అత్యాచార చట్టంలో మార్పులు...నిబంధనలను కఠినం చేసిన స్విట్జర్లాండ్

స్విట్జర్లాండ్ దేశంలో ఇటీవల అత్యాచార ఘటనలు పెరిగిపోతున్నాయి. ఈ నేపథ్యంలో లైంగిక నేరాలను అరికట్టే అత్యాచార చట్టంలో నిబంధనలు మార్పులు చేస్తూ రూపొందించిన ముసాయిదా బిల్లు స్విట్జర్లాండ్ దిగువ సభలో సోమవారం నాటీకీయ పరిణామాల మధ్య ఆమోదం పొందింది. ప్రస్తుతం ఉన్న చట్టాన్ని విస్తృతం చేయడానికి రూపొందించిన ముసాయిదా బిల్లుకు ఆమోదం తెలిపారు. స్విట్జర్లాండ్‌లో ప్రస్తుత అత్యాచార చట్టానికి సర్దుబాట్లు అవసరమని కొన్నాళ్లుగా డిమాండ్ వినిపిస్తోంది. ప్రస్తుత చట్టం ప్రకారం మహిళలు ప్రతిఘటించిన ఘటనలను మాత్రమే అత్యాచారంగా పరిగణిస్తారు.

బాధితురాలు సమ్మతి తెలపకుండా ప్రతిఘటిస్తే? అత్యాచారంగా భావించాలన్న అభిప్రాయంతో దిగువసభ సభ్యులు ఏకీభవించారు. అయితే సమ్మతికి కొలమానం ఏంటి? అనే దానిపై స్విట్జర్లాండ్‌లో తీవ్రమైన చర్చ జరుగుతోంది. కొంతమంది ‘నో మీన్స్ నో’ అనే విధానం ఉండాలని వాదించారు. దీని ప్రకారం ఒక వ్యక్తి స్పష్టంగా అభ్యంతరం వ్యక్తం చేస్తే అది అత్యాచారంగా పరిగణించాలి.

అత్యాచారం చట్టంలో మార్పులకు పార్లమెంటు ఎగువ సభ కౌన్సిల్ ఆఫ్ స్టేట్స్ ఈ ఏడాది ప్రారంభంలోనే అనుకూలంగా ఓటువేసింది. కానీ దిగువ నేషనల్ కౌన్సిల్ సోమవారం నాటి ఓటింగ్‌ సందర్భంగా లైంగిక చర్యలకు స్పష్టమైన సమ్మతి అవసరమయ్యే మరింత తీవ్రమైన మార్పులను చేసింది. ‘ఎస్ మీన్స్ ఎస్’ (ఒక విధంగా పరస్పర ఆమోదం.. అంగీకారం అన్నట్లే) అనే విధానానికి మొత్తం 190 మంది సభ్యుల్లో ఈ బిల్లుకు 99 మంది, వ్యతిరేకంగా 88 మంది ఓటేయగా.. ముగ్గురు గైర్హాజరయ్యారు. స్వల్ప మెజార్టీతో బిల్లు ఆమోదం పొందింది.

ముసాయిదా బిల్లుపై చర్చ సందర్భంగా సోషలిస్ట్ పార్లమెంట్ సభ్యురాలు తమరా ఫునిసిల్లో మాట్లాడుతూ.. ‘‘మీరు అడగకుండా మీ పొరుగువారి పర్సు నుంచి డబ్బులు తీసుకోలేరు.. బెల్ కొట్టకుండా ఒకరి ఇంట్లోకి ప్రవేశించలేరని స్పష్టంగా తెలుసు.. నా వాలెట్, నా ఇల్లును నా శరీరం కంటే ఎందుకు అంత భద్రంగా చూసుకోవాలి?’ ఆమె ప్రశ్నించారు. గ్రీన్స్ ఎంపీ రాఫెల్ మహిమ్ ‘ఇతరుల శరీరం ఎప్పుడూ ఓపెన్ బార్ కాదు’ అని నొక్కి చెప్పారు. అయితే పార్లమెంట్‌లోని చాలా మంది సభ్యులు దీనిని వ్యతిరేకించారు. ఇది గందరగోళాన్ని సృష్టిస్తుందని, ఆచరణలో పెట్టడం కష్టమని వాదించారు.

మరోవైపు, అత్యాచార చట్టంలో మార్పులకు స్విట్జర్లాండ్ దిగువ సభ ఆమోదంపై అమ్నెస్టీ ఇంటర్నేషనల్ స్పందించింది. ‘‘మహిళల హక్కుల కోసం, లైంగిక వేధింపుల బాధితుల కోసం సంవత్సరాల తరబడి ఉద్యమకారుల కార్యాచరణ తర్వాత దక్కిన భారీ విజయం’గా ప్రశంసించింది. కానీ ప్రక్రియ ముందుకు సాగడానికి ఉభయసభలు అవగాహనకు రావాలి. అది జరిగిన తర్వాత ఈ అంశంపై ప్రజా ఓటింగ్ కోరుతారు. స్పెయిన్, స్వీడన్, డెన్మార్క్. బెల్జియంతో సహా అనేక ఇతర యూరోపియన్ దేశాలు అత్యాచారాన్ని స్పష్టమైన అనుమతి లేకుండా లైంగిక చర్యగా నిర్వచించే దిశగా అడుగులు వేస్తున్నాయి.