ఏపీకి ప్రధాని మోదీ వరాలు.. 1.85 లక్షల కోట్లతో గ్రీన్ హైడ్రోజన్ హబ్

ఆంధ్రప్రదేశ్ రాష్ట్ర పురోభివృద్ధి దిశగా బుధవారం కీలక అడుగులు పడ్డాయి. ప్రధానమంత్రి నరేంద్ర మోదీ చేతులు మీదుగా భారీ ప్రాజెక్టులకు శంకుస్థాపనలు జరిగాయి. ప్రధానమంత్రిగా బాధ్యతలు స్వీకరించిన తర్వాత రెండోసారి ఏపీకి వచ్చిన నరేంద్ర మోదీ ఏపీ ప్రజలకు శుభవార్త వినిపించారు. ఏపీని అభివృద్ధి బాట పట్టించేలా, ఆంధ్రప్రదేశ్ పారిశ్రామిక రంగానికి ఊపిరిలూదేలా రూ.2.08 లక్షల కోట్ల విలువైన ప్రాజెక్టులకు ప్రారంభోత్సవాలు, శంకుస్థాపనలు చేశారు. అందులో ప్రధానమైనది.. అనకాపల్లి జిల్లా పూడిమడకలో ఏర్పాటు కానున్న ఎన్టీపీసీ గ్రీన్‌ హైడ్రోజన్‌ హబ్.

సుమారుగా లక్షా 85 వేల కోట్ల భారీ పెట్టుబడితో అనకాపల్లి జిల్లా అచ్యుతాపురం మండలం పూడిమడకలో ఎన్టీపీసీ గ్రీన్ హైడ్రోజన్ హబ్ ఏర్పాటుకు ప్రధానమంత్రి నరేంద్ర మోదీ శంకుస్థాపన చేశారు. 1,200 ఎకరాల్లో ఎన్టీపీసీ గ్రీన్‌ హైడ్రోజన్‌ హబ్‌ ఏర్పాటు కానుంది. 2030 నాటికి ఏటా 5 మిలియన్ టన్నుల గ్రీన్ హైడ్రోజన్ ఉత్పత్తిని సాధించాలని కేంద్రం లక్ష్యంగా నిర్దేశించుకుంది. అందులో భాగంగానే పూడిమడకలో ఎన్టీపీసీ గ్రీన్ హైడ్రోజన్ హబ్ ఏర్పాటు చేస్తు్న్నారు. ఎన్‌టీపీసీ అనుబంధ గ్రీన్‌ ఎనర్జీ లిమిటెడ్‌ ఆధ్వర్యంలో ఈ హబ్ ఏర్పాటుకానుంది.

ఎన్టీపీసీ గ్రీన్ హైడ్రోజన్ హబ్ ద్వారా ప్రత్యక్షంగా, పరోక్షంగా 57 వేల మందికి ఉపాధి అవకాశాలు కల్పించనున్నారు. అలాగే ఈ ప్లాంట్ ఉత్పత్తి సామర్థ్యం 80 గిగావాట్లు. 2028 నాటికల్లా ఇక్కడ గ్రీన్ హైడ్రోజన్‌ విద్యుత్‌ ఉత్పత్తిని ప్రారంభించాలన్నది లక్ష్యం. ఈ గ్రీన్ హైడ్రోజన్ హబ్ ద్వారా రోజుకు 1500 టన్నుల గ్రీన్‌ హైడ్రోజన్‌ను ఉత్పత్తి చేయాలని లక్ష్యంగా పెట్టుకున్నారు. ఇక్కడ ఉత్పత్తి చేసిన గ్రీన్ హైడ్రోజన్‌ను దేశ, విదేశాలకు ఎగుమతి చేస్తారు. .

వాస్తవానికి పదేళ్ల కిందటే ఇక్కడ థర్మల్ పవర్ ప్లాంట్ ఏర్పాటు చేయాల్సి ఉంది. కానీ వివిధ కారణాల వద్ద అది సాధ్యపడలేదు. 2024 ఎన్నికల్లో గెలిచి కూటమి ప్రభుత్వం అధికారంలోకి వచ్చిన తర్వాత సీఎం చంద్రబాబు నాయుడు దీనిపై ప్రత్యేక శ్రద్ధ తీసుకున్నారు. పూడిమడక వద్ద ఎన్టీపీసీ ఆధీనంలో ఉన్న భూమిలో గ్రీన్‌ హైడ్రోజన్‌ హబ్ ఏర్పాటు చేయాలని కేంద్ర ప్రభుత్వాన్ని కోరగా.. కేంద్ర ప్రభుత్వం అంగీకరించింది. దీంతో ఎన్టీపీసీ గ్రీన్ హైడ్రోజన్ హబ్ ఏర్పాటు కానుంది.

కర్బన రహిత, శిలాజ ఇంధనాల వాడకం ద్వారా వాతావరణ కాలుష్యం కలుగుతోంది. దీంతో వాటికి బదులుగా గ్రీన్ హైడ్రోజన్ వాడకాన్ని ప్రోత్సహించాలని కేంద్రం భావిస్తోంది. సౌరశక్తి, పవన శక్తి వంటి పునరుత్పాదక శక్తులను ఉపయోగించి నీటిని హైడ్రోజన్, ఆక్సిజన్‌గా విభజించడం ద్వారా గ్రీన్ హైడ్రోజన్ ఉత్పత్తి చేస్తారు. ఈ గ్రీన్ హైడ్రోజన్ తయారీకి ఉపయోగించే విద్యుత్ కూడా పునరుత్పాదక ఇంధన వనరుల నుంచి వచ్చేదే. దీంతో వాతావరణ కాలుష్యం కలగదు. అందుకే 2030 నాటికి 5 మిలియన్ టన్నుల గ్రీన్ హైడ్రోజన్ ఉత్పత్తి సాధించే లక్ష్యంతో 2021లో కేంద్రం నేషనల్ గ్రీన్ హైడ్రోజన్ మిషన్ ప్రారంభించింది. ఆ మిషన్‌లో భాగంగా ఏర్పాటుకానున్న మొదటి ప్రాజెక్టు పూడిమడక ఎన్టీపీసీ గ్రీన్ హైడ్రోజన్ హబ్ కావటం విశేషం.