాచారం.

పోలీసులు తెలిపిన వివరాల ప్రకారం.. ఘట్‌కేసర్‌ మండలం నారపల్లికి చెందిన మైనర్ బాలిక (16) ఇంటర్‌ ఫస్ట్ ఇయర్ చదువుతోంది. యాదాద్రి భువనగిరి జిల్లా బీబీనగర్‌ మండలం జమిలాపేట్‌కు చెందిన శ్రీరాములు (25) తండ్రి సైకిల్ షాప్ నిర్వహిస్తున్నాడు. గత కొంత కాలంగా వీరిద్దరూ ప్రేమించుకుంటున్నారు. శ్రీరాములు బాలిక ప్రేమ వ్యవహారం ముంత మహేష్ అనే వ్యక్తికి తెలిసింది. అతడు బాలికకు అన్నయ్య వరుస అవుతాడు. ప్రేమ వ్యవహారం ఇరు కుంటుంబాల్లో చెబుతానంటూ అతడు బ్లాక్‌ మెయిల్‌ చేశాడు. ఇలా బెదిరింపులకు పాల్పడి ఇద్దరి వద్ద నుంచి దాదాపు రూ.1.35 లక్షలు వసూలు చేశాడు. అయినా అతడి వేధింపులు ఆగలేదు. దీంతో మనస్థాపం చెంది సూసైడ్ చేసుకోవాలని నిర్ణయం తీసుకున్నారు.

ఈనెల 6న ఉదయం బాలికను తండ్రి నారపల్లి సమీపంలోని కాలేజీ వద్ద దింపాడు. కొద్దిసేపటి తర్వాత కారులో వచ్చిన శ్రీరామ్ బాలికను తీసుకెళ్లాడు. ఉదయం నుంచి సాయంత్రం వరకూ ఇద్దరూ వేర్వేరు ప్రాంతాల్లో కారులోనే తిరిగారు. సాయంత్రం 5 గంటల సమయంలో అన్నోజిగూడలోని ఓ దుకాణంలో 20 లీటర్ల వాటర్ డబ్బా కొన్నారు. ఓ పెట్రోల్ బంక్‌లో 10-15 లీటర్ల పెట్రోల్‌ కొనుగోలు చేశారు. అనంతరం జనసంచారం తక్కువగా ఉండే ఘన్‌పూర్‌ సర్వీసు రోడ్డులోకి వెళ్లి కారులోనే సూసైడ్ చేసుకున్నారు.

సూసైడ్ చేసుకోవటానికి ముందు బాలిక తన తండ్రికి శ్రీరాములు ఫోన్‌ నుంచి వాట్సాప్‌లో లొకేషన్ పంపింది. 3 పేజీల సూసైడ్ నోట్‌ను కూడా పంపించింది. ఆందోళన చెందిన బాలిక తండ్రి లొకేషన్‌ చూపించిన ప్రాంతానికి వెళ్లేలోపే కారుతో సహా ఇద్దరు కాలి బూడిదయ్యారు. తండ్రి ఫిర్యాదు మేరకు కేసు నమోదు చేసుకున్న పోలీసులు వారి మృతికి కారణమైన మహేష్ అనే వ్యక్తి కేసులు నమోదు చేశారు. ప్రస్తుతం అతడు పరారీలో ఉండగా.. గాలింపు చర్యలు చేపట్టారు.