‘మేము పరారీలో ఉన్న నేరస్థులం’ ,,,, లలిత్ మోదీ, విజయ్ మాల్యా వీడియో

ఆర్థిక అవకతవకలు, బ్యాంకు రుణాలను ఎగ్గొట్టి విదేశాలకు పారిపోయిన లలిత్ మోదీ, విజయ్ మాల్యాలు అక్కడ దర్జాగా తిరుగుతున్నారు. తాజాగా, ఈ ఇద్దరూ కలిసి తాము ‘భారత్ నుంచి పారిపోయిన అతిపెద్ద నేరస్థులం’ అని చెప్పుకుంటూ సోషల్ మీడియాలో ఒక వీడియోను షేర్ చేశారు. దీంతో ఇది సోషల్ మీడియాలో వైరల్ కాగా.. కేంద్ర ప్రభుత్వ తీరుపై తీవ్ర విమర్శలు వెల్లువెత్తుతున్నాయి. లలిత్ మోదీ తన ఇన్‌స్టాగ్రామ్‌లో ఈ వీడియోను పోస్ట్ చేస్తూ ‘‘నేను మళ్లీ ఇంటర్‌నెట్‌ను షేక్ చేయడానికి ఏదైనా చేస్తాను. మీకోసం ఇది. అసూయతో మీ గుండెలు మండిపోనివ్వండి’ అని క్యాప్షన్ పెట్టారు. ఈ వీడియోలో, లలిత్ మోదీ, విజయ్ మాల్యా పక్కపక్కనే ఉండి ‘భారతదేశానికి చెందిన మేము ఇద్దరం పరారీలో ఉన్న నేరస్థులం’ అని చెప్పడం స్పష్టంగా వినిపిస్తోంది.

ఈ వీడియోపై నెటిజన్లు తీవ్రంగా స్పందించారు. ‘వీళ్లు భారత ప్రభుత్వాన్ని ఎంత ఎగతాళి చేస్తున్నారో చూడండి’ అని ఒకరు.. ‘నువ్వు ఇంటర్నెట్‌ను బద్దలు కొట్టలేవు.. చప్పుడు చేయకుండా కూర్చో’ అని మరొకరు అన్నారు. అయితే, కొందరు మాత్రం ఈ పరిస్థితికి భారత అధికారుల వైఫల్యాన్ని నిందించారు. ‘ఇలాంటి వీడియో చేయడానికి వాళ్లు ధైర్యం చేస్తున్నారంటే భారత చట్టాలకు సిగ్గుచేటు’ అని ఒక నెటిజన్.. ‘వీళ్లు భారత సీబీఐ, ఈడీలను చూసి నవ్వుకుంటున్నారు’ అని మరో నెటిజన్ విమర్శలు గుప్పించారు.

విజయ్ మాల్యాపై అనేక రుణాల ఎగవేత ఆరోపణలు, మనీలాండరింగ్ కేసులు ఉన్నాయి. మార్చి 2016లో దేశం నుంచి పారిపోయిన ఆయనను 2019 జనవరిలో ప్రత్యేక కోర్టు ఆర్థిక నేరగాడిగా ప్రకటించింది. ఇక, లలిత్ మోదీ కూడా 2010లో భారతదేశం విడిచి వెళ్ళారు. ఆయనపై పన్ను ఎగవేత, మనీలాండరింగ్, ఐపీఎల్‌ సొమ్ము సంబంధించిన అవకతవకలు వంటి ఆరోపణలు ఉన్నాయి. 2009లో IPL ప్రసార హక్కుల కేటాయింపు ప్రక్రియలో లలిత్ మోదీ అవకతవకలకు పాల్పడ్డారని ఎన్‌ఫోర్స్‌మెంట్ డైరెక్టరేట్ (ED) ఆరోపించింది. వీరిని స్వదేశానికి రప్పించేందుకు భారత ప్రభుత్వం ఏళ్లుగా ప్రయత్నిస్తూనే ఉంది. కానీ, ఈ విషయంలో ఎటువంటి పురోగతి సాధించలేదు. విదేశాల్లో దర్జాగా తిరుగుతూ.. ఇప్పుడు భారత్‌‌ మమ్మల్ని ఏం చేయలేకపోయిందనట్టు వ్యవహరిస్తున్నారు. తాజాగా, వీడియో కేంద్రంలోని మోదీ ప్రభుత్వంపై విమర్శలకు ప్రతిపక్షాలకు కొత్త ఆయుధంగా మారే అవకాశం ఉంది.