రోజుకు 18 గంటలు పనిచేసి 26 ఏళ్లకే రూ. 7 కోట్లు విల్లా కొన్న యువతి!

ఓ యువతి తాను సంపాదించిన డబ్బుతోనే 26 ఏళ్లకే ఒక మిలియన్ డాలర్లు (దాదాపు రూ.7 కోట్లు) ఖరీదైన విల్లాను కొనుగోలు చేసింది. తన కుటుంబంలోని ఎవరి ఆర్ధిక సహాయం తీసుకోకుండానే ఆమె కష్టపడి పనిచేసి దాచుకున్న సొమ్ముతోనే కొనడం చెప్పుకోదగ్గ అంశం. సింగ్‌పూర్‌కు చెందిన ఆ యువతి సోషల్ మీడియాలో పెట్టిన పోస్ట్ ప్రస్తుతం నెట్టింట వైరల్ అవుతోంది. తాను ఇంటిని కొనుగోలుచేసిన విషయం తాళాలు తీసుకునే వరకూ కుటుంబసభ్యులకు కూడా తెలియదని ఆమె చెప్పడం గమనార్హం. సింగ్‌పూర్‌కు చెందిన 26 ఏళ్ల క్రిస్.. ఫుల్-టైమ్ ప్రొడ్యూసర్‌, కంటెంట్ క్రియేటర్. ఆమె తన విజయగాథను డిసెంబరు 20 ‘కల నిజమైంది’ అనే క్యాప్షన్‌తో టిక్‌టాక్‌లో పోస్ట్ పెట్టారు.

‘‘నాకు 27 ఏళ్లు వచ్చేసరికి సొంతంగా ఓ ఇల్లు, ఆస్తి ఉండాలని ఎప్పుడూ అనుకునేదాన్ని.. 2025 చివరి నాటికి దానిని నెరవేర్చుకున్నాను’’ అని క్రిస్ తెలిపారు. ఆ ఆస్తిని తానే కొనుగోలు చేశానని, సుమారు 240,000 డాలర్లు డౌన్ పేమెంట్‌ను కూడా పూర్తిగా నగదు రూపంలోనే చెల్లించానని ఆమె చెప్పారు. మదర్‌షిప్‌కు ఇచ్చిన ఇంటర్వ్యూలో క్రిస్ మాట్లాడుతూ... తాను వారానికి ఏడు రోజులూ, రోజుకు 12 నుంచి 18 గంటల పాటు పని చేస్తానని వివరించారు. పూర్తికాల ఉద్యోగంతో పాటు, ఫోటో, వీడియో ప్రొడక్షన్‌లో ఫ్రీలాన్స్ ప్రాజెక్టులను కూడా చేస్తుంది. జిమ్‌లో వర్క్ చేసేటప్పుడు కూడా ఆమె పని చేస్తూనే ఉంటుంది.

 తాను 14వ ఏట నుంచే పనిచేయడం మొదలుపెట్టానని, 19 ఏళ్లు వచ్చిన తర్వాతే పెట్టుబడి ప్రారంభించినట్టు తెలిపారు. చిన్నతనంలోనే పొదుపు, క్రమశిక్షణ, ఆర్థిక స్థిరత్వం పట్ల బలమైన కోరిక వంటివి తన విజయానికి కీలక కారణాలుగా పేర్కొంది. ఆమె బడ్జెట్‌ విషయంలో చాలా నిక్కచ్చిగా వ్యవహరిస్తుంది. ప్రతి పైసాను లెక్కిస్తూ.. డబ్బు ఆదా చేయడానికి తరచుగా సాధారణమైన భోజనం చేస్తుంది. క్రిస్ ఆర్థిక స్వాతంత్ర్యం విలువను కూడా నొక్కి చెప్పింది. ఇది తనకు తల్లి నూరిపోసిన సూత్రం, సింగపూర్‌లో ఆస్తిని కలిగి ఉండటం తనకు భద్రతా భావాన్ని ఇస్తుందని చెప్పింది.